حالىقپەن ونلايىن جۇزدەسۋدە دانيال احمەتوۆكە اياگوز اۋدانى، اقشي اۋىلىنان بايلانىسقا شىققان كوپبالالى انا ارايلىم ءتۇسىپجانوۆا كوپ جىلدار بويى شەشىمىن تاپپاي كەلە جاتقان ءۇي قۇجاتتارىنىڭ زاڭداستىرۋعا ىقپال ەتكەنى ءۇشىن العىس ءبىلدىردى.
ال، زايسان قالاسىنىڭ ارداگەر مايورى مانات دالابايەۆ اعىمداعى جىلدىڭ اقپان ايىندا گاز ماسەلەسىنىڭ شەشىمىن تاپقانى ءۇشىن وبلىس باسشىسىنا العىس ءبىلدىرىپ، نوۆاتوروۆ كوشەسىندەگى شىعىس قازاقستان وبلىسى پوليسيا دەپارتامەنتىنىڭ گوسپيتالى جابىلادى دەگەن سىبىس قانشالىقتى شىندىققا جاناساتىنىن سۇرادى. وسى رەتتە ارداگەردى مازالاعان سۇراققا شقو پد باستىعى ساعات مادييەۆ جاۋاپ بەردى:
– گوسپيتالدى ەشكىم جابايىن دەپ جاتقان جوق. كەرىسىنشە، عيماراتتى جوندەپ، كەرەكتى جابدىقتارمەن قامتاماسىز ەتىپ جاتىرمىز، – دەدى.
ونلاين كەزدەسۋگە كەلگەندەر اراسىندا وبلىستاعى قىسقى ءىرى دەمالىس بازالارىنىڭ بىرىندە جازاتايىم قايتىس بولعان قىزدىڭ اناسى ارايلىم بولتايەۆا دا بولدى. ەستەرىڭىزگە سالا كەتەيىك، سىنىپتاستارىمەن بىرگە دەمالىسقا بارعان 11 سىنىپ وقۋشىسى تىيىم سالىنعان جەردەن ستيۋبپەن سىرعاناپ، ومىرگە سايكەس كەلمەيتىن جاراقات الىپ، سالدارىنان كوز جۇمعان ەدى.
– مەنىڭ جالعىز قىزىم وسى دەمالىس ورنىندا قايتىس بولدى. دەمالىس ورنىنا جولدامانى مەكتەپ مۇعالىمدەرى ساتىپ العان. تۋريزم جانە سىرتقى بايلانىستار باسقارماسى باسشىسىنىڭ ايتۋىنشا، جولداما تۋريستىك ەمەس، ءبىراق ولارعا ليسەنزيا بەرىلىپتى. ليسەنزيا كۋرورتتىڭ قانداي ناقتى قىزمەتتەرىنە بەرىلگەن؟ – دەپ سۇراق قويدى ارايلىم بولتابايەۆا.
ايماق باسشىسى دانيال احمەتوۆتىڭ ايتۋىنشا، بۇل ماسەلەدە ولقىلىقتار ەكەنىن العا تارتتى.
– وكىنىشكە وراي، بۇگىندە «رۇقساتتار جانە حابارلامالار تۋرالى» ق ر زاڭىنا سايكەس تاۋ شاڭعىسى تراسسالارىن ورناتۋ جانە پايدالانۋ ليسەنزيالاناتىن قىزمەت ءتۇرى بولىپ تابىلمايدى. تۋريستىك سەكتوردىڭ بۇل تۇرىنە باقىلاۋ جوق. جەرگىلىكتى اتقارۋشى ورگاندار تۋرالى زاڭعا سايكەس، ءبىز وسى كاسىپتىك نىساندارىنىڭ ءورت قاۋىپسىزدىگى مەن سانيتارلىق جاعدايىن عانا تەكسەرە الامىز. سوندىقتان ءبىز ءقازىر تۋريستىك قىزمەتتىڭ بۇل ءتۇرى ليسەنزيالاناتىن بولۋى ءۇشىن ق ر ۇكىمەتىنە، ءتيىستى مينيسترلىككە قۇجات دايىندايمىز. تاۋ شاڭعىسى بازالارى ستاندارتتارعا ساي جانە ەڭ الدىمەن ءقاۋىپسىز بولۋى كەرەك، – دەپ قورىتىندىلادى شقو اكىمى دانيال احمەتوۆ.
ال دايىندالار قۇجاتتى ەكى جاق تاعى ءبىر مارتە كەزدەسىپ، ناقتى ۇسىنىستار رەتىن تالقىلاي پىسىقتايتىن بولادى.
شقو اكىمىنىڭ باسپا ءسوز قىزمەتى
