بيشىمبايەۆ ىدىس-اياق، تاماعىمەن بىرگە ۇستەلدى توڭكەرىپ جىبەرگەن - مارقۇمنىڭ اعاسى

ساعىنىش سارداروۆا 29 ناۋ. 2024 13:19 3036

سالتانات نۇكەنوۆانىڭ اعاسى ايتبەك امانگەلدى سوت پروسەسى بارىسىندا قۋاندىق بيشىمبايەۆ نە ءۇشىن وتباسىندا بىرنەشە رەت جانجال شىعارعانىن ايتتى، - دەپ حابارلايدى Dalanews.kz.

بۇگىن بۇرىنعى ۇلتتىق ەكونوميكا ءمينيسترى قۋاندىق بيشىمبايەۆقا قاتىستى سوت وتىرىسى ءوتىپ جاتىر. سوت وتىرىسى جابىرلەنۋشى تاراپتان جاۋاپ الۋدان باستالدى. سالتانات نۇكەنوۆانىڭ اعاسى ايتبەك امانگەلدى سوتتا ءسوز سويلەدى.

ايتبەك امانگەلدى قۋاندىق بيشىمبايەۆ پەن سالتانات نۇكەنوۆانىڭ اراسىنداعى ءبىرىنشى جانجال BAU مەيرامحاناسىنىڭ قىزمەتكەرلەرىنە قاتىستى بولعانىن ايتتى.

"قۋاندىق مەيرامحانا قىزمەتكەرلەرىمەن وتە دورەكى سويلەسكەن. سوندىقتان جانجال باستالعان"، - دەدى ول.

كەلەسى جانجال 31 جەلتوقساندا بولعان. ايتبەك امانگەلدىنىڭ ايتۋىنشا، سالتانات اعاسىن بيشىمبايەۆتار وتباسىمەن بىرگە جاڭا جىلدى قارسى الۋعا شاقىرعان. ايتبەك امانگەلدى سالتاناتتىڭ قاتتى قوبالجىپ جۇرگەنىن كورگەن. كەيىن ۇيگە وسى ءىس بويىنشا سوتتالۋشى. ياعني قۋاندىق بيشىمبايەۆتىڭ نەمەرە ءىنىسى باقىتجان بايجانوۆ جۇبايىمەن بىرگە قوناققا كەلگەن.

"ەكى تۋىسى كەلدى، ولار شاقىرىلماعان جانە سايكەسىنشە (بيشىمبايەۆتار - ەسك.) ولاردىڭ كەلۋىنە دايىندالماعان. مەنىڭ بىلۋىمشە، ول سوتتالۋشى باقىتجان بايجانوۆ پەن ايەلى بولدى. ولار قۋاندىق پەن سالتاناتقا جاڭاجىلدىق سىيلىق اكەلدى. سالتانات ولارعا دا سىيلىق بەرگىسى كەلدى. ول قۋاندىقتان جاڭا جىلعا سىيلىق العان. ال ساعات 12-دە قۋاندىق سالتاناتقا تاعى قوسىمشا ءاتىر سىيلاعىسى كەلگەن"، - دەدى ايتبەك امانگەلدى.

ونىڭ ايتۋىنشا، جانجالدىڭ سەبەبى سالتانات وسى ءاتىردى قوناقتارعا سىيلاۋى بولعان.

"قۋاندىق جانجال باستادى. "مەنىڭ سىيلىقتارىمدى يەمدەنۋگە قانداي قۇقىقتارىڭ بار؟ ولاردى مەن ساتىپ الدىم. مەن سىيلايمىن" دەدى. اتا-اناسى وعان ەسكەرتۋ جاسادى. ءبىراق ول اتا-اناسىنا ارالاسپاۋىن ەسكەرتىپ، دورەكى تۇردە جاۋاپ بەردى. ءاكەسىنە: "بارىنە سەن كىنالىسىڭ. سەن بۇكىل ءومىرىمدى قۇرتتىڭ، انامنىڭ دا ءومىرىن قۇرتتىڭ" دەدى. 15 مينۋتتا ول پاتەردەن شىعىپ كەتتى"، - دەپ ەسكە الدى سالتاناتتىڭ اعاسى.

ايتبەك امانگەلدىنىڭ سوزىنشە، مەرەكەلىك داستارحانعا بيشىمبايەۆتىڭ بالالارى دا كەلگەن. ال قۋاندىق ۇيگە قايتا كىرگەن كەزدە بالالار جاڭاجىلدىق سىيلىقتاردى اشا باستاعانىن كورگەن.

"تۇنگى 12-دەن كەيىن بالالار سىيلىقتاردى الىپ، ولاردى اشا باستادى. وسى كەزدە قۋاندىق كەلىپ، سىيلىقتارىن بالالار رۇقساتىنسىز العانىن كوردى. ول اشۋلاندى. "بۇل مەنىڭ سىيلىقتارىم! ولاردى مەن ساتىپ الدىم، نەگە مەنىڭ سەزىمىمدى ويلامايسىڭدار؟ نەلىكتەن ولاي جاسايسىڭدار؟" دەدى. بالالارعا جانە اينالاسىنداعىلارعا تەرىس اسەر ەتتى"، - دەدى ول.

جابىرلەنۋشى تاراپتىڭ سوزىنشە، كەلەسى كۇنى نۇكەنوۆا اعاسىنا بيشىمبايەۆ ۇستەلدى توڭكەرىپ جىبەرگەنىن ايتقان.

"مەن كەشە نە بولعانىن سۇرادىم. سالتانات قۋاندىق ۇستەلدى ىدىس-اياعى، تاماعىمەن بىرگە، ۇستەل باسىندا وتىرعان ادامدارمەن توڭكەرىپ جىبەرگەنىن ايتتى"، - دەدى ايتبەك امانگەلدى.

ايتا كەتەيىك، 27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. 

كەيىن قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى.


ۇسىنىلعان
سوڭعى جاڭالىقتار