Prezident farmatsevtikalyq baqylaýdy kúsheitýge baǵyttalǵan zańǵa qol qoidy. Ashat Aimaǵambetovtiń aitýynsha, jańa túzetýler qaýipti dári-dármekterdi satylymnan jedel alyp tastaýǵa jáne olardyń sapasyn baqylaýdy kúsheitýge múmkindik beredi., dep habarlaidy dalanews.kz.
Qazaqstanda sapasyz jáne jalǵan dári-dármekterge qatysty baqylaý kúsheitiledi. Bul týraly Ashat Aimaǵambetov málimdedi. Onyń aitýynsha, Memleket basshysy farmatsevtikalyq baqylaýdy kúsheitýge baǵyttalǵan, depýtattardyń avtorlyq túzetýleri engizilgen zańǵa qol qoiǵan.
«Adam dárihanadan dári satyp alǵanda, "bul túpnusqa ma, sapasy qandai, densaýlyqqa qaýipti emes pe?" dep kúmándanbaýy kerek. Memleket onyń qaýipsizdigin aldyn ala teksergenine senimdi bolýy tiis», – dedi eks-depýtat.
Aimaǵambetovtiń sózinshe, osyǵan deiin tekserý barysynda qaýipti dári-dármek anyqtalsa da, zań buzýshynyń qyzmetin toqtatý tek sot sheshimi arqyly júzege asyrylatyn. Sonyń saldarynan qaýipti ónimder aptalap, tipti ailap dárihana sórelerinde qalyp kelgen.
«Eger jalǵan nemese sapasyz dári-dármek anyqtalsa, uzaqqa sozylatyn sot protsesiniń aiaqtalýyn kútpei-aq, zań buzýshynyń qyzmetin toqtatyp, birden tergep-tekserýdi bastaýǵa bolady. Buǵan deiin qaýipti ónim birneshe ai boiy satylymda tura beretin. Endi tiisti shara zań buzýshylyq anyqtalǵan kúni-aq qabyldanýǵa tiis», – dedi ol.
Ol Densaýlyq saqtaý ministrliginiń deregine súienip, zańsyz satylǵan dári-dármek kólemi aitarlyqtai artqanyn aitty.
«2022 jyly zańsyz satylǵan ónimniń 151 ataýy anyqtalsa, 2025 jyly bul kórsetkish 21 myńnan astam birlikke jetken», – dedi Aimaǵambetov.
Sondai-aq ol dárilik zattardy tańbalaý júiesi tegin beriletin dárilerge qatysty zańsyz shemalardy anyqtaýǵa múmkindik bergenin atap ótti.
«Memleket patsientter úshin satyp alǵan tegin dárilerdiń bir qaptamasy eki ret esepten shyǵarylǵan jaǵdailar bolǵan. Bul dáriniń óndirýshiden naqty patsientke deiingi búkil jolyn baqylaýdyń qanshalyqty mańyzdy ekenin kórsetti», – dedi Aimaǵambetov.
Zańdaǵy taǵy bir mańyzdy jańalyq – endi dári sapasyn tekserýge arnalǵan úlgilerdi memlekettik organdar ózderi irikteidi.
«Buǵan deiin farmatsevtikalyq baqylaý organy satylymdaǵy dárini óz betinshe alyp, zerthanaǵa jibere almaityn. Ol óndirýshige júginýge májbúr edi. Al óndirýshi tekserýshilerge qai partiiany beretinin is júzinde ózi sheshetin. Bul stýdentke emtihanda jaýabyn jaqsy biletin biletti ózine tańdatýmen birdei», – dedi Ashat Aimaǵambetov.
Onyń aitýynsha, bul olqylyqty Dúniejúzilik densaýlyq saqtaý uiymy men Joǵary aýditorlyq palata da buǵan deiin atap ótken.
«Túzetýlerdiń máni qarapaiym: eger dári adam densaýlyǵyna ziian keltirýi múmkin bolsa, memleket sot sheshimin birneshe ai kútpei, ony sóreden dereý alyp tastaýy kerek. Óitkeni densaýlyq máselesinde árbir keshikken kúnniń ózi – qaýip. Adamdardyń densaýlyǵy men qaýipsizdigi árqashan birinshi orynda turýǵa tiis», – dep túiindedi Aimaǵambetov.
