بيىل جەتىسۋدا جاڭارتىلعان ەنەرگيا كوزدەرىنىڭ 4 جوباسى ىسكە قوسىلادى

نۇرلان جۇماحان 28 ءساۋ. 2024 16:18 1810

بيىل جەتىسۋ وبلىسىندا جاڭارتىلعان ەنەرگيا كوزدەرىن دامىتۋ باعىتىندا  قۇنى 21،6 ملرد تەڭگە بولاتىن 4 جوبانى اياقتاۋ جوسپارلانىپ وتىر. ولار كوكسۋ، ەسكەلدى جانە سارقان اۋداندارىندا ىسكە اسىرىلادى، – دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.

جەتىسۋ وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىعى باسقارماسىنىڭ مالىمەتىنە قاراعاندا، ايماق كولەمىندە ەلەكتر ەنەرگياسىنىڭ بەلگىلەنگەن قۋاتى 234،5 مۆت، ياعني جاڭارتىلعان ەنەرگيا كوزدەرىنەن – 210،5 مۆت، تەكەلى قالاسىنىڭ جەو – 24 مۆت.

ماسەلەن، وتكەن جىلى ەلەكتر ەنەرگياسىن تۇتىنۋ 1،9 ملرد كۆت*ساعاتتى قۇراسا، سونىڭ ىشىندە ەلەكتر ەنەرگياسىنىڭ جەرگىلىكتى ءوندىرىسى – 630،5 ملن كۆت*ساع بولعان، ال 1،3 ملرد كۆت*ساعات باسقالاردان ساتىپ الىندى.

بۇل رەتتە جاڭارتىلاتىن ەنەرگيا كوزدەرىنەن وندىرگەن ەلەكتر ەنەرگياسىنىڭ كولەمى 472،6 ملن كۆت*ساع نەمەسە ءوز ءوندىرىسىمىزدىڭ 75% ۇلەسىن قۇرايدى. 

– بۇگىنگى تاڭدا بەلگىلەنگەن قۋاتى 210،5 مۆت جاڭارتىلاتىن ەنەرگيا كوزدەرىنىڭ 15 نىسانى جۇمىس ىستەيدى. ولار اقسۋ، ەسكەلدى، سارقان، الاكول اۋداندارى مەن تەكەلى قالاسىندا ورنالاسقان. سول سياقتى بيىل وسى باعىتتاعى 4 جوبانى اياقتاۋ كوزدەلىپ وتىر. اتاپ ايتقاندا، كوكسۋ اۋدانىندا 7 مۆت-تىق 1 گەس ، ەسكەلدى اۋدانىندا قۋاتى 26 مۆت 1 گەس  جانە سارقان اۋدانىندا جالپى قۋاتى 13،1 مۆت 2 گەس  سالىنۋدا.  ولاردىڭ بەلگىلەنگەن قۋاتى 46،1 مۆت، جالپى قۇنى 21،6 ملرد تەڭگە، – دەلىنگەن باسقارمانىڭ حابارلاماسىندا.


ۇسىنىلعان
سوڭعى جاڭالىقتار