Citigroup ساراپشىلارى Brent ماركالى مۇناي باعاسىنىڭ قىسقا مەرزٸمدٸ بولجامىن جارييالادى. وعان سەيكەس, جۋىق ارادا "قارا التىننىڭ" بٸر باررەلٸ 74 دوللاردان 70 دوللارعا دەيٸن تٶمەندەمەك. ال 2025 جىلدىڭ بٸرٸنشٸ توقسانىندا بۇل باعا 65 دوللاردى دا كٶرسەتۋٸ ىقتيمال, دەپ حابارلايدى Dalanews.kz.
Citigroup ساراپشىلارىنىڭ بۇل بولجامىمەن MarketWatch باسىلىمى بٶلٸستٸ.
يران مەن يزرايل اراسىنداعى قاقتىعىستىڭ كەڭ اۋقىمدى سيپات الۋى جەنە مۇناي ينفراقۇرىلىمدارىنا ەۋەدەن سوققى جاسالۋى سىندى ساراپشىلار بولجاعان جاعىمسىز ستسەناريدٸڭ ورىن المايتىندىعىنا كٶز جەتكەن سوڭ حالىقارالىق نارىقتاعى باعا قۇلدىراي جٶنەلگەن. مۇنى بٸز الدىندا جازعان بولاتىنبىز. ەندٸ وسى تٶمەندەگەن باعا, حالىقارالىق ساراپشىلاردىڭ پٸكٸرٸنشە, قايتا بوي كٶتەرۋٸ ەكٸتالايعا ۇقسايدى.
Citi ساراپشىلارىنىڭ بولجامىنشا, Brent ماركالى مۇناي باعاسى جىل سوڭىنا دەيٸن 74 دوللاردان 70 دوللارعا دەيٸن تٶمەندەۋٸ مٷمكٸن.
"ال 2025 جىلدىڭ بٸرٸنشٸ توقسانىندا Brent ماركالى مۇنايدىڭ بٸر باررەلٸ ورتا ەسەپپەن 65 دوللار, ەكٸنشٸ توقسانىندا 60 دوللار بولادى" دەگەن بولجامدى ساراپشىلار راستايدى. دەگەنمەن حالىقارالىق بانك مۇناي باعاسىنىڭ 120 دوللارعا دەيٸن بٸر-اق ىتقۋىن جوققا شىعارمايدى, الايدا ولار مۇنداي جاعدايدىڭ ورىن الۋ ىقتيمالدىعىن 10%-دان از دەپ باعالايدى, دەپ جازادى MarketWatch.
ايتا كەتسەك, يزرايل 26 قازانعا قاراعان تٷنٸ يراننىڭ ەسكەري نىساندارىنا ەۋەدەن شابۋىل جاسادى. بۇل ولاردىڭ 1 قازاندا يران ەۋە كٷشتەرٸنٸڭ ەلگە جاساعان سوققىسىنا بەرگەن جاۋابى بولدى. يزرايلدٸڭ يراننىڭ مۇناي نىساندارىنا شابۋىل جاساماۋى, سونداي-اق ونىڭ كەڭ اۋقىمدى ماسشتابقا ۇلاسپاۋى ايماقتاعى قاقتىعىستىڭ ٶرشۋٸ ىقتيمالدىلىعىنا قاتىستى ينۆەستورلار مەن نارىقتاردىڭ الاڭداۋشىلىعىن بەلگٸلٸ بٸر دەڭگەيدە باستى.
مۇناي باعاسىنىڭ قۇلدىراۋى, ەرينە قازاقستان سىندى بيۋدجەتٸ شيكٸزات تابىسىنا بايلانعان مەملەكەتتەرگە وڭاي سوقپايدى. مۇندايدا ٷكٸمەت الداعى جىلدارعا جوسپارلانعان رەسپۋبليكالىق بيۋدجەتتە قاراستىرىلعان تسيفرلاردى قايتا قاراستىرۋعا, وندا دا قىسقارتۋعا مەجبٷر بولادى. ال قازاقستاننىڭ 2025-2029 جىلدارعا ارنالعان رەسپۋبليكالىق بيۋدجەتٸ "مۇنايدىڭ بٸر باررەلٸ 75 دوللار دەڭگەيٸندە بولادى" دەگەن ستسەناريي بويىنشا ەسەپتەلگەن بولاتىن. بۇل تۋرالى مەجٸلٸس الدىندا ۇلتتىق ەكونوميكا ۆيتسە-مينيسترٸ ازامات امرين ايتقان ەدٸ...
PS Brent ماركالى مۇناي باعاسى كەشە قۇلدىراۋىن بەسەڭدەتتٸ,بٸراق اتالعان نارىقتاعى احۋال بٷگٸن-ەرتەڭ جاقسارا قويمايتىنىن بايقاتادى. لوندونداعى ICE Futures بيرجاسىندا Brent سورتىنىڭ بٸر باررەلٸ 72,24 دوللاردى قۇرادى, بۇل بٸر كٷن بۇرىنعى ساۋدا-ساتتىقتىڭ قورىتىندى قۇنىنان 3,81 دوللارعا (5,01%) تٶمەن. WTI مۇنايىنىڭ بٸر باررەلٸ نيۋ-يورك تاۋار بيرجاسىنىڭ (NYMEX) ساۋدا-ساتتىعىندا 67,96 دوللارعا دەيٸن تٶمەندەپ, ينۆەستورلاردى ويلاندىرىپ قويدى.
