بۇل جايىندا كتك ارناسى حابارلادى.
قۋاندىق بيشىمبايەۆتىڭ كوز ىلەسپەس جىلدامدىقپەن وسكەن ساياسي كارەراسىنا قىزىعىپ تا، قىزعانىپ تا قاراۋعا بولاتىن. 19-ىندا ۋنيۆەرسيتەت ءبىتىرىپ، امەريكادا «بولاشاقپەن» وقىپ، 3 جوعارعى وقۋ ورنىن ۇزدىك بىتىرگەن ۆۋندەركيندتتىڭ مەملەكەتتىك قىزمەتتەگى باس اينالدىرارلىق ەڭبەك جولى دا 21 جاسىندا-اق باستالىپ كەتكەن.
25 جاسىندا ءمينيستردىڭ كەڭەسشىسى، كەيىننەن «سامۇرىق-قازىنادا» ءتوراعانىڭ ورىنباسارى بولدى. «بايتەرەك» ۇلتتىق حولدينگىن دە 3 جىل باسقاردى. قاراشا ايىندا ءدال وسى حولدينگتىڭ ەنشىلەس كومپانياسى "بايتەرەك DEVELOPMENT" ءتوراعاسىنىڭ ورىنباسارى، ءماجىلىستىڭ ەكس-سپيكەرى قابيبوللا جاقىپوۆتىڭ ۇلى مەن بىرنەشە اتقارۋشى ديرەكتور 288 ميلليون تەڭگە پارامەن ۇستالعان ەدى. ارادا كوپ ۋاقىت وتپەي تەرگەۋشىلەر بۇل ىسكە قۋاندىق بيشىمبايەۆتىڭ دا قاتىسى بارىن انىقتاعان سياقتى. ءسويتىپ، ەكس-مينيسترگە قاتىستى قىلمىستىق ءىس قوزعالىپ، ءوزى يزولياتورعا جابىلدى.
جەر داۋىنان كەيىن ۇلتتىق ەكونوميكا مينيسترلىگىن بار-جوعى 8 ايداي باسقارعان ۇكىمەتتەگى ەڭ جاس شەنەۋنىكتىڭ جوسپارى كوپ بولاتىن. 36 جاستاعى قۋاندىق ءۋاليحان ۇلى يپوتەكانىڭ پايىزىن تومەندەتىپ، ارزان باسپانا تۇرعىزىپ، «نۇرلى جەر» باعدارلاماسى ارقىلى حالىققا 10 سوتىق جەر تاراتۋعا ۋادە ەتكەن.
الايدا، وسى تۇرعىن ءۇي سالۋعا بيۋدجەتتەن بولىنگەن قىرۋار قارجىنى تەندەردەن ۇتىپ بەرۋ ءۇشىن «بايتەرەك» حولدينگىنىڭ مەنەدجەرلەرى كاسىپكەرلەردەن جۇيەلى تۇردە پارا الىپ وتىرعان. مول اۋىزباستىرىقتىڭ ءبىر بولىگى – بيشىمبايەۆتىڭ دا قالتاسىن قامپايتقان سىڭايلى. ويتكەنى، جەمقورلىققا قارسى ۇلتتىق بيۋرو ماقتاۋلى مينيستر سىبايلاستارىمەن اۋىز جالاسىپ، ءىرى كولەمدە پارا العان دەپ وتىر. ميلليونداردى اتقامىنەر جەكە باسىنىڭ قاجەتىنە جاراتىپتى. ەندى يزولياتوردا تەرگەۋشىلەردىڭ اقشا تۋرالى سۇراقتارىنا جاۋاپ بەردى.
– قانداي اقشا جايلى ايتىپ تۇرعانىڭىزدى بىلمەيمىن. بارلىق اقشا يگەرىلىپ جاتىر، – دەدى قۋاندىق بيشىمبايەۆ.
قازاقستانداعى ەڭ تابىستى شەنەۋنىك، اقشا ساناۋدان عانا ەمەس، ساكسافوندا ويناۋدان الدىنا جان سالمايتىن. ەندى انمەن كۇيدىڭ ورنىنا ول، يزولياتوردا تەرگەۋ ماتەريالدارىن وقىپ، سوت پروسەسىنە ازىرلەنەتىنى بەلگىلى. ەگەر قۋاندىق بيشىمبايەۆتىڭ كىناسى دالەلدەنسە، دۇنيە-مۇلكى تاركىلەنىپ 15 جىلعا دەيىن سوتتالۋى مۇمكىن. نەمەسە العان پاراسىنىڭ كولەمىنە قاراي ءىرى ايىپپۇلمەن قۇتىلۋى دا عاجاپ ەمەس. ءبىر انىعى شاتىلعان ەكس-مينيستردىڭ ساياسي كارەراسى تولىق اياقتالدى دەۋگە بولادى.
