Jylqy týraly uzaq tolǵap, tańdy-tańǵa uryp jyrlar, kúndi kúnge jalǵap dastan aitsa taýsa almaspyz. Al qolyna qalam ustaǵan qazaqtyń, eki aýyz sózdiń basyn qosyp óleń jazar aqynnyń jylqy jaily bir shýmaq jazbaǵany kemde kem bolar, bálkim.
Nege ekenin kim bilsin, osy bir adam balasyna tym jaqyn, tym etene janýardy kórse kóńili tebirenbes qazaq joq.
Búgin de sondai bir saliqaly sapardyń kýási bolyp qaittyq.
– Ózderińiz bilesizder, Elbasynyń maqalasynan keiin biz osyndai jobany qolǵa alǵan bolatynbyz. Atalǵan týyndy arqyly Qazaqstan jeri órkeniettiń ortalyǵy bolǵanyn álemge tanytýǵa úlken múmkindik týyp otyr. Álem ǵalymdary jylqy eń alǵash qolǵa úiretilgen jer qazirgi Qazaqstan territoriiasy ekeni týraly kóptegen dálelder keltirdi. Filmniń Qazaqstan aýmaǵynda túsirilýiniń eń basty sebebi de – osy. Osy serialdyń arqasynda jylqyny eń alǵash bizdiń ata-babalarymyzdyń qalai úiretkenin kúlli álem tamashalaityn bolady. Bul Qazaqstannyń halyqaralyq arenadaǵy imidjin arttyryp, tarihy men mádenietine qyzyǵýshyqty kúsheitedi, – deidi Dáýren Áskerbekuly.
Esterińizde bolsa, 2017 jyly 7 naýryzda ótken baspasóz maslihatynda ministr Dáýren Abaev «Qazaqstan» RTRK» AQ men «Clearwater Documentary Inc.» kompaniiasynyń «EQUUS» derekti trilogiiasyn túsiretinin jariialaǵan bolatyn. Eki jaqty memorandýmǵa sáikes, «Qazaqstan» korporatsiiasy «Equus» filmin Qazaqstan aýmaǵynda qazaq jáne orys tilderinde taratý quqyǵyna ie bolady. Sondai-aq, halyqaralyq aqparat taratýshy qyzmetin atqarady.
– Bul týyndyny qazaqstandyq telearnalar ǵana emes, AQSh-tyń, Germaniianyń, Kanada men Frantsiianyń telearnalary birlese otyryp jasap jatyrmyz. Biz bul jobany aiaqtasaq álemniń 50 memleketi satyp alýǵa daiyn otyr. Sondyqtanda biz osyny qolǵa alyp otyrmyz. Qazir Almatyda osy filmge arnaiy osydan 6000 jyl burynǵy adamdardyń kigen kiimderi jasalyp jatyr – dedi ministr.
Film 28 tamyzdan bastap túsirile bastaidy. Al trilogiianyń alǵashqy nusqasy 2018 jyldan bastap kórsetiledi. «EQUUS» trilogiiasynda jylqy janýarynyń adamzat tarihyndaǵy róli, sondai-aq Ortalyq Aziia dalasyndaǵy jylqy sharýshylyǵynyń qashan jáne qalai bastalǵany jaiynda baiandalatyn bolady. Barlyq materialdar ǵylymi zertteýlerge negizdelgen.
