ءماجىلىس دەپۋتاتى ەرمۇرات باپي سپورت سالاسىنداعى تاعى ءبىر ماسەلەنى اشىق ايتتى. باپيدىڭ سوزىنشە، جەرگىلىكتى ايماقتىق جانە رەسپۋبليكالىق سپورت فەدەراسيالارى دەربەس جۇمىس ىستەيدى، وسى تۇستا رەفورما جاسايتىن ۋاقىت جەتكەن،- دەپ حابارلايدى Dalanews.kz.
دەپۋتات بۇل جاعداي مۇددەلەر قاقتىعىسىنا جانە جاۋاپكەرشىلىك سالعىرتتىعىنا اكەپ سوقتىراتىنىن دا ايتتى.
باپي ماجىلىستە سىنعا قالعان فۋتبول فەدەراسياسى كلۋبتاردى الالاۋعا كوشكەنىن دە ءمالىم ەتتى.
"مينيسترلىك پەن سپورت فەدەراسيالارى اراسىنداعى قارىم-قاتىناستى رەفورمالايتىن ۋاقىت كەلدى. ماسەلەن، كەيبىر سالالىق سپورت فەدەراسيالارى "ءوزىم بىلەمدىككە" سالىنىپ جاتىر. ءماجىلىستىڭ جۋىقتاعى جالپى وتىرىسىندا دەپۋتات قازىبەكتىڭ سىنىنا ۇشىراعان فۋتبول فەدەراسياسى فۋتبول كلۋبتارىن الالاۋعا كىرىستى. مىسال ءۇشىن ورال قالاسىنىڭ "اق جايىق" كلۋبى قارجىلاندىرۋدان قاعىلىپ، جابىلىپ قالۋدىڭ الدىندا تۇر"، - دەدى ول.
ەرمۇرات باپيدىڭ پىكىرىنشە، كەيبىر سپورت فەدەراسيالارىنىڭ قۇرىلتايشىلارى دا كلاندىق نەگىزدە جاساقتالعان.
"ۋشۋ جانە كۋنگ-فۋ فەدەراسياسىنىڭ قۇرىلتايشىلارى كلاندىق نەگىزدە جاساقتالىپ، جەكەمەنشىك فەدەراسياعا اينالىپ كەتكەن. سونىڭ سالدارىنان الەم چەمپيوناتىنىڭ جۇلدەگەرلەرى قازاقستان قۇراما كومانداسىنا الىنباي، سپورتشىلار سپورت اكىمشىلىكتەرىنىڭ ەسىگىن توزدىرىپ، شاعىمدانۋعا ءماجبۇر بولىپ ءجۇر.
سونداي-اق مينيسترلىككە قاتىستى جەكەلەگەن ارنايى سپورت كوللەدجدەرىندە تالانتتى جاس سپورتشىلاردى الالاۋ دەرەكتەرى كەزدەسەدى. ءىرى حالىقارالىق تۋرنيرگە كوللەدج باسشىلارىنىڭ "ليۋبيمچيكتەرى" بارادى، ال تالانتتى جاستار شەت قاقپاي قالادى. ۇلتتىق نامىس پەن مەملەكەتتىك مۇددە ادىرەم قالعان بۇل جەرلەردە"، - دەيدى دەپۋتات.
