ەلوردادا دارىلىك زاتتاردى رەتتەۋ جۇيەسىن باعالاۋ بويىنشا حالىقارالىق ساراپشىلاردىڭ قورىتىندى ميسسياسى باستالدى، دەپ حابارلايدى Dala news.
رەسمي اقپاراتقا سايكەس، استانادا دۇنيەجۇزىلىك دەنساۋلىق ساقتاۋ ۇيىمى (ددۇ) ساراپشىلارى قازاقستاننىڭ دارىلىك زاتتاردىڭ اينالىمىن ۇلتتىق رەتتەۋ جۇيەسىن باعالاۋ بويىنشا سوڭعى ساپارعا كىرىستى. ميسسيا Global Benchmarking Tool (GBT) جاھاندىق سالىستىرمالى باعالاۋ قۇرالى اياسىندا ءوتىپ جاتىر جانە ەلدىڭ رەتتەۋشى جۇيەسىنىڭ جەتىلۋ دەڭگەيىن ايقىندايتىن شەشۋشى كەزەڭ بولماق.
ميسسيا قورىتىندىسى بويىنشا قازاقستانعا جەتىلۋدىڭ ءۇشىنشى دەڭگەيىن بەرۋ ماسەلەسى قارالادى. بۇل مارتەبە ۇلتتىق رەتتەۋ تەتىكتەرىنىڭ حالىقارالىق ستاندارتتارعا سايكەستىگىن جانە ينستيتۋسيونالدىق تيىمدىلىگىنىڭ تۇراقتىلىعىن راستايدى.
قازىرگى ۋاقىتتا قازاقستان GBT جۇيەسى بويىنشا ەكىنشى جەتىلۋ دەڭگەيىندە. باعالاۋ جۇيەسى ءتورت دەڭگەيدەن تۇرادى. ددۇ دەرەكتەرىنە سايكەس، ءۇشىنشى جانە ءتورتىنشى دەڭگەيگە الەمنىڭ 36 ەلى قول جەتكىزگەن.
ءۇشىنشى دەڭگەيگە ءوتۋ دارىلىك زاتتاردىڭ ساپاسىن ۇلتتىق باقىلاۋ جۇيەسىنە دەگەن سەنىمدى ارتتىرۋ، وتاندىق فارماسيەۆتيكالىق ونىمدەردىڭ ەكسپورتتىق الەۋەتىن كەڭەيتۋ جانە سالاعا ينۆەستيسيا تارتۋ تۇرعىسىنان ستراتەگيالىق قادام رەتىندە قاراستىرىلادى
