دۇنيەجۇزىلىك دەنساۋلىق ساقتاۋ ۇيىمى ءتاتتى سۋسىندار، الكوگول جانە تەمەكى ونىمدەرىنىڭ باعاسىن 2035 جىلعا دەيىن 50%-عا دەيىن كوتەرۋگە شاقىردى. باس ۇيىم وسىلايشا قانت ديابەتى، جۇرەك اۋرۋلارى مەن قاتەرلى ىسىكتەن بولاتىن ءولىم-جىتىمدى ازايتۋعا بولادى دەپ سانايدى، دەپ حابارلايدى Dalanews.kz.

دۇنيەجۇزىلىك دەنساۋلىق ساقتاۋ ۇيىمىنىڭ (ددۇ) "3-كە 35" دەپ اتالاتىن جاڭا باستاماسى تەمەكى، الكوگول جانە ءتاتتى سۋسىندارمەن كۇرەسۋگە باعىتتالعان.

ددۇ-نىڭ جاقىندا جاريالاعان ەسەبىنە سايكەس، بۇل ونىمدەرگە باعانى ءبىر رەتتىك 50%-عا كوتەرۋ الداعى 50 جىل ىشىندە 50 ملن مەزگىلسىز ءولىمنىڭ الدىن الۋى مۇمكىن.

"دەنساۋلىق ءۇشىن سالىناتىن سالىقتار — ءبىزدىڭ قولىمىزداعى ەڭ ءتيىمدى قۇرالداردىڭ ءبىرى. ولار زياندى ونىمدەردى تۇتىنۋدى ازايتىپ، ۇكىمەتكە دەنساۋلىق ساقتاۋ، ءبىلىم بەرۋ جانە الەۋمەتتىك قورعاۋ سالالارىنا قايتا ينۆەستيسيالاۋعا مۇمكىندىك بەرەدى. ەندى ارەكەت ەتەتىن ۋاقىت كەلدى"، دەلىنگەن ۇيىمنىڭ ۇندەۋىندە.

اتالمىش باستامانىڭ  ماقساتى – الداعى 10 جىل ىشىندە 1 ترن دوللار قاراجات جيناۋ. 2012–2022 جىلدار ارالىعىندا الەمنىڭ 140-قا جۋىق ەلى تەمەكى ونىمدەرىنە سالىقتى ارتتىرعان. بۇل شىلىم باعاسىنىڭ 50%-دان استام وسىمىنە الىپ كەلدى.

ايتا كەتسەك، دۇنيەجۇزىلىك بانك قازاقستانعا حالىق دەنساۋلىعىن جاقسارتۋ ماقساتىندا قۇرامىندا قانتى بار سۋسىندارعا اكسيز ەنگىزۋدى ۇسىنعان ەدى، ويتكەنى ەلدە ءاربىر ءتورتىنشى بالا سەمىزدىككە نەمەسە ارتىق سالماققا شالدىققان.

بۇعان دەيىن ەلىمىزدە تەمەكى تاعى دا قىمباتتاۋى مۇمكىن ەكەنىن جازعانبىز.