Áielin óltirdi dep aiyptalyp otyrǵan eks-ministr Qýandyq Bishimbaevtyń isi boiynsha sot otyrysy jalǵasyp jatyr. Sot otyrystary barysynda birneshe ret kórikpel taqyryby kóterildi. Endi sol kórikpel kýáger retinde sot otyrystaryna qatysýy múmkin, - dep habarlaidy Dalanews.kz.
Sotaldy tergeý barysynda oqiǵa bolǵan kúni Qýandyq Bishimbaev habarlasqan kórikpel anyqtalǵan. Bul týraly jábirlenýshi taraptyń advokaty Janna Orazbahova málimdedi.
"Tergeý organdary kóripkeldi anyqtap, jaýap aldy. Ol tizimde (kýágerler - esk.) bar", - dedi jábirlenýshilerdiń advokaty Janna Orazbahova AIRAN-ǵa bergen suhbatynda.
Aita keteiik, Qýandyq Bishimbaevtyń sotynda birneshe ret ekstrasenster taqyryby kóterildi. Alǵashynda jábirlenýshi tarap ókili Bishimbaev Núkenovany ekstrasensterge májbúrli túrde aparǵanyn málimdedi.
"Meniń bilýimshe, Qýandyq únemi balgerlerge, ekstrasenterge baryp júrgen. Saltanatpen kezdeskenge deiin de qandai da bir suraqtarmen júginip otyrǵan. Balger "iá, senderde bári jaqsy bolady, ol seni jaqsy kórip qalady" degen. Maǵan aitqan kúni Saltanatty ala barǵan... Saltanat ta Bishimbaev ártúrli suraqpen balgerlerge jii júgingenin aitty", - dedi Aitbek Amangeldi.
Keiin Bishimbaevtyń ózi de Saltanat qinalyp jatqanda jedel járdemge emes, balgerge habarlasqanyn aitty.
"Uiyqtap qaldyq, saǵat 13:30-da ony oiata bastadym. Ol oianǵan joq. Sol jaq betinde kógergen úlken iz bary jáne murny isigeni baiqaldy. Men qatty ýaiymdap kettim. Tanys balgerge qońyraý shaldym. Oǵan oianǵanbaǵanyn, kógergen jerin aittym. Ol 10 minýttan keiin qaita qońyraý shalýymdy ótindi. Men qaita qońyraý shaldym, ol "jai ǵana sharshaǵan" dedi. Meniń júregim ornyna tústi", - dedi aiyptalýshy.
Aita keteiik, buǵan deiin belgili saiasattanýshy Dosym Sátbaev Qýandyq Bishimbaevtyń sotta ekstrasenster týraly aitqany qazaqstandyq sheneýnikterdiń qandai ekenin kórsetip bergenin málimdedi.
Saiasattanýshy Sátbaev Bishimbaevtyń ekstrasenster týraly áńgimesi Ońtústik Koreianyń úshinshi prezidenti Pak Kyn He túrmede bolǵan kezdegi oqiǵany eske túsiretinin jetkizdi.
"Ol sybailas jemqorlyq jasady dep aiyptaldy. Sonymen qatar, keiin syrtqy jáne ishki saiasat týraly aqymaq sheshimderin kóbine kóripkeldermen, baqsylarmen jáne balgerlermen keńesip qabyldaǵany belgili boldy. Solardyń biri onyń eń jaqyn dosy da bolǵan", - dep jazdy Sátbaev.
"Biraq Bishimbaev siiaqty adamdar da sol sekildi eldi basqarýǵa tyrysty. Tuńǵysh prezidenttiń tusynda sol siiaqtylar eldiń kadrlyq rezervin jańa saiasi "elita" retinde belsendi túrde piar jasady.
Biýdjet esebinen shetelde oqytty. Bireýine laýazym berdi, bireýine medal taqty. Al olar kabinetterinde ózderin Qudai sanap otyrdy", - dedi saiasattanýshy.
Sonymen qatar, Sátbaev mundai tiptegi adamdar bireýlerge qajet bolǵanyn, óitkeni olar ar-uiatsyz, namyssyz ekenin jetkizdi. Iaǵni bir jaǵynan qarasań, bilimi bar sekildi, biraq adami qundylyqtary joq.
"Shamasy, quraldary jaqsy boldy. Dýa jasady. Qara magiiamen ainalysty. Kóripkelderdiń tizimin jasady. Taǵy qansha adam diplomdarymen, jalǵan intellektýaldy tulǵalarymen osylai sheneýnik kabinetteriniń tasasynda qalyp qoidy? Biraq olardyń júrekteri taza emes. ...Keibireýleri áleýmettik jaǵynan tómen kez kelgen adamdy qorlaýǵa, balaǵattaýǵa daiyn", - dep jazdy ol.
