Kelesi jyly taǵy 7 aýyl ot jaǵyp, kúl shyǵarýdan arylady. Bul týraly Túrkistan oblysynyń ákimi Janseiit Túimebaev aýdanǵa jasaǵan sapary kezinde málimdedi.
Aýdan turǵyndarymen kezdesken aimaq basshysy gazdandyrý máselesine bailanysty atqarylyp jatqan jumystardyń barysyn baiandap ótti.
Qazirgi tańda Syrdariianyń sol jaǵalaýyndaǵy 12 eldi mekendi gazdandyrýǵa jobalyq smetalyq qujatyn daiyndaý úshin sáýlet josparlaý tapsyrmasy daiyndalyp, oblystyq biýdjetke usynylǵan.
Budan bólek, óńir basshysy Shilik eldi mekenindegi «Nur Shilik» aýyl sharýashylyq kooperativiniń jumysymen tanysty. Sút óńdeý isin jolǵa qoiǵan kásiporyn «Yrys» mikro qarjy uiymynan 22 mln. teńge qarjy alǵan. Qojalyq kúnine 500 litr sút ónimderin daiyndaýǵa qaýqarly. Búginde kopperativ menshiginde 300 bas iri qara, 2256 bas ýaq mal, 217 bas túie, 9 bas jylqysy bar.
Aita keteiik, aýdan sharýalary ótken jyly 58 birlik, 2018 jyly 36 birlik jańa aýyl sharýashylyq tehnikalaryn satyp alǵan. Nátijesinde ónim kólemi men sapasy artyp, aldyńǵy jyldarmen salystyrǵanda 2017 jyly et ónimi 102,5 paiyzdy qurap, 9.2 myń tonnaǵa, sút 103.5 paiyzǵa artyp, 21.6 myń tonnaǵa jetken.
Sonymen qatar oblys ákimi aýdanǵa jasaǵan jumys sapary barysynda 140 oryndyqty «Alpamys» bóbekjai balabaqshasy men memlekettik jekemenshik áriptestik aiasynda salynǵan 100 oryndyq «Bilál ata» bóbekjai jáne zamanaýi úlgide boi kótergen mádeniet oshaǵyn saltanatty túrde ashyp, turǵyndarǵa tapsyrdy.
Atalǵan nysandardyń ashylý saltanatyna qatysqan oblys ákimi J.Túimebaev bul igi ister Elbasy saiasatynyń arqasynda júzege asyp otyrǵanyn atap ótti.
– Jalpy oblysta 1790-dai balabaqsha bolsa, sonyń 1 myńǵa jýyǵy jekemenshik. Munyń barlyǵyna memleketten qarjy berilip otyr. Osynyń arqasynda balalardy balabaqshamen qamtý kólemi artyp otyr. Bul memlekette júrgizilgen saiasattyń nátijesi men jemisi dep bilemin. Balabaqshamen qamtý boiynsha Qazaqstan búkil dúniede aldyńǵy qatarda. Shetelde ár balaǵa 400 dollardan tóleidi. Eýropadaǵy eń myqty degen elderdegi kópshilik balabaqshadaǵy árbir topta jatyn bólme, oinaityn bólme joq. Al bizde Memleket basshysymyz bolashaq urpaqqa jaqsy jaǵdai jasap otyr, – dedi ákim.
Atalǵan bóbekjailarda jas óskinderdi sapaly tárbielep, oi óristeriniń ósýine, iaǵni bilimdi bolyp er-jetýine, osy zamannyń úlgi jaqtary túgel jasalǵan. Balabaqsha ishindegi balalar oiyn alańyna da erekshe kóńil bólingen. Óitkeni, munda búldirshinderge tek tárbie berip qana qoimai olardyń sportpen ainalysýyna basa nazar aýdarylǵan.
Budan bólek, óńir basshysy Temir aýylynda ashylǵan 200 oryndyq mádeniet úiiniń jumysymen tanysty.
– Ult rýhaniiaty men mádenieti jolyndaǵy eńbekterińizge shyǵarmashylyq tabys tileimin.«Mádeniet degen uǵym aiasynda – adam onsyz ómir súre almaityn asa názik qubylystar toǵysqan» dep Elbasymyz Nursultan Ábishuly Nazarbaev aitqandai, dúnieniń ádemiligi ónermen bailanysty. Árbir eldiń rýhani kúshi – onyń mádenietimen ólshenedi. Ult Kóshbasshysy aitqan «Qazaq órkenietiniń altyn dińgegi» Otyrar dalasy rýhaniiat pen mádeniettiń oshaǵy der edim, – dedi óz sózinde J.Túimebaev.
Túrkistan oblysy ákimi baspasóz qyzmeti
