ءۇرجار اۋدانىنا جۇمىس ساپارىمەن كەلگەن دانيال احمەتوۆ وسى سۇراقتى جەرگىلىكتى كاسىپكەرلەر مەن تۋريستىك سالانى دامىتۋعا جاۋاپتى قۇرىلىمدارعا توتەسىنەن قويدى.
الاكول جاعاجايىن اباتتاندىرۋ جۇمىسى 2016 جىلدان بەرى ۇزبەي جۇرگىزىلۋدە. وسى ۋاقىتتا جاعاجاي اۋماعى ايتارلىقتاي كەڭىگەن.
ءازىر الاكولدە اۋناپ-قۋناپ قايتاتىن قوناقتارعا 175 دەمالىس ءۇيى، ەكى قوناق ءۇي، 29 دۇكەن، 56 دۇڭگىرشەك، 10 كافە، ءتورت بار، ەكى مەيرامحانا، 8 اسحانا جانە ەكى ءدارىحانا مەن اكۋاپارك قىزمەت كورسەتەدى.
احمەتوۆتىڭ ايتۋىنشا كەلەسى جىلى الاكولدەگى دەمالىستىڭ دەڭگەيىن كوتەرەتىن بىرنەشە ءىرى ينفراقۇرىلىمدىق جوبالاردىڭ ىرگەتاسى قالانباق. ايماق باسشىسى وسى ورايدا شاعىن جانە ورتا بيزنەس وكىلدەرى ءوز مىندەتتەرىن ورىنداپ، سالىق تولەۋدەن جالتارماۋعا ءتيىس ەكەنىن ەسكەرتىپ ءوتتى.
شىعىس قازاقستان بويىنشا مەملەكەتتىك كىرىستەر دەپارتامەنتى باسشىنىڭ ورىنباسارى ەرجان كىتانوۆ شىلدەنىڭ العاشقى شيرەگىندە شاعىن جانە ورتا بيزنەسكە تەكسەرۋگە جۇرگىزىلگەنىن، ناتيجەسىندە «كولەڭكەلى» تابىس تاۋىپ وتىرعان 38 كاسىپكەردىڭ انىقتالعانىن، 11 دەمالىس ايماعىنىڭ تىركەۋگە تۇرعانىن تىلگە تيەك ەتتى.
– بىلتىر كاسىپكەرلەر سالىعىنان اۋداندىق بيۋدجەتكە 67،5 ملن تەڭگە ءتۇستى. بيىل سالىقتان تۇسكەن ءتۇسىم 100 ملن-عا جەتپەك.
ءالى دە بولسا تابىسى تۋرالى مالىمەتتى بۇرمالاپ، سالىق تولەۋدەن جالتاراتىن دەمالىس ايماعىنىڭ قوجايىندارى بار. ءبىز بارشا كاسىپكەرلەرگە ونلاين-باقىلاۋ كاسسالىق ماشىنەسىن ورناتۋدى ەسكە سالامىز، – دەدى ەرجان كىتانوۆ.
الاكول جاعاجايىن اباتتاندىرۋ ءۇشىن ارنايى جۇمىس توبى قۇرىلعان. ءۇرجار اكىمى سەرىك زاينۋلدين 30 ملرد تەڭگەگە باعالانعان جوبالار جوسپارى جاسالعانىن ايتتى.
مەردىگەرلەر ءبىرىنشى كەزەكتە جاعاجاي اۋماعىن اباتتاندىرۋعا باسىمدىق بەرمەك. الاكول جاعاجايى «اقتاۋتەڭىزپورتىنىڭ» تاجىريبەسىن نازارعا الىپ، جاڭاراتىن بولادى.
قۋات كوزى تۇراقتى تارالۋى ءۇشىن ماقانشى اۋىلىنان باستاپ كوكتولعا دەيىنگى ارالىقتا قۋاتتىلىعى 110 كۆت ەلەكتر جەلىسى جۇرگىزىلەدى.
ءۇرجار اۋەجايىنداعى ۇشاقتار ۇشىپ-قوناتىن جولاق تا كۇردەلى جوندەۋدەن وتەدى. جوبا نەگىزىندە اۋەجاي جولاعىنىڭ ۇزىندىعى 2100 مەترگە، كولدەنەڭى 45 مەترگە دەيىن ۇلعايماق. ساعاتىنا 70 جولاۋشىعا دەيىن قابىلدايتىن جاڭا تەرمينالى جانە سالىنادى.
جاڭارعان اۋەجاي الداعى ۋاقىتتا 70-80 جولاۋشى تاسىمالدايتىن ۇشاقتاردى قابىلدايتىن بولادى.
– جاعاجايدى اباتتاندىرۋعا ەكى جىلدا قىرۋار قارجى جۇمسادىق. الداعى ءتورت جىلدا بۇعان جۇمسالاتىن قاراجاتتى ۇلعايتا تۇسەمىز. الاكولگە ءوز جەرلەستەرىمىز عانا ەمەس، الىس-جاقىن شەتەلدەردەن دە تۋريستەر كەلىپ، جايلى دەمالىپ قايتقانىن قالايمىز. بولاشاقتا ەمدىك سۋدى قۇبىر ارقىلى تاسىمالدايتىن اۆستريا تاجىريبەسىنە سۇيەنىپ، جىل ون ەكى اي جۇمىس ىستەيتىن ەمدىك-ساۋىقتىرۋ كەشەنىن سالامىز.
ءازىر ەڭ باستى ماسەلە – جول. وسكەمەن – قالباتاۋ – سەمەي – اياگوز جولىن جوندەۋ جۇمىستارى الدىمىزداعى ەكى جىلدا اياقتالادى. قابانباي اۋىلىنان باستاپ الاكول كولىنە دەيىن ۇزىندىعى 2،6 شاقىرىم ۆەلوجول توسەلەدى.
كاسىپكەرلەرگە مەملەكەت بارىنشا كومەكتەسۋدە. سوندىقتان كاسىپكەرلەر دە سالىق تولەۋگە جاۋاپپەن قاراۋى قاجەت. بۇدان بولەك دەمالىس ورنىندا بارلىق سانيتارلىق جانە ءورت قاۋىپسىزدىك تالاپتارى ساقتالعانىنا ەرەكشە نازار اۋدارعاندارى ءجون، – دەدى جيىندى تۇيىندەگەن دانيال احمەتوۆ.
