ءماجىلىس وتىرىسىندا ەرمۇرات باپي قازاقستان مەن ەۋروپاداعى مرت باعاسىن سالىستىردى، دەپ حابارلايدى Dalanews.kz.
دەپۋتاتتىڭ سوزىنشە، ول بىلتىر سىرقاتتانعان ۋاقىتىندا ماگنيتتى-رەزونانستى توموگرافياعا (مرت) تۇسكەنىن ايتتى.
"بىلتىر اۋىرىپ قالعانىمدا ەكى رەت ەۋروپاعا بارىپ، ەمدەلىپ قايتتىم. سول كەزدە مرت باعاسى 870 ەۋرو بولعان كەزدە، ال كومپيۋتەرلىك توموگرافيا باعاسى 750 ەۋرو بولعان كەزدە قازاقستانداعى باعانى "قۇدايعا شۇكىر" دەپ ويلادىم. دەگەنمەن ءمامس ماسەلەسى قوزعالعاندا قوعام تاراپىنان نارازىلىق بولىپ جاتادى. وسى تۇرعىدا تالقىلاۋ بارىسىندا ءمامس-تىڭ باسقارما قۇرامىنا قوعام مۇشەلەرىن كىرگىزۋ نەمەسە قىزمەتىن باقىلايتىن كوميسسيا قۇرۋ مۇمكىن بە؟" دەپ سۇرادى ەرمۇرات باپي.
بۇل سۇراققا دەنساۋلىق ساقتاۋ مينيستر اقمارال ءالنازاروۆا جاۋاپ بەردى. ونىڭ سوزىنشە، بۇل ماسەلەدە قوعامدىق باقىلاۋ قاجەت.
"ۇسىنىسىڭىز دۇرىس، ونى قولدايمىز. دەنساۋلىق ساقتاۋ مينيسترلىگى ۇسىنىسىڭىزدى قولداپ، زاڭعا ەنگىزۋ كەرەك بولسا ەنگىزەمىز. قۇرامدى جاڭارتۋ تۋرالى ۇسىنىس بولسا، قاراستىرۋعا دايىنبىز"، دەيدى مينيستر.
