كەلەسى جىلى تاعى 7 اۋىل وت جاعىپ، كۇل شىعارۋدان ارىلادى. بۇل تۋرالى تۇركىستان وبلىسىنىڭ اكىمى جانسەيىت تۇيمەبايەۆ اۋدانعا جاساعان ساپارى كەزىندە مالىمدەدى.
اۋدان تۇرعىندارىمەن كەزدەسكەن ايماق باسشىسى گازداندىرۋ ماسەلەسىنە بايلانىستى اتقارىلىپ جاتقان جۇمىستاردىڭ بارىسىن بايانداپ ءوتتى.
– بۇگىنگە دەيىن وتىرار اۋدانىندا تابيعي گاز بولماعان. مىنە، وسى ماسەلەنى شەشۋ ءۇشىن ءتيىستى شارالار اتقارىلۋدا. بيىل ءشاۋىلدىر جانە تەمىر اۋىلدارىندا قۇرىلىس جۇمىستارى كەستەگە سايكەس قارقىندى ءجۇرىپ جاتىر. مۇنان بولەك ش.قالداياقوۆ، ەسكى شىلىك، جاڭا شىلىك جانە اقتوبە ەلدى مەكەندەرىن گازداندىرۋ جۇمىستارىنا قارجى قارالىپ، قۇرىلىس جۇمىستارى جاقىن كۇندەرى باستالعالى تۇر. جالپى ايتقاندا كوپ ۇزاتپاي اۋداندى تولىق گازبەن قامتۋدى ويلاپ وتىرمىز، – دەدى وبلىس اكىمى.
قازىرگى تاڭدا سىرداريانىڭ سول جاعالاۋىنداعى 12 ەلدى مەكەندى گازداندىرۋعا جوبالىق سمەتالىق قۇجاتىن دايىنداۋ ءۇشىن ساۋلەت جوسپارلاۋ تاپسىرماسى دايىندالىپ، وبلىستىق بيۋدجەتكە ۇسىنىلعان.
بۇدان بولەك، ءوڭىر باسشىسى شىلىك ەلدى مەكەنىندەگى «نۇر شىلىك» اۋىل شارۋاشىلىق كووپەراتيۆىنىڭ جۇمىسىمەن تانىستى. ءسۇت وڭدەۋ ءىسىن جولعا قويعان كاسىپورىن «ىرىس» ميكرو قارجى ۇيىمىنان 22 ملن. تەڭگە قارجى العان. قوجالىق كۇنىنە 500 ليتر ءسۇت ونىمدەرىن دايىنداۋعا قاۋقارلى. بۇگىندە كوپپەراتيۆ مەنشىگىندە 300 باس ءىرى قارا، 2256 باس ۋاق مال، 217 باس تۇيە، 9 باس جىلقىسى بار.
ايتا كەتەيىك، اۋدان شارۋالارى وتكەن جىلى 58 بىرلىك، 2018 جىلى 36 بىرلىك جاڭا اۋىل شارۋاشىلىق تەحنيكالارىن ساتىپ العان. ناتيجەسىندە ءونىم كولەمى مەن ساپاسى ارتىپ، الدىڭعى جىلدارمەن سالىستىرعاندا 2017 جىلى ەت ءونىمى 102،5 پايىزدى قۇراپ، 9.2 مىڭ تونناعا، ءسۇت 103.5 پايىزعا ارتىپ، 21.6 مىڭ تونناعا جەتكەن.
سونىمەن قاتار وبلىس اكىمى اۋدانعا جاساعان جۇمىس ساپارى بارىسىندا 140 ورىندىقتى «الپامىس» بوبەكجاي بالاباقشاسى مەن مەملەكەتتىك جەكەمەنشىك ارىپتەستىك اياسىندا سالىنعان 100 ورىندىق «ءبىلال اتا» بوبەكجاي جانە زاماناۋي ۇلگىدە بوي كوتەرگەن مادەنيەت وشاعىن سالتاناتتى تۇردە اشىپ، تۇرعىندارعا تاپسىردى.
اتالعان نىسانداردىڭ اشىلۋ سالتاناتىنا قاتىسقان وبلىس اكىمى ج.تۇيمەبايەۆ بۇل يگى ىستەر ەلباسى ساياساتىنىڭ ارقاسىندا جۇزەگە اسىپ وتىرعانىن اتاپ ءوتتى.
– جالپى وبلىستا 1790-داي بالاباقشا بولسا، سونىڭ 1 مىڭعا جۋىعى جەكەمەنشىك. مۇنىڭ بارلىعىنا مەملەكەتتەن قارجى بەرىلىپ وتىر. وسىنىڭ ارقاسىندا بالالاردى بالاباقشامەن قامتۋ كولەمى ارتىپ وتىر. بۇل مەملەكەتتە جۇرگىزىلگەن ساياساتتىڭ ناتيجەسى مەن جەمىسى دەپ بىلەمىن. بالاباقشامەن قامتۋ بويىنشا قازاقستان بۇكىل دۇنيەدە الدىڭعى قاتاردا. شەتەلدە ءار بالاعا 400 دوللاردان تولەيدى. ەۋروپاداعى ەڭ مىقتى دەگەن ەلدەردەگى كوپشىلىك بالاباقشاداعى ءاربىر توپتا جاتىن بولمە، وينايتىن بولمە جوق. ال بىزدە مەملەكەت باسشىسىمىز بولاشاق ۇرپاققا جاقسى جاعداي جاساپ وتىر، – دەدى اكىم.
اتالعان بوبەكجايلاردا جاس وسكىندەردى ساپالى تاربيەلەپ، وي ورىستەرىنىڭ وسۋىنە، ياعني ءبىلىمدى بولىپ ەر-جەتۋىنە، وسى زاماننىڭ ۇلگى جاقتارى تۇگەل جاسالعان. بالاباقشا ىشىندەگى بالالار ويىن الاڭىنا دا ەرەكشە كوڭىل بولىنگەن. ويتكەنى، مۇندا بۇلدىرشىندەرگە تەك تاربيە بەرىپ قانا قويماي ولاردىڭ سپورتپەن اينالىسۋىنا باسا نازار اۋدارىلعان.
بۇدان بولەك، ءوڭىر باسشىسى تەمىر اۋىلىندا اشىلعان 200 ورىندىق مادەنيەت ءۇيىنىڭ جۇمىسىمەن تانىستى.
– ۇلت رۋحانياتى مەن مادەنيەتى جولىنداعى ەڭبەكتەرىڭىزگە شىعارماشىلىق تابىس تىلەيمىن.«مادەنيەت دەگەن ۇعىم اياسىندا – ادام ونسىز ءومىر سۇرە المايتىن اسا نازىك قۇبىلىستار توعىسقان» دەپ ەلباسىمىز نۇرسۇلتان ءابىش ۇلى نازاربايەۆ ايتقانداي، دۇنيەنىڭ ادەمىلىگى ونەرمەن بايلانىستى. ءاربىر ەلدىڭ رۋحاني كۇشى – ونىڭ مادەنيەتىمەن ولشەنەدى. ۇلت كوشباسشىسى ايتقان «قازاق وركەنيەتىنىڭ التىن دىڭگەگى» وتىرار دالاسى رۋحانيات پەن مادەنيەتتىڭ وشاعى دەر ەدىم، – دەدى ءوز سوزىندە ج.تۇيمەبايەۆ.
تۇركىستان وبلىسى اكىمى باسپا ءسوز قىزمەتى
