ءماجىلىس دەپۋتاتى جۇلدىز سۇلەيمەنوۆا پرەمەر-مينيستر ولجاس بەكتەنوۆكە دەپۋتاتتىق ساۋال جولداپ، تۇيتكىلدى ماسەلەلەردى كوتەردى، دەپ حابارلايدى Dalanews.kz.
دەپۋتات نازاربايەۆ ۋنيۆەرسيتەتى ەلىمىزدىڭ زياتكەرلىك الەۋەتىنىڭ تىرەگى، عىلىمي-تەحنولوگيالىق پروگرەستىڭ فلاگمانى ەكەنىن ايتا كەلىپ، ماڭىزدى ۇسىنىس جاسادى.
"ۋنيۆەرسيتەتتىڭ ۆيسە-پرەزيدەنتتەرى، مەكتەپ دەكاندارى مەن وزگە دە باسقارۋشى لاۋازىمدارىنا كەمىندە 70 پايىز دەڭگەيىندە قازاقستاندىق ازاماتتاردى تاعايىنداۋ ماسەلەسىن قاراستىرۋدى ۇسىنامىز. بۇل ستراتەگيالىق باسىمدىقتاردى تەرەڭ تۇسىنەتىن، زاماناۋي باسقارۋ مەن ءبىلىم سالاسىنداعى حالىقارالىق تاجىريبەنى يگەرگەن ۇلتتىق كادرلار كورپۋسىن قالىپتاستىرۋعا مۇمكىندىك بەرەدى. قازىرگى تاڭدا "بولاشاق" باعدارلاماسى اياسىندا شەتەلدىڭ وزىق جوعارى وقۋ ورىندارىندا ءبىلىم الىپ، عىلىمي دارەجەلەرىن يەلەنگەن بىلىكتى جاس قازاقستاندىقتار بار. ولارعا وسىنداي جوعارى جاۋاپكەرشىلىك جۇكتەلەتىن لاۋازىمدارعا تاعايىندالۋ مۇمكىندىگىن ۇسىنۋ ولاردىڭ شەتەلگە كەتىپ، باسقا مەملەكەتتەردە جۇمىس ىستەۋىنىڭ الدىن الىپ، ەل ىشىندە قالۋىنا جانە قازاقستاننىڭ عىلىمى مەن ءبىلىم بەرۋ سالاسىنا ادال قىزمەت ەتۋىنە جول اشار ەدى"، - دەپ ءتۇسىندىردى ول.
سونداي-اق، دەپۋتات نازاربايەۆ ۋنيۆەرسيتەتىنىڭ جوعارى ءبىلىم مەكتەبى اياسىندا مەكتەپ ديرەكتورلارى، ولاردىڭ ورىنباسارلارى مەن تاربيە ىسىنە جاۋاپتى ماماندارعا ارنالعان ارنايى باكالاۆريات باعدارلاماسىن ازىرلەۋدى ۇسىندى.
"بۇل باعدارلاماعا مەملەكەتتىك ءبىلىم گرانتتارىن قاراستىرۋ ارقىلى پەداگوگيكالىق مەنەدجمەنت جانە مەكتەپتى باسقارۋعا جۇيەلى كادرلاردى دايارلاۋعا مۇمكىندىك بولادى"، - دەيدى ول.
جۇلدىز سۇلەيمەنوۆا اۋىل مەكتەپتەرىنىڭ تۇلەكتەرىنە ارنالعان ارنايى دايىندىق باعدارلاماسىن جۇزەگە اسىرۋ قاجەت دەگەن دە پىكىرىن جەتكىزدى.
"بۇگىندە نازاربايەۆ ۋنيۆەرسيتەتىنىڭ جانىنداعى Foundation باعدارلاماسىنا نەگىزىنەن قالالىق جانە يننوۆاسيالىق مەكتەپتەردىڭ تۇلەكتەرى ءتۇسىپ جاتىر. اۋىل مەكتەپتەرىنىڭ تۇلەكتەرى ءۇشىن بۇل باعدارلاما ءبىلىم دەڭگەيى مەن ورتاداعى ايىرماشىلىقتارعا بايلانىستى قولجەتىمسىز. وسىعان بايلانىستى اۋىلدىق مەكتەپ تۇلەكتەرىنە بەيىمدەلگەن، الەۋمەتتىك تۇرعىدان ادىلەتتى ءارى قولجەتىمدى ارنايى 1،5 جىلدىق دايىندىق (foundation) باعدارلاماسىن ازىرلەۋ قاجەت"، - دەپ تۇيىندەدى ول.
