Májilis depýtaty Juldyz Súleimenova premer-ministr Oljas Bektenovke depýtattyq saýal joldap, túitkildi máselelerdi kóterdi, dep habarlaidy Dalanews.kz.
Depýtat Nazarbaev ýniversiteti elimizdiń ziiatkerlik áleýetiniń tiregi, ǵylymi-tehnologiialyq progrestiń flagmany ekenin aita kelip, mańyzdy usynys jasady.
"Ýniversitettiń vitse-prezidentteri, mektep dekandary men ózge de basqarýshy laýazymdaryna keminde 70 paiyz deńgeiinde qazaqstandyq azamattardy taǵaiyndaý máselesin qarastyrýdy usynamyz. Bul strategiialyq basymdyqtardy tereń túsinetin, zamanaýi basqarý men bilim salasyndaǵy halyqaralyq tájiribeni igergen ulttyq kadrlar korpýsyn qalyptastyrýǵa múmkindik beredi. Qazirgi tańda "Bolashaq" baǵdarlamasy aiasynda sheteldiń ozyq joǵary oqý oryndarynda bilim alyp, ǵylymi dárejelerin ielengen bilikti jas qazaqstandyqtar bar. Olarǵa osyndai joǵary jaýapkershilik júkteletin laýazymdarǵa taǵaiyndalý múmkindigin usyný olardyń shetelge ketip, basqa memleketterde jumys isteýiniń aldyn alyp, el ishinde qalýyna jáne Qazaqstannyń ǵylymy men bilim berý salasyna adal qyzmet etýine jol ashar edi", - dep túsindirdi ol.
Sondai-aq, depýtat Nazarbaev ýniversitetiniń Joǵary bilim mektebi aiasynda mektep direktorlary, olardyń orynbasarlary men tárbie isine jaýapty mamandarǵa arnalǵan arnaiy bakalavriat baǵdarlamasyn ázirleýdi usyndy.
"Bul baǵdarlamaǵa memlekettik bilim granttaryn qarastyrý arqyly pedagogikalyq menedjment jáne mektepti basqarýǵa júieli kadrlardy daiarlaýǵa múmkindik bolady", - deidi ol.
Juldyz Súleimenova aýyl mektepteriniń túlekterine arnalǵan arnaiy daiyndyq baǵdarlamasyn júzege asyrý qajet degen de pikirin jetkizdi.
"Búginde Nazarbaev ýniversitetiniń janyndaǵy Foundation baǵdarlamasyna negizinen qalalyq jáne innovatsiialyq mektepterdiń túlekteri túsip jatyr. Aýyl mektepteriniń túlekteri úshin bul baǵdarlama bilim deńgeii men ortadaǵy aiyrmashylyqtarǵa bailanysty qoljetimsiz. Osyǵan bailanysty aýyldyq mektep túlekterine beiimdelgen, áleýmettik turǵydan ádiletti ári qoljetimdi arnaiy 1,5 jyldyq daiyndyq (foundation) baǵdarlamasyn ázirleý qajet", - dep túiindedi ol.
