Citigroup sarapshylary Brent markaly munai baǵasynyń qysqa merzimdi boljamyn jariialady. Oǵan sáikes, jýyq arada "qara altynnyń" bir barreli 74 dollardan 70 dollarǵa deiin tómendemek. Al 2025 jyldyń birinshi toqsanynda bul baǵa 65 dollardy da kórsetýi yqtimal, dep habarlaidy Dalanews.kz.
Citigroup sarapshylarynyń bul boljamymen MarketWatch basylymy bólisti.
Iran men Izrail arasyndaǵy qaqtyǵystyń keń aýqymdy sipat alýy jáne munai infraqurylymdaryna áýeden soqqy jasalýy syndy sarapshylar boljaǵan jaǵymsyz stsenaridiń oryn almaityndyǵyna kóz jetken soń halyqaralyq naryqtaǵy baǵa quldyrai jónelgen. Muny biz aldynda jazǵan bolatynbyz. Endi osy tómendegen baǵa, halyqaralyq sarapshylardyń pikirinshe, qaita boi kóterýi ekitalaiǵa uqsaidy.
Citi sarapshylarynyń boljamynsha, Brent markaly munai baǵasy jyl sońyna deiin 74 dollardan 70 dollarǵa deiin tómendeýi múmkin.
"Al 2025 jyldyń birinshi toqsanynda Brent markaly munaidyń bir barreli orta eseppen 65 dollar, ekinshi toqsanynda 60 dollar bolady" degen boljamdy sarapshylar rastaidy. Degenmen halyqaralyq bank munai baǵasynyń 120 dollarǵa deiin bir-aq ytqýyn joqqa shyǵarmaidy, alaida olar mundai jaǵdaidyń oryn alý yqtimaldyǵyn 10%-dan az dep baǵalaidy, dep jazady MarketWatch.
Aita ketsek, Izrail 26 qazanǵa qaraǵan túni Irannyń áskeri nysandaryna áýeden shabýyl jasady. Bul olardyń 1 qazanda Iran áýe kúshteriniń elge jasaǵan soqqysyna bergen jaýaby boldy. Izraildiń Irannyń munai nysandaryna shabýyl jasamaýy, sondai-aq onyń keń aýqymdy masshtabqa ulaspaýy aimaqtaǵy qaqtyǵystyń órshýi yqtimaldylyǵyna qatysty investorlar men naryqtardyń alańdaýshylyǵyn belgili bir deńgeide basty.
Munai baǵasynyń quldyraýy, árine Qazaqstan syndy biýdjeti shikizat tabysyna bailanǵan memleketterge ońai soqpaidy. Mundaida Úkimet aldaǵy jyldarǵa josparlanǵan respýblikalyq biýdjette qarastyrylǵan tsifrlardy qaita qarastyrýǵa, onda da qysqartýǵa májbúr bolady. Al Qazaqstannyń 2025-2029 jyldarǵa arnalǵan respýblikalyq biýdjeti "munaidyń bir barreli 75 dollar deńgeiinde bolady" degen stsenarii boiynsha eseptelgen bolatyn. Bul týraly Májilis aldynda Ulttyq ekonomika vitse-ministri Azamat Amrin aitqan edi...
PS Brent markaly munai baǵasy keshe quldyraýyn báseńdetti,biraq atalǵan naryqtaǵy ahýal búgin-erteń jaqsara qoimaitynyn baiqatady. Londondaǵy ICE Futures birjasynda Brent sortynyń bir barreli 72,24 dollardy qurady, bul bir kún burynǵy saýda-sattyqtyń qorytyndy qunynan 3,81 dollarǵa (5,01%) tómen. WTI munaiynyń bir barreli Niý-Iork taýar birjasynyń (NYMEX) saýda-sattyǵynda 67,96 dollarǵa deiin tómendep, investorlardy oilandyryp qoidy.
