Ulytaý oblysyndaǵy Joshy han kesenesine aparatyn joldyń jai-kúii men baǵyttaýshy belgilerdiń sapasy qoǵam belsendisiniń synyna ilikti. Dýlat Ábish tarihi orynǵa baratyn týrister úshin tiisti jaǵdai jasalmaǵanyn aityp, oblystyń jańa ákimi Eset Baikendi atalǵan máselege nazar aýdarýǵa shaqyrdy, dep habarlaidy dalanews.kz.
Belsendi Ulytaý oblysynyń qurylǵanyna tórt jyldan asqanyn eske salyp, osy ýaqyt ishinde Joshy han kesenesine aparatyn jol men navigatsiia máselesi tolyq sheshilmegenin aitty.
“Osydan tórt jyl buryn Prezident Qasym-Jomart Toqaevtyń jarlyǵymen Ulytaý oblysy quryldy. Oǵan el bolyp qýandyq. Ulytaý Altyn Orda tarihymen tyǵyz bailanysty ólke retinde tanyla bastady. Alaida Joshy han kesenesine aparatyn joldyń qazirgi siqy mynaý. Jol boiyndaǵy belgiler de syn kótermeidi”, - dedi Dýlat Ábish.
Onyń sózinshe, týristik baǵyttaǵy belgiler qazaq, orys jáne aǵylshyn tilderinde jazylyp, kez kelgen saiahatshyǵa túsinikti bolýy kerek.
“Týrister Joshy han kesenesin ońai taýyp, tarihi orynǵa kedergisiz jetýge tiis. Jańadan taǵaiyndalǵan Ulytaý oblysynyń ákimi Eset Berikuly osy máselege mán beredi dep oilaimyn”, - dedi qoǵam belsendisi.
Aita keteiik, Eset Baiken Ulytaý oblysynyń ákimi qyzmetine 2026 jylǵy 17 shildede taǵaiyndaldy. Keiin Memleket basshysy oǵan óńirdiń infraqurylymyn damytý jáne turǵyndardyń turmys sapasyn jaqsartý jóninde tapsyrma bergen.
Bir oblys, úsh ákim, aiaqtalmaǵan jol
Ulytaý oblysy 2022 jyly qurylǵannan beri óńirdi úsh ákim basqardy. Alǵashqy ákim Berik Ábdiǵaliuly 2022 jylǵy maýsymda qyzmetine kirisip, 2024 jylǵy qazanǵa deiin otyrdy. Oblysty damytýdyń 2022-2026 jyldarǵa arnalǵan keshendi josparynda júzdegen shaqyrym joldy jóndeý men qalpyna keltirý kózdelgen edi.
Keiin oblys ákimi bolǵan Dastan Ryspekov te joldyń tolyq aiaqtalmaǵanyn moiyndaǵan. Onyń 2026 jylǵy málimetinshe, Jezqazǵannan Joshy han kesenesine deiingi baǵyttyń 51 shaqyrymynyń 35 shaqyrymyna ǵana asfalt tóselgen. Qalǵan 16 shaqyrymdaǵy jumys sý qubyry jobasyna bailanysty keiinge shegerilgen.
Alaida bul jobaǵa qarjy buǵan deiin-aq qarastyrylǵan. 2024 jyly 24KZ Joshy han keshenine aparatyn 20 shaqyrym jol men Qarakeńgir ózeni arqyly ótetin kópir qurylysyna respýblikalyq biýdjetten 10,2 milliard teńge baǵyttalǵanyn habarlaǵan. Sol kezde nysandy 2025 jyly paidalanýǵa berý josparlanǵan edi. Biraq másele áli kúnge deiin sheshimin tappai keledi.
