Bul jaiynda KTK arnasy habarlady.
Qýandyq Bishimbaevtyń kóz ilespes jyldamdyqpen ósken saiasi karerasyna qyzyǵyp ta, qyzǵanyp ta qaraýǵa bolatyn. 19-ynda ýniversitet bitirip, Amerikada «Bolashaqpen» oqyp, 3 joǵarǵy oqý ornyn úzdik bitirgen výnderkindttiń memlekettik qyzmettegi bas ainaldyrarlyq eńbek joly da 21 jasynda-aq bastalyp ketken.
25 jasynda ministrdiń keńesshisi, keiinnen «Samuryq-Qazynada» tóraǵanyń orynbasary boldy. «Báiterek» ulttyq holdingin de 3 jyl basqardy. Qarasha aiynda dál osy holdingtiń enshiles kompaniiasy "Báiterek DEVELOPMENT" tóraǵasynyń orynbasary, Májilistiń eks-spikeri Qabibolla Jaqypovtyń uly men birneshe atqarýshy direktor 288 million teńge paramen ustalǵan edi. Arada kóp ýaqyt ótpei tergeýshiler bul iske Qýandyq Bishimbaevtyń da qatysy baryn anyqtaǵan siiaqty. Sóitip, eks-ministrge qatysty qylmystyq is qozǵalyp, ózi izoliatorǵa jabyldy.
Jer daýynan keiin Ulttyq ekonomika ministrligin bar-joǵy 8 aidai basqarǵan Úkimettegi eń jas sheneýniktiń jospary kóp bolatyn. 36 jastaǵy Qýandyq Ýálihanuly ipotekanyń paiyzyn tómendetip, arzan baspana turǵyzyp, «Nurly jer» baǵdarlamasy arqyly halyqqa 10 sotyq jer taratýǵa ýáde etken.
Alaida, osy turǵyn úi salýǵa biýdjetten bólingen qyrýar qarjyny tenderden utyp berý úshin «Báiterek» holdinginiń menedjerleri kásipkerlerden júieli túrde para alyp otyrǵan. Mol aýyzbastyryqtyń bir bóligi – Bishimbaevtyń da qaltasyn qampaitqan syńaily. Óitkeni, Jemqorlyqqa qarsy Ulttyq biýro maqtaýly ministr sybailastarymen aýyz jalasyp, iri kólemde para alǵan dep otyr. Milliondardy atqaminer jeke basynyń qajetine jaratypty. Endi izoliatorda tergeýshilerdiń aqsha týraly suraqtaryna jaýap berdi.
– Qandai aqsha jaily aityp turǵanyńyzdy bilmeimin. Barlyq aqsha igerilip jatyr, – dedi Qýandyq Bishimbaev.
Qazaqstandaǵy eń tabysty sheneýnik, aqsha sanaýdan ǵana emes, saksafonda oinaýdan aldyna jan salmaityn. Endi ánmen kúidiń ornyna ol, izoliatorda tergeý materialdaryn oqyp, sot protsesine ázirlenetini belgili. Eger Qýandyq Bishimbaevtyń kinási dáleldense, dúnie-múlki tárkilenip 15 jylǵa deiin sottalýy múmkin. Nemese alǵan parasynyń kólemine qarai iri aiyppulmen qutylýy da ǵajap emes. Bir anyǵy shatylǵan eks-ministrdiń saiasi karerasy tolyq aiaqtaldy deýge bolady.
