ونىڭ ايتۋىنشا، بۇگىنگى تاڭدا وڭىردە ءۇش اۋىسىمداعى جانە اپاتتىق جاعدايداعى مەكتەپتەر ماسەلەسى تولىقتاي شەشىمىن تاپقان. بيىل 129 مەكتەپكە جوندەۋ جۇمىستارىن جۇرگىزۋ، ال 2023 جىلعا دەيىن 5،5 مىڭ ورىنعا ارنالعان 7 مەكتەپ سالۋ جوسپارلانعان.
وبلىستاعى بارلىق ورتا ءبىلىم وردالارى ءىت سىنىپتارمەن جابدىقتالعان. بالالار Python تىلىندەگى باعدالامالاۋلار، Arduino Uno پلاتفورماسى ەنگەن، اقپاراتتىق تەحنولوگيالار بويىنشا جاڭا تەرەڭدەتىلگەن باعدارلامالاردى وقۋدا. جاڭا ءبىلىم بەرۋ باعدارلاماسىن ەنگىزۋ ءۇشىن 544 پەداگوگ قايتا وقىتىلدى. بۇل ءوز كەزەگىندە جەمىسىن بەرىپ، ءبىلىم ساپاسى جاراتىلىستانۋ پاندەرى بويىنشا 44-تەن 66 پايىزعا كوتەرىلدى.
كوپتىلدىلىك باعدارلاماسىنا فرانسۋز جانە نەمىس تىلدەرى ەنگىزىلدى. وبلىستىق ءبىلىم باسقارماسى الداعى ءۇش جىلدا 4 مىڭ پەداگوگتىڭ بىلىكتىلىگىن كوتەرۋدى جوسپارلاپ وتىر. ءتىل ماماندارىن قايتا وقىتۋ شەتەلدىك مامانداردى شاقىرۋ ارقىلى جۇزەگە اسىرىلماق.
ەرەكشە قاجەتتىلىگى بار بالالاردى وقىتۋ ءۇشىن بيىل 900 پەداگوگكە ارناپ كۋرستىق جۇمىستار جۇرگىزىلىپ، 19 عيمارات ولارعا ساي سايكەستەندىرىلەدى، 395 مەكتەپكە قاجەتتى قۇرىلعى الىنادى.
تەحنيكالىق جانە كاسىبي ءبىلىم بەرۋدە دە وڭدى وزگەرىستەر ورىن الدى. كوپ ۋاقىت بويى بۇل سالا قاراۋسىز قالىپ كەلگەن ەدى.
ەندى كاسىبي جانە تەحنيكالىق ءبىلىم بەرۋ سالاسى تولىقتاي جاڭعىرتىلۋدا. اتاپ ايتساق، جاڭا قۇزىرەت ورتالىقتارى اشىلىپ، كوللەدجدەر جاڭا قۇرىلعىلارمەن جابدىقتالۋدا، WorldSkills ستاندارتتارى ەنگىزىلۋدە.
جالپىلاي ايتقاندا، تەك قانا قۇرىلعىلارمەن جابدىقتاۋعا 3 ملرد. تەڭگە قارجى جۇمسالادى. ءۇش كوللەدجدىڭ بازاسىندا KazMinerals كومپانياسىمەن بىرلەسە وتىرىپ تاۋ-كەن سالاسى ماماندارىن دايارلايتىن قۇزىرەت ورتالىقتارى اشىلدى.
بيىلدان باستاپ 2022 جىل ارالىعىندا KazMinerals كومپانياسىنىڭ رەسەي فەدەراسياسىنىڭ چۋكوتكا اۆتونوميالىق وكرۋگىندەگى «بايمسكوە» كەن ورنىندا جۇمىس ىستەيتىن 4 مىڭ ماماندى وقىتۋ كوزدەلىپ وتىر.
اتالمىش جۇمىستاردىڭ جاقسى ناتيجەلەرى ءقازىردىڭ وزىندە كورىنىپ جاتىر. اتاپ ايتساق، كوللەدج وقۋشىلارى WorldSkills بويىنشا ۇلتتىق چەمپيوناتتا عانا ەمەس، سونداي-اق حالىقارالىق چەمپيوناتتا دا ەكى جىل قاتارىنان جۇلدەگەر اتانۋدا.
جوعارى ءبىلىم بەرۋ سالاسىندا دا ءبىرقاتار جۇمىستار اتقارىلۋدا. «بىلىكتى مامان» جوباسى بويىنشا ۋنيۆەرسيتەتتەرگە مامان دايارلاۋعا ءبىلىم گرانتتارى بولىنۋدە. ءۇش جىل ىشىندە مىڭ گرانت بولىنسە، ونىڭ 400 وتكەن جىلى بولىنگەن بولاتىن. بەس جىل ىشىندە بارلىعى 5 ملرد. تەڭگە تۇراتىن 1846 بيۋدجەتتىك ورىن قاراستىرىلادى. وسىلايشا، جوعارى ءبىلىمنىڭ قولجەتىمدىلىگى
2016 جىلمەن سالىستىرعاندا 48 پايىزدان 64 پايىزعا كوتەرىلىپ، شەتەلدىك وقۋ ورىندارىنا كەتۋشىلەر سانى ءۇش ەسەگە قىسقاردى.
تۇڭعىش پرەزيدەنت نۇرسۇلتان نازاربايەۆتىڭ «بەس الەۋمەتتىك باستاما» جوباسىن ىسكە اسىرۋ اياسىندا جوعارى وقۋ ورىندارى مەن كوللەدج ستۋدەنتتەرىنە ارناپ 4048 ورىندىق 10 جاتاقحانا سالۋ كوزدەلگەن. ءقازىردىڭ وزىندە سەمەيدەگى مەديسينالىق جانە ەلەكتروتەحنيكالىق كوللەدجدەردە 700 ورىندىق ەكى جاتاقحانا قولدانىسقا بەرىلگەن. قالعان بەسەۋىنىڭ، سونىڭ ىشىندە ەكەۋى مەملەكەتتىك-جەكەمەنشىك ارىپتەستىك اياسىندا سالىناتىن جاتاقحانالاردىڭ قۇرىلىسى بيىل باستالادى.
