ايەلىن ءولتىردى دەپ ايىپتالىپ وتىرعان ەكس-مينيستر قۋاندىق بيشىمبايەۆتىڭ ءىسى بويىنشا سوت وتىرىسى جالعاسىپ جاتىر. سوت وتىرىستارى بارىسىندا بىرنەشە رەت كورىكپەل تاقىرىبى كوتەرىلدى. ەندى سول كورىكپەل كۋاگەر رەتىندە سوت وتىرىستارىنا قاتىسۋى مۇمكىن، - دەپ حابارلايدى Dalanews.kz.
سوتالدى تەرگەۋ بارىسىندا وقيعا بولعان كۇنى قۋاندىق بيشىمبايەۆ حابارلاسقان كورىكپەل انىقتالعان. بۇل تۋرالى جابىرلەنۋشى تاراپتىڭ ادۆوكاتى جاننا ورازباحوۆا مالىمدەدى.
"تەرگەۋ ورگاندارى كورىپكەلدى انىقتاپ، جاۋاپ الدى. ول تىزىمدە (كۋاگەرلەر - ەسك.) بار"، - دەدى جابىرلەنۋشىلەردىڭ ادۆوكاتى جاننا ورازباحوۆا AIRAN-عا بەرگەن سۇحباتىندا.
ايتا كەتەيىك، قۋاندىق بيشىمبايەۆتىڭ سوتىندا بىرنەشە رەت ەكستراسەنستەر تاقىرىبى كوتەرىلدى. العاشىندا جابىرلەنۋشى تاراپ وكىلى بيشىمبايەۆ نۇكەنوۆانى ەكستراسەنستەرگە ءماجبۇرلى تۇردە اپارعانىن مالىمدەدى.
"مەنىڭ بىلۋىمشە، قۋاندىق ۇنەمى بالگەرلەرگە، ەكستراسەنتەرگە بارىپ جۇرگەن. سالتاناتپەن كەزدەسكەنگە دەيىن دە قانداي دا ءبىر سۇراقتارمەن جۇگىنىپ وتىرعان. بالگەر "ءيا، سەندەردە ءبارى جاقسى بولادى، ول سەنى جاقسى كورىپ قالادى" دەگەن. ماعان ايتقان كۇنى سالتاناتتى الا بارعان... سالتانات تا بيشىمبايەۆ ءارتۇرلى سۇراقپەن بالگەرلەرگە ءجيى جۇگىنگەنىن ايتتى"، - دەدى ايتبەك امانگەلدى.
كەيىن بيشىمبايەۆتىڭ ءوزى دە سالتانات قينالىپ جاتقاندا جەدەل جاردەمگە ەمەس، بالگەرگە حابارلاسقانىن ايتتى.
"ۇيىقتاپ قالدىق، ساعات 13:30-دا ونى وياتا باستادىم. ول ويانعان جوق. سول جاق بەتىندە كوگەرگەن ۇلكەن ءىز بارى جانە مۇرنى ىسىگەنى بايقالدى. مەن قاتتى ۋايىمداپ كەتتىم. تانىس بالگەرگە قوڭىراۋ شالدىم. وعان ويانعانباعانىن، كوگەرگەن جەرىن ايتتىم. ول 10 مينۋتتان كەيىن قايتا قوڭىراۋ شالۋىمدى ءوتىندى. مەن قايتا قوڭىراۋ شالدىم، ول "جاي عانا شارشاعان" دەدى. مەنىڭ جۇرەگىم ورنىنا ءتۇستى"، - دەدى ايىپتالۋشى.
ايتا كەتەيىك، بۇعان دەيىن بەلگىلى ساياساتتانۋشى دوسىم ساتبايەۆ قۋاندىق بيشىمبايەۆتىڭ سوتتا ەكستراسەنستەر تۋرالى ايتقانى قازاقستاندىق شەنەۋنىكتەردىڭ قانداي ەكەنىن كورسەتىپ بەرگەنىن مالىمدەدى.
ساياساتتانۋشى ساتبايەۆ بيشىمبايەۆتىڭ ەكستراسەنستەر تۋرالى اڭگىمەسى وڭتۇستىك كورەيانىڭ ءۇشىنشى پرەزيدەنتى پاك كىن حە تۇرمەدە بولعان كەزدەگى وقيعانى ەسكە تۇسىرەتىنىن جەتكىزدى.
"ول سىبايلاس جەمقورلىق جاسادى دەپ ايىپتالدى. سونىمەن قاتار، كەيىن سىرتقى جانە ىشكى ساياسات تۋرالى اقىماق شەشىمدەرىن كوبىنە كورىپكەلدەرمەن، باقسىلارمەن جانە بالگەرلەرمەن كەڭەسىپ قابىلداعانى بەلگىلى بولدى. سولاردىڭ ءبىرى ونىڭ ەڭ جاقىن دوسى دا بولعان"، - دەپ جازدى ساتبايەۆ.
"ءبىراق بيشىمبايەۆ سياقتى ادامدار دا سول سەكىلدى ەلدى باسقارۋعا تىرىستى. تۇڭعىش پرەزيدەنتتىڭ تۇسىندا سول سياقتىلار ەلدىڭ كادرلىق رەزەرۆىن جاڭا ساياسي "ەليتا" رەتىندە بەلسەندى تۇردە پيار جاسادى.
بيۋدجەت ەسەبىنەن شەتەلدە وقىتتى. بىرەۋىنە لاۋازىم بەردى، بىرەۋىنە مەدال تاقتى. ال ولار كابينەتتەرىندە وزدەرىن قۇداي ساناپ وتىردى"، - دەدى ساياساتتانۋشى.
سونىمەن قاتار، ساتبايەۆ مۇنداي تيپتەگى ادامدار بىرەۋلەرگە قاجەت بولعانىن، ويتكەنى ولار ار-ۇياتسىز، نامىسسىز ەكەنىن جەتكىزدى. ياعني ءبىر جاعىنان قاراساڭ، ءبىلىمى بار سەكىلدى، ءبىراق ادامي قۇندىلىقتارى جوق.
"شاماسى، قۇرالدارى جاقسى بولدى. دۋا جاسادى. قارا ماگيامەن اينالىستى. كورىپكەلدەردىڭ ءتىزىمىن جاسادى. تاعى قانشا ادام ديپلومدارىمەن، جالعان ينتەللەكتۋالدى تۇلعالارىمەن وسىلاي شەنەۋنىك كابينەتتەرىنىڭ تاساسىندا قالىپ قويدى؟ ءبىراق ولاردىڭ جۇرەكتەرى تازا ەمەس. ...كەيبىرەۋلەرى الەۋمەتتىك جاعىنان تومەن كەز كەلگەن ادامدى قورلاۋعا، بالاعاتتاۋعا دايىن"، - دەپ جازدى ول.
