جىلقى تۋرالى ۇزاق تولعاپ، تاڭدى-تاڭعا ۇرىپ جىرلار، كۇندى كۇنگە جالعاپ داستان ايتسا تاۋسا الماسپىز. ال قولىنا قالام ۇستاعان قازاقتىڭ، ەكى اۋىز ءسوزدىڭ باسىن قوسىپ ولەڭ جازار اقىننىڭ جىلقى جايلى ءبىر شۋماق جازباعانى كەمدە كەم بولار، بالكىم.
نەگە ەكەنىن كىم ءبىلسىن، وسى ءبىر ادام بالاسىنا تىم جاقىن، تىم ەتەنە جانۋاردى كورسە كوڭىلى تەبىرەنبەس قازاق جوق.
بۇگىن دە سونداي ءبىر ساليقالى ساپاردىڭ كۋاسى بولىپ قايتتىق.
– وزدەرىڭىز بىلەسىزدەر، ەلباسىنىڭ ماقالاسىنان كەيىن ءبىز وسىنداي جوبانى قولعا العان بولاتىنبىز. اتالعان تۋىندى ارقىلى قازاقستان جەرى وركەنيەتتىڭ ورتالىعى بولعانىن الەمگە تانىتۋعا ۇلكەن مۇمكىندىك تۋىپ وتىر. الەم عالىمدارى جىلقى ەڭ العاش قولعا ۇيرەتىلگەن جەر قازىرگى قازاقستان تەرريتورياسى ەكەنى تۋرالى كوپتەگەن دالەلدەر كەلتىردى. ءفيلمنىڭ قازاقستان اۋماعىندا ءتۇسىرىلۋىنىڭ ەڭ باستى سەبەبى دە – وسى. وسى سەريالدىڭ ارقاسىندا جىلقىنى ەڭ العاش ءبىزدىڭ اتا-بابالارىمىزدىڭ قالاي ۇيرەتكەنىن كۇللى الەم تاماشالايتىن بولادى. بۇل قازاقستاننىڭ حالىقارالىق ارەناداعى ءيميدجىن ارتتىرىپ، تاريحى مەن مادەنيەتىنە قىزىعۋشىقتى كۇشەيتەدى، – دەيدى داۋرەن اسكەربەك ۇلى.
ەستەرىڭىزدە بولسا، 2017 جىلى 7 ناۋرىزدا وتكەن باسپا ءسوز ماسليحاتىندا مينيستر داۋرەن ابايەۆ «قازاقستان» رترك» اق مەن «Clearwater Documentary Inc.» كومپانياسىنىڭ «EQUUS» دەرەكتى تريلوگياسىن تۇسىرەتىنىن جاريالاعان بولاتىن. ەكى جاقتى مەموراندۋمعا سايكەس، «قازاقستان» كورپوراسياسى «Equus» ءفيلمىن قازاقستان اۋماعىندا قازاق جانە ورىس تىلدەرىندە تاراتۋ قۇقىعىنا يە بولادى. سونداي-اق، حالىقارالىق اقپارات تاراتۋشى قىزمەتىن اتقارادى.
– بۇل تۋىندىنى قازاقستاندىق تەلەارنالار عانا ەمەس، اقش-تىڭ، گەرمانيانىڭ، كانادا مەن فرانسيانىڭ تەلەارنالارى بىرلەسە وتىرىپ جاساپ جاتىرمىز. ءبىز بۇل جوبانى اياقتاساق الەمنىڭ 50 مەملەكەتى ساتىپ الۋعا دايىن وتىر. سوندىقتاندا ءبىز وسىنى قولعا الىپ وتىرمىز. ءقازىر الماتىدا وسى فيلمگە ارنايى وسىدان 6000 جىل بۇرىنعى ادامداردىڭ كيگەن كيىمدەرى جاسالىپ جاتىر – دەدى مينيستر.
فيلم 28 تامىزدان باستاپ تۇسىرىلە باستايدى. ال تريلوگيانىڭ العاشقى نۇسقاسى 2018 جىلدان باستاپ كورسەتىلەدى. «EQUUS» تريلوگياسىندا جىلقى جانۋارىنىڭ ادامزات تاريحىنداعى ءرولى، سونداي-اق ورتالىق ازيا دالاسىنداعى جىلقى شارۋشىلىعىنىڭ قاشان جانە قالاي باستالعانى جايىندا باياندالاتىن بولادى. بارلىق ماتەريالدار عىلىمي زەرتتەۋلەرگە نەگىزدەلگەن.
