Saltanat Núkenovanyń aǵasy Aitbek Amangeldi sot protsesi barysynda Qýandyq Bishimbaev ne úshin otbasynda birneshe ret janjal shyǵarǵanyn aitty, - dep habarlaidy Dalanews.kz.
Búgin burynǵy ulttyq ekonomika ministri Qýandyq Bishimbaevqa qatysty sot otyrysy ótip jatyr. Sot otyrysy jábirlenýshi taraptan jaýap alýdan bastaldy. Saltanat Núkenovanyń aǵasy Aitbek Amangeldi sotta sóz sóiledi.
Aitbek Amangeldi Qýandyq Bishimbaev pen Saltanat Núkenovanyń arasyndaǵy birinshi janjal BAU meiramhanasynyń qyzmetkerlerine qatysty bolǵanyn aitty.
"Qýandyq meiramhana qyzmetkerlerimen óte dóreki sóilesken. Sondyqtan janjal bastalǵan", - dedi ol.
Kelesi janjal 31 jeltoqsanda bolǵan. Aitbek Amangeldiniń aitýynsha, Saltanat aǵasyn Bishimbaevtar otbasymen birge jańa jyldy qarsy alýǵa shaqyrǵan. Aitbek Amangeldi Saltanattyń qatty qobaljyp júrgenin kórgen. Keiin úige osy is boiynsha sottalýshy. iaǵni Qýandyq Bishimbaevtyń nemere inisi Baqytjan Baijanov jubaiymen birge qonaqqa kelgen.
"Eki týysy keldi, olar shaqyrylmaǵan jáne sáikesinshe (Bishimbaevtar - esk.) olardyń kelýine daiyndalmaǵan. Meniń bilýimshe, ol sottalýshy Baqytjan Baijanov pen áieli boldy. Olar Qýandyq pen Saltanatqa jańajyldyq syilyq ákeldi. Saltanat olarǵa da syilyq bergisi keldi. Ol Qýandyqtan jańa jylǵa syilyq alǵan. Al saǵat 12-de Qýandyq Saltanatqa taǵy qosymsha átir syilaǵysy kelgen", - dedi Aitbek Amangeldi.
Onyń aitýynsha, janjaldyń sebebi Saltanat osy átirdi qonaqtarǵa syilaýy bolǵan.
"Qýandyq janjal bastady. "Meniń syilyqtarymdy iemdenýge qandai quqyqtaryń bar? Olardy men satyp aldym. Men syilaimyn" dedi. Ata-anasy oǵan eskertý jasady. Biraq ol ata-anasyna aralaspaýyn eskertip, dóreki túrde jaýap berdi. Ákesine: "bárine sen kinálisiń. Sen búkil ómirimdi qurttyń, anamnyń da ómirin qurttyń" dedi. 15 minýtta ol páterden shyǵyp ketti", - dep eske aldy Saltanattyń aǵasy.
Aitbek Amangeldiniń sózinshe, merekelik dastarhanǵa Bishimbaevtyń balalary da kelgen. Al Qýandyq úige qaita kirgen kezde balalar jańajyldyq syilyqtardy asha bastaǵanyn kórgen.
"Túngi 12-den keiin balalar syilyqtardy alyp, olardy asha bastady. Osy kezde Qýandyq kelip, syilyqtaryn balalar ruqsatynsyz alǵanyn kórdi. Ol ashýlandy. "Bul meniń syilyqtarym! Olardy men satyp aldym, nege meniń sezimimdi oilamaisyńdar? Nelikten olai jasaisyńdar?" dedi. Balalarǵa jáne ainalasyndaǵylarǵa teris áser etti", - dedi ol.
Jábirlenýshi taraptyń sózinshe, kelesi kúni Núkenova aǵasyna Bishimbaev ústeldi tóńkerip jibergenin aitqan.
"Men keshe ne bolǵanyn suradym. Saltanat Qýandyq ústeldi ydys-aiaǵy, tamaǵymen birge, ústel basynda otyrǵan adamdarmen tóńkerip jibergenin aitty", - dedi Aitbek Amangeldi.
Aita keteiik, 27 naýryzda eks-ministr Qýandyq Bishimbaevtyń isi boiynsha alqabiler tańdaldy. Alqabiler alqasyna 12 adam irikteldi: 10 – negizgi quram, 2 – qosalqy.
Keiin Qýandyq Bishimbaev sotta Saltanat Núkenovany asa qatygezdikpen óltirgenin moiyndamady.
