بۇل تۋرالى ايماق باسشىسى مالىمدەدى. ايتا كەتۋ كەرەك، دانيال احمەتوۆ بۇگىن كەزەكتى رەت زىريان اۋدانىنا ات باسىن بۇرىپ، جاعدايدى جەكە ءوزى باقىلاپ قايتتى. قازىرگى تاڭدا مۇنداعى توعىز ەلدى مەكەندە سۋدىڭ بەتى قايتىپ، دەڭگەيى تۇسكەن.
قازىرگى تاڭدا اۋدانداعى جالپى 414 ءۇيدىڭ، 285-ىنەن سۋ كەتىپ، 129-ىندا ءتيىستى جۇمىستار جۇرگىزىلۋدە.
زىريان قالاسىنىڭ ەسكى بولىگىندە ءالى كۇنگە دەيىن 74 ءۇي سۋ استىندا تۇر. وبلىس اكىمى ولاردىڭ ءبارى-داعى الداعى تاڭدا تۇرۋعا جارامسىز دەپ تانىلۋى ىقتيمال دەگەن باستاپقى بولجامىن جەتكىزدى. سۋ دەڭگەيى 3 مەترگە جەتكەن ۋچاسكەدە بۇگىن قوسىمشا تاعى بىرنەشە سۋ سورعىش ناسوستار قويىلماق.
- بۇل جەردە 2 ملن.تەكشە مەترگە دەيىن سۋ جاتىر. ولاردى سورۋ ءۇشىن وتە قۋاتتى تەحنيكالار قاجەت. بۇگىن قوسىمشا تاعى ەكى ناسوس قوسامىز. ولار ساعاتىنا ەكى مىڭ تەكشە مەترگە دەيىن سۋ سورۋعا قابىلەتتى. وعان دەيىن ناسوس ستانساسىنىڭ جان-جاعىن قۇممەن بەكىتىپ، سۋدى سورۋ تۋرالى تاپسىرما بەرىلگەن بولاتىن. الايدا ول جۇمىس ءالى تولىق جۇزەگە اسپاعاندىقتان ەكى كۇن ىشىندە اۋدان اكىمدىگىنىڭ باسشىلىعىنا سۋدان تولىق تازارتۋ تۋرالى تاپسىرما بەرىلدى، - دەيدى دانيال احمەتوۆ.
بۇقتىرما وزەنىنىڭ ارناسىنداعى مۇزدى جارۋ جۇمىسى ءۇش كۇن بويى جۇرگىزىلدى.
وسى ۋاقىت ارالىعىندا 17 توننا جارىلعىش زاتتار قولدانىلدى. ناتيجەسىندە، سۋ دەڭگەيى 2،5 ەسەگە ازايىپ، تومەن ءتۇستى. سول كەزدەگى وزەكتى ماسەلە – مالييەۆسك اۋىلى مەن زۋبوۆسك كەنتىن تولىق سۋ باسىپ كەتۋ ءقاۋپىنىڭ الدى الىندى. بۇگىندە مالييەۆسكىدەگى 97، زۋبوۆسكىدەگى 114 ۇيدەن سۋ قايتىپ، تۇرعىندار باسپانالارىنا ورالۋدا.
- جالپى سانى 414 ۇيگە سۋ كىردى. بارلىق تۇرعىنداردىڭ شىعىنى ارنايى كوميسسيامەن ەسەپتەلىنەدى. ءقازىر قالادا 60 پاتەرلى جاڭا تۇرعىن ءۇيدىڭ قۇرىلىسى ءجۇرىپ جاتىر. سونىمەن قاتار، ەكىنشى دەڭگەيلى نارىقتا ساتىلىمعا قويىلعان باسپانالاردىڭ ەسەبى دايىندالۋدا. ايتارىم، دۇيسەنبىگە دەيىن ءۇي ماسەلەسىن شەشۋ جولى ناقتى بەلگىلى بولادى، - دەدى ايماق باسشىسى.
اۋداندارداعى ۇيلەردىڭ بۇگىنگى جاي-كۇيىمەن تانىسقان دانيال احمەتوۆ، ەۆاكۋاسيا پۋنكتەردە جاتقان تۇرعىندارمەن كەزدەستى.
ايتا كەتۋ كەرەك، بارلىق ەۆاكۋاسيالانعان زىرياندىقتار جاتار ورىن، كيىم-كەشەك، ءۇش ۋاقىت تاماقپەن قامتاماسىز ەتىلگەن.
«جاسالعان جاعدايعا كوڭىلدەرىڭىز تولىپ جاتىر ما؟» دەگەن وبلىس اكىمى ساۋالىنا اقساقالدار مەن اقجاۋلىقتى اجەلەر «ءتىپتى ءتورت ۋاقىت تاماق بەرەدى. جاقسى قاراپ جاتىر. كوڭىلىمىز توق» دەپ، جاۋاپ قايىردى.
الداعى تاڭدا كاتون-قاراعاي اۋدانىنداعى سەننوە ەلدى مەكەنى اۋماعىندا دا مۇز كەپتەلىسى تۋىنداۋ ءقاۋپى بار. ونداعى مۇزدى جارۋ ناۋقانىن ەرتەڭ باستاۋدى تاپسىردى دانيال احمەتوۆ.
جالپى، بىرەر كۇندە ءوڭىر بويىنشا كۇن رايى جىلىنىپ، تەمپەراتۋرا كورسەتكىشى 17 گرادۋسقا دەيىن كوتەرىلەدى دەپ كۇتىلۋدە. سول سەبەپتى ايماقتى سۋ الۋ ءقاۋپىنىڭ كەزەكتى تولقىنى باستالۋى ىقتيمال. ونىڭ الدىن-الۋ شارالارىنا جەرگىلىكتى بيلىك بارىنشا دايىندىق جۇرگىزۋدە.
شقو اكىمىنىڭ باسپا ءسوز قىزمەتى
سۋرەت: «شىعىس-اقپارات»
