ءماجىلىستىڭ جالپى وتىرىسىندا سپورت سالاسىنا قاتىستى زاڭ جوباسى قارالدى. دەپۋتات نارتاي ارالباي ۇلىنىڭ سوزىنشە، لەگيونەرلەرگە مەملەكەتتىڭ بيۋدجەتى ەسەبىنەن دە، كۆازيمەملەكەتتىك سەكتوردىڭ بيۋدجەتى ەسەبىنەن دە قارجى ءبولۋدى توقتاتۋ تۋرالى نورما قابىلداندى، - دەپ حابارلايدى Dalanews.kz.

الەۋمەتتىك-مادەني دامۋ كوميتەتىنىڭ مۇشەسى نارتاي سارسەنعالييەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت، سونداي-اق نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسى جونىندە قوسىمشا بايانداما جاسادى.

بۇل زاڭ جوباسى ۇكىمەتتىڭ 2023 جىلعا ارنالعان زاڭ جوبالاۋ جۇمىستارىنىڭ جوسپارىنا سايكەس ازىرلەنىپ،2023 جىلعى                                 29 جەلتوقسانداعى №1243 قاۋلىسىمەن پارلامەنت ءماجىلىسىنىڭ قاراۋىنا ەنگىزىلدى.

"زاڭ جوباسى وتاندىق سپورتتىڭ جىلدار بويى قوردالانىپ قالعان قاداۋ-قاداۋ ماسەلەرىن شەشەتىن، بيۋدجەتتىڭ ءبۇيىرىن تەسپەي سورىپ، سپورتقا بولىنگەن قارجىنى  ماقساتسىز جۇمساۋدى توقتاتادى دەپ سەنەمىز. سەبەبى سپورتقا قىرۋار اقشا بولىنگەنىم ەتكەن ەڭبەكتەن كەتكەن كەمشىلىك كوپ ەكەنىن ءسىز بەن ءبىز ۇنەمى ايتىپ ءجۇرمىز. 

زاڭ جوباسىنىڭ جۇمىس توبىنا كىرگەن دەپۋتاتتار بىرنەشە ماڭىزدى نورمالاردى ەنگىزدى. ماسەلەن، مينيسترلىك بۇرىن بەكىتكەن، بيۋدجەتكە قول سالعانى بولماسا اتىنىڭ ءوزىن اعايىن بىلمەيتىن سپورت تۇرلەرىن قازىنا قارجىسىنان قاعۋ ءۇشىن ناقتى شەشىم قابىلداندى. زاڭدى تۇردە جوعارى جەتىستىكتەر سپورتى دەگەن تۇسىنىك ەنىپ وعان كىرەتىن سپورت تۇرلەرى ناقتىلاندى. جوعارى جەتىستىكتەر سپورتىنىڭ ىشىندە جوعارى جەتىستىك كورسەتكەندەرى ءۇشىن باسىم سپورت تۇرلەرى تۇسىنىگى ەنگىزىلىپ، ونىڭ باسىمدىقتارى ايقىن كورسەتىلدى"، - دەدى ول.

دەپۋتات ارالباي ۇلى لەگيونەرلەرگە قاتىستى ماسەلەنى دە كوتەردى.

"قازاقستاننىڭ اقشاسىن اساۋدى بىلگەنمەن الاڭدا ۇلكەن جەتىستىك جاساۋدى بىلمەگەن لەگيونەرلەرگە مەملەكەتتىڭ بيۋدجەتى ەسەبىنەن دە، كۆازيمەملەكەتتىك سەكتوردىڭ بيۋدجەتى ەسەبىنەن دە قارجى ءبولۋدى توقتاتۋ تۋرالى نورما قابىلداندى. وعان قوسا بيۋدجەت قارجىسىنىڭ ناقتى قايدا جۇمسالۋى كەرەكتىگى ايقىن جازىلدى.

ەرەكشە جاندارعا كورسەتىلەتىن ەرەكشە كومەك "سپورتشىنى الىپ جۇرەتىن ادام" تۇسىنىگىمەن زاڭعا ەنگىزىلىپ ونىڭ شىعىندارىن وتەۋ جولى دا جازىلدى. بۇقارالىق سپورتقا جاسالاتىن قولداۋ دا زاڭ جوباسىندا اشىق جازىلدى. ۇلتتىق سپورتتىڭ قارىشتاپ دامۋىنا اسەر ەتەتىن باستامالار، ولاردى قارجاتپەن قامتاماسسىز ەتۋ قادامدارى ناقتى كورسەتىلدى"، - دەدى ول.

الەۋمەتتىك-مادەني دامۋ كوميتەتىنىڭ مۇشەسىنىڭ ايتۋىنشا، جۇمىس توبىنىڭ 11 وتىرىسى ءوتىپ، 130-دان اسا تۇزەتۋ قارالعان.