Májilistiń jalpy otyrysynda sport salasyna qatysty zań jobasy qaraldy. Depýtat Nartai Aralbaiulynyń sózinshe, legionerlerge memlekettiń biýdjeti esebinen de, kvazimemlekettik sektordyń biýdjeti esebinen de qarjy bólýdi toqtatý týraly norma qabyldandy, - dep habarlaidy Dalanews.kz.
Áleýmettik-mádeni damý komitetiniń múshesi Nartai Sársenǵaliev «Qazaqstan Respýblikasynyń keibir zańnamalyq aktilerine dene shynyqtyrý jáne sport, sondai-aq normalardyń artyq (shamadan tys) zańnamalyq reglamenttelýin bolǵyzbaý máseleleri boiynsha ózgerister men tolyqtyrýlar engizý týraly» Qazaqstan Respýblikasy Zańynyń jobasy jóninde qosymsha baiandama jasady.
Bul zań jobasy Úkimettiń 2023 jylǵa arnalǵan zań jobalaý jumystarynyń josparyna sáikes ázirlenip,2023 jylǵy 29 jeltoqsandaǵy №1243 qaýlysymen Parlament Májilisiniń qaraýyna engizildi.
"Zań jobasy otandyq sporttyń jyldar boiy qordalanyp qalǵan qadaý-qadaý máselerin sheshetin, biýdjettiń búiirin tespei soryp, sportqa bólingen qarjyny maqsatsyz jumsaýdy toqtatady dep senemiz. Sebebi sportqa qyrýar aqsha bólingenim etken eńbekten ketken kemshilik kóp ekenin siz ben biz únemi aityp júrmiz.
Zań jobasynyń jumys tobyna kirgen depýtattar birneshe mańyzdy normalardy engizdi. Máselen, ministrlik buryn bekitken, biýdjetke qol salǵany bolmasa atynyń ózin aǵaiyn bilmeitin sport túrlerin qazyna qarjysynan qaǵý úshin naqty sheshim qabyldandy. Zańdy túrde joǵary jetistikter sporty degen túsinik enip oǵan kiretin sport túrleri naqtylandy. Joǵary jetistikter sportynyń ishinde joǵary jetistik kórsetkenderi úshin basym sport túrleri túsinigi engizilip, onyń basymdyqtary aiqyn kórsetildi", - dedi ol.
Depýtat Aralbaiuly legionerlerge qatysty máseleni de kóterdi.
"Qazaqstannyń aqshasyn asaýdy bilgenmen alańda úlken jetistik jasaýdy bilmegen legionerlerge memlekettiń biýdjeti esebinen de, kvazimemlekettik sektordyń biýdjeti esebinen de qarjy bólýdi toqtatý týraly norma qabyldandy. Oǵan qosa biýdjet qarjysynyń naqty qaida jumsalýy kerektigi aiqyn jazyldy.
Erekshe jandarǵa kórsetiletin erekshe kómek "sportshyny alyp júretin adam" túsinigimen zańǵa engizilip onyń shyǵyndaryn óteý joly da jazyldy. Buqaralyq sportqa jasalatyn qoldaý da Zań jobasynda ashyq jazyldy. Ulttyq sporttyń qaryshtap damýyna áser etetin bastamalar, olardy qarjatpen qamtamassyz etý qadamdary naqty kórsetildi", - dedi ol.
Áleýmettik-mádeni damý komitetiniń múshesiniń aitýynsha, jumys tobynyń 11 otyrysy ótip, 130-dan asa túzetý qaralǵan.
