«استانا» پرەزيدەنتتىك كاسىبي سپورت كلۋبى قامقورلىق كەڭەسىنىڭ باسشىسى دارحان قالەتايەۆپەن بولعان سۇحباتتىڭ ەندى ءبىر قىزىقتى تۇسىنا توقتالىپ، نازارلارىڭىزعا ۇسىنساق دەپ ەدىك.
– دارحان امان ۇلى، «استانا» فۋتبول كلۋبىنىڭ بۇرىنعى قازاقستان فۋتبول فەدەراسياسىمەن قارىم-قاتىناسى جاقسى ەدى. ءقازىر سول سۇتتەي ۇيىعان تاتۋلىقتىڭ قايماعى بۇزىلىپ، اراعا سىزات تۇسكەندەي...
– ونداي ەشتەڭە جوق. ەگەر مەنىڭ جەكەلەي قارىم-قاتىناسىمدى بىلگىلەرىڭىز كەلسە، مەن قازىرگى فەدەراسيا پرەزيدەنتىمەن بۇرىننان تانىسپىن. سوڭعى 10-15 جىلدان بەرى بىلەمىن. باسقا قىزمەتتە جۇرگەنىندە دە، باسقا سالادا ەڭبەك ەتكەنىندە تانىس بولدىق. قارىم-قاتىناسىمىز جاقسى. ءتىپتى دوسپىز دەسەم دە بولادى.
وزدەرىڭىز بىلەسىزدەر، قفف باسشىلارى اۋىسقان سوڭ، فەدەراسيانىڭ بۇرىنعى باس حاتشىسى ءھام ۆيسە-پرەزيدەنتى سايان حاميتجانوۆ تا قىزمەتىنەن كەتتى. مەن ساياندى دا بۇرىننان بىلەمىن. سودان ونى «استانا» فۋتبول كلۋبىنا شاقىردىم. بىردەن ايتايىن، ادىلبەك جاقسىبەكوۆتىڭ ۇسىنىسى بويىنشا. ءارى ساياننىڭ «استانا فۋتبول كلۋبىنا جاقسىبەكوۆ ەلورداعا اكىم بولماي تۇرىپ كەلگەندىگىن ايتا كەتكىم كەلەدى.
ءيا، ساياندى «استانا» فۋتبول كلۋبىنا شاقىردىم. نەگە؟ ويتكەنى ول فۋتبولدا كوپ جىل ەڭبەك ەتتى. ونىڭ جۇمىسىنا ءار ءتۇرلى باعا بەرۋگە بولادى. ول قازاقستان فۋتبول فەدەراسياسىندا ءبىرىنشى ۆيسە-پرەزيدەنت بولىپ، بارلىق جۇمىستاردى ءوزى اتقاردى. ياعني مول تاجىريبە جينادى. ونىڭ سول تەلەگەي-تەڭىز تاجىريبەسىن كلۋبتا جۇزەگە اسىرۋعا بولاتىن ەدى. مەن سايانعا اشىق ايتتىم: «سەن تۋرالى ءار ءتۇرلى، ياعني وڭ پىكىر دە، تەرىس پىكىر دە ايتىلىپ ءجۇر، مىنە – كلۋب، مۇمكىندىكتەرى جامان ەمەس، بيۋدجەتى دە جۇپىنى ەمەس، تەك ءوزىڭنىڭ ىسكەر مامان ەكەنىڭدى دالەلدە، ناتيجە كورسەت».
[caption id="attachment_11137" align="alignright" width="268"]
دارحان قالەتايەۆ: جالپى، بىلتىر سايان سەنىمدى اقتاي الدى، ءتاپ-تاۋىر ناتيجە كورسەتتى. «استانا» فۋتبول كلۋبى ەل چەمپيونى بولدى.[/caption]
جالپى، بىلتىر سايان سەنىمدى اقتاي الدى، ءتاپ-تاۋىر ناتيجە كورسەتتى. «استانا» فۋتبول كلۋبى ەل چەمپيونى بولدى. ەۋروكۋبوكتا دا ورنەكتى ويىن ۇلگىسىن كورسەتتى.
ال قازىرگى فەدەراسيا باسشىلارىمەن قارىم-قاتىناسىمىزعا قايتا ورالار بولسام، مەن فۋتبولىمىز قارىشتاپ دامىپ، وركەندەي بەرسىن دەگەن نيەتتەمىن. فەدەراسيانى سىناۋ ءۇشىن ەمەس، قاقساي بەرۋ ءۇشىن ەمەس، ۇسىنىستارىمدى تىقپالاي بەرۋ ءۇشىن ەمەس، اياقدوبىمىز العا جىلجي بەرسىن دەپ ويلايمىن. توقمەيىلسۋ بولماسا ەكەن دەيمىن. مىنە، ءبىز ەۋروپامىز (ۋەفا قۇرامىندامىز)، بيۋدجەتى جوعارى كلۋبتارىمىز پايدا بولدى، ەۋروكۋبوكتاردا ناتيجەلى ويىن ورنەگىن كورسەتە باستادىق دەگەن ويلاردان اۋلاق بولىپ، ءبىر ورىندا تۇرالاپ قالماي، العا جىلجي بەرەيىك دەپ ويلايمىن. بۇكىل ەل بويىنشا فۋتبولدى دامىتا بەرۋىمىز كەرەك.
ارينە «مۇنىڭ ءبارى وڭاي ەمەس، فۋتبولىمىزدى كوتەرۋ ءۇشىن ونداعان، ءتىپتى بىرنەشە ونداعان جىلدار كەرەك» دەگەن پىكىرلەردى تۇسىنەمىن. سولاي دا شىعار. كەلىسەمىن. سونشا ۋاقىت كەرەك تە شىعار-اۋ.
ءبىراق ءبىز ءقازىر فۋتبولدا كوپ نارسەنى وزگەرتە الامىز. ويتكەنى ءبارى دە ءبىزدى قولدايدى. فۋتبول فەدەراسياسىنىڭ قۇرمەتتى پرەزيدەنتى بولىپ تابىلاتىن ەلباسى دا، ۇكىمەت تە، باسقا دا لاۋازىمدى تۇلعالار دا، حالىق تا، قوعام دا، ءبارى دە-بارى دە ەل فۋتبولىنىڭ قارىشتاپ دامىعانىن قالايدى. ءبارى دە كومەكتەسۋگە دايىن.
ال مەن بالالار مەن جاسوسپىرىمدەر فۋتبولىنىڭ اياعىنا تىك تۇرىپ كەتكەنىن، جاڭا ماماندار جەتىلىپ شىققانىن كورىپ وتىرعان جوقپىن. بۇل تۇرعىدا مەنىڭ كوپتەگەن ۇسىنىستارىم بار. ءتىپتى جەكە باعدارلاما قابىلداۋ كەرەك دەپ ويلايمىن. بۇل ماسەلەنى كوتەرىپ، جەتىلدىرە ءتۇسىپ، ءتىپتى لوببيلەۋ كەرەك.
ال ۇلتتىق چەمپيوناتقا قاتىستى ۇسىنىستارىمنىڭ ءبىرى فۋتبولشىلار جالاقىسىنىڭ ەڭ جوعارعى شەگىن بەلگىلەۋ ەكەنىن، وزدەرىڭىز دە بىلەسىزدەر. مەن مۇنى ءدال ءقازىر ەنگىزەيىك دەپ وتىرعان جوقپىن. مىسالى، الداعى ماۋسىمنان باستاپ، قولعا الۋعا بولادى.
[caption id="attachment_11139" align="alignright" width="812"]
وسىدان بىرەر كۇن بۇرىن «استانا» فۋتبول كلۋبىنىڭ سەربيالىق جاس ويىنشىسى نەمانيا ماكسيموۆيچ جاستار اراسىنداعى الەم چەمپيونى اتاندى.[/caption]
سوندا جالاقىنىڭ ەڭ جوعارعى شەگى ناقتى قانشا بولۋى كەرەك دەپ سانايسىز؟
– مەن نەگىزگى ءۇش كلۋب ءۇشىن ايتتىم. ءارى «قايرات»، «اقتوبە» جانە «استانا» دەپ اتاپ تا شىقتىم. جالاقىنىڭ ەڭ جوعارعى شەگى جىلىنا 300 مىڭ دوللار بولۋى كەرەك دەپ ەسەپتەيمىن. ال ءقايسىبىر كلۋب قۇرامىن جالاقىسى بۇدان دا جوعارى فۋتبولشىمەن كۇشەيتكىسى كەلسە، 10 پايىزىن فۋتبولدى دامىتۋعا ءبولىپ وتىرسىن.
– «ەلوردا كلۋبى ۇزدىك ويىنشىلارىڭىزعا جالاقىنى «اقتوبە» كلۋبىنداعىداي تولەي المايتىن بولعاندىقتان، وسىنداي ۇسىنىس جاساپ وتىر» دەۋشىلەر دە بار.
– بىردەن ايتايىن، ءبىز قارجىنى ۇنەمدەيمىز. ونى جاسىرمايمىن. قاراجاتتى ۇنەمدەگىمىز كەلەدى. ءبىز كوپ اقشا تولەي الامىز. ونىڭ ۇستىنە، ءدال ءقازىر بىزدە ەكى اكسيونەر بار: سامۇرىق-قازىنا» جانە استانا اكىمدىگى. ءقايسىبىر فۋتبولشىلارعا وتە جوعارى جالاقى تولەي الامىز. ءبىراق ول كىمگە ءتيىمدى؟! سوندىقتان ءبىز اسىرا سىلتەمەي، قارجىنى ماقساتتى تۇردە، ەل سپورتىنا پايدالى باعىتتا جۇمساعاندى ءجون كورەمىز.
جالپى، وسىنداي ماسەلەلەردى كوتەرۋىمىز كەرەك. جان-جاقتى سارالاپ، وڭ شەشىمىن تابۋ كەرەك. فەدەراسيا سول ءۇشىن. اتقارۋ كوميتەتىندە ۇندەمەي وتىرماي، قىزۋ تالقىلاۋ كەرەك. تەك بورانبايەۆ، تەك مەن سويلەي بەرسەك، دۇرىس پا؟ وندا اتقارۋ كوميتەتىنىڭ وتىرىسىنا بارىپ قاجەتى نە؟
وسى رەتتە «اقتوبە» كلۋبىمەن بولعان سوڭعى ويىنعا توقتالا كەتكىم كەلەدى. ءبىرىنشى كەزەكتە، اقتوبە وبلىسىنىڭ اكىمىن سىيلايتىندىعىمدى، ونىڭ فۋتبولعا دەگەن ىقىلاسىنا ءدان ريزا ەكەنىمدى ايتا كەتسەم دەيمىن. اقتوبە فۋتبولى مەن وسى ءوڭىردىڭ كلۋبى ءۇشىن جاساعانى كوپ.
ال مەنىڭ نارازى بولعانىم، وسى ويىنعا جاس تورەشى قازىلىق ەتتى. مەن كورىپ تۇرعان فەدەراسيانىڭ قاتەلىگى – وسى. مۇنداي وتە ماڭىزدى ويىنعا تاجىريبەلى تورەشى قازىلىق ەتۋى كەرەك قوي.
ءيا، كەيىننەن قفف تورەشىلەر مەن نۇسقاۋشىلار دەپارتامەنتىنىڭ باسشىسى ماتتەو ترەفولوني داۋ-دامايعا ۇلاسقان ويىن ساتىنە تۇسىنىكتەمە جاسادى. مەن ترەفولونيمەن داۋلاسپايمىن. ول – ءوز ءىسىنىڭ مامانى. سوندىقتان وعان قارسى ءۋاج ايتپايمىن.
ءبىراق مەنىڭ ويىم، ماڭىزدى ويىندارعا وسىنىڭ ءبارىن ءوزى دالەلدەپ، تۇسىنىكتەمە بەرە الاتىن تاجىريبەلى تورەشىلەردى قويىڭىزدار. نەگە جاس تورەشىلەر ءۇشىن ترەفولوني مالىمدەمە جاساۋى كەرەك. ول ماچ باسىندا-اق ويىن تىزگىنىن ۋىسىنان شىعارىپ الدى. سونىڭ سالدارىنان باۋىرجان جولشييەۆ جاراقات الىپ قالدى.
– وسى ماسەلەگە قاتىستى كەيبىر ماماندار ءسىزدىڭ وي-پىكىرىڭىزدى فەدەراسياعا قىسىم كورسەتۋ دەپ تە سانايدى.
– مەن مۇنى قىسىم كورسەتۋ دەپ ويلامايمىن. بۇل – مەنىڭ فۋتبول جانكۇيەرى رەتىندەگى جەكە پىكىرىم. ءيا، مەن «استانا» فۋتبول كلۋبى ءۇشىن كۇيىپ-پىستىم.«استانا» فۋتبول كلۋبىنىڭ جانكۇيەرىمىن. مەن سول ءۇشىن اتقارۋ كوميتەتىنىڭ وتىرىسىنا ادەيى بارعان جوقپىن. ادەيى! تەك ءوز پىكىرىمدى بايانداپ، رەسمي حات جولدادىم. ويتكەنى مەن اتقارۋ كوميتەتىنىڭ وتىرىسىنا بارىپ، وسى ماسەلەنى كوتەرەتىن بولسام، قانداي دا ءبىر شەشىم قابىلدانسا، سوندا «قىسىم كورسەتتى» دەپ ايتۋعا بولار ەدى. ال اتقارۋ كوميتەتى مەنىڭ پىكىرىمدى تالقىلاعان دا جوق.
– وسىدان بىرەر كۇن بۇرىن «استانا» فۋتبول كلۋبىنىڭ سەربيالىق جاس ويىنشىسى نەمانيا ماكسيموۆيچ جاستار اراسىنداعى الەم چەمپيونى اتاندى. فينالدا برازيليا قاقپاسىنا شەشۋشى گولدى سوقتى. سول گولدىڭ ارقاسىندا سەربيا جاستار قۇراماسى الەم چەمپپيونى اتاندى. وسى ويىنداعى ءبىرىنشى گول دا ماكسيموۆيچتىڭ پاسىنان كەيىن سوعىلدى. ەندى ونىڭ باعاسى وسەتىن شىعار؟
– ارينە، وسەدى. ال ول بىزگە ەكى جارىم جىلعا تيەسىلى. مىنە، ماكسيموۆيچتى ساتىپ، جاقسى پايدا تۇسىرۋگە، كوپ اقشا تابۋعا بولادى. ەندى ونى ساتىپ العىسى كەلەتەندەر كوبەيەدى. ال وزدەرىڭىز اقيقاتىن ايتىڭىزدارشى، سايان حاميتجانوۆ فۋتبولدان بىردەڭە تۇسىنە مە؟ ماكسيموۆيچتى تاپقان، وسىنداي تالانتتى جازباي تانىپ، قازاقستانعا الىپ كەلگەن – سايان!
سۇحباتتاسقان نۇرعازى ساسايەۆ
