– ەل پرەزيدەنتى «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋدى تاپسىردى. بۇل رەتتە تۇرعىنداردىڭ ءاربىر ءوتىنىشى ەسكەرۋسىز ءارى جاۋاپسىز قالماۋى ءتيىس. زاڭ شەڭبەرىندە ءتۇسىندىرۋ جانە قولداۋ جۇمىستارى اتقارىلۋى قاجەت، – دەگەن دارحان ساتىبالدى سارىاعاش، شاردارا، سايرام، تۇلكىباس جانە قازىعۇرت اۋدانى تۇرعىندارىنىڭ ارىز-شاعىمدارىن تىڭدادى.
سارىاعاشتىق تۇرعىن اسفالت توسەۋ، جولدى جوندەۋ ماسەلەسىن قوزعادى. كوشەگە گاز، سۋ قۇبىرلارى تارتىلعاندىقتان جول توسەلمەگەن. ال تاعى ءبىر تۇرعىن شاردارا اۋدانىندا سۋارمالى جەر بەرۋ، شالعاي اۋىلعا ەمدەۋ مەكەمەسىن سالۋ جونىندە ءوتىنىش ايتتى. ءوتىنىش يەلەرىنە زاڭ اياسىندا تۇسىنىكتەمە بەرىلدى.
وبلىس اكىمى جاۋاپتى باسقارما باسشىسىنا سارىاعاشتاعى تۇرعىن ايتقان اۋماقتا جول ماسەلەسىن زەردەلەۋ تۋرالى تاپسىرما بەردى. شارداراداعى سۋارمالى جەر ماسەلەسى دە شەشىمىن تاباتىنى، كونكۋرسقا بەرىلەتىنى ايتىلدى.
سايرامدىق تۇرعىن اۋدان ورتالىعىنداعى الاڭنىڭ قۇرىلىسى ساپاسىز جۇرگىزىلگەنى جانە مەكتەپتەگى زاڭسىزدىق تۋرالى شاعىمداندى. ءوڭىر باسشىسى قۇرىلىستى ساراپتاپ، مەردىگەردىڭ جۇمىسىن تەكسەرۋ جونىندە تاپسىرما بەردى. مەكتەپتەگى ديرەكتورعا قاتىستى شاعىم دا تەكسەرىلەتىن بولدى. وبلىستىق ادامي الەۋەتتى دامىتۋ باسقارماسىنا ناقتى تاپسىرما بەرىلدى. اتالعان باسقارما باسشىسىنا تۇلكىباستىق تۇرعىننىڭ بالاباقشا مەڭگەرۋشىسىنە بايلانىستى شاعىمى بويىنشا دا جۇمىس جۇرگىزۋ، زەردەلەۋ مىندەتتەلدى. سونىمەن بىرگە ءۇش ماسەلە كوتەرگەن قازىعۇرتتىق تۇرعىننىڭ وتىنىشتەرى مەن ۇسىنىستارى دا نازارعا الىناتىن بولدى.
