بيىل وبلىستا العاش رەت ءۇش سپورت تۇرىنەن «جەتىسۋ ليگاسى» وبلىستىق بالالار ءتۋرنيرى وتەدى. بۇل تۋرالى بۇگىن ءوڭىر باسشىسى بەيبىت يسابايەۆ جۇمىس ساپارىمەن كوكسۋ اۋدانىنا بارىپ، ورتالىق ستاديوندا اۋىلدىڭ جاس فۋتبولشىلارمەن، سونداي-اق «جەتىسۋ» كاسىبي فۋتبول كلۋبىنىڭ كومانداسىمەن جانە جاتتىقتىرۋشىلار قۇرامىمەن كەزدەسكەن كەزىندە ايتتى، دەپ حابارلايدى Dalanews.kz
ەسكە سالساق، IV ۇلتتىق قۇرىلتايدا مەملەكەت باسشىسى ەلىمىزدەگى فۋتبول ينفراقۇرىلىمىن دامىتۋدىڭ جانە بالالاردىڭ سپورتپەن شۇعىلدانۋىنا جاعداي جاساۋدىڭ ماڭىزدىلىعىن اتاپ وتكەن بولاتىن. وسىعان بايلانىستى بيىلدان باستاپ وبلىس اكىمىنىڭ باستاماسىمەن وڭىردە جىل سايىن ءۇش سپورت تۇرىنەن: فۋتبول، ۆولەيبول، باسكەتبولدان وبلىستىق بالالار ءتۋرنيرىن وتكىزۋ جونىندە شەشىم قابىلداندى. قازىرگى كەزدە وبلىس بويىنشا 560 كوماندادان وتىنىمدەر كەلىپ تۇسكەن. فۋتبولدان جارىسقا 10-15 جاس ارالىعىنداعى ۇلدار، ال ۆولەيبول مەن باسكەتبولدان 12-15 جاس ارالىعىنداعى قىزدار كوماندالارى قاتىسادى. ىرىكتەۋ كەزەڭى 19 ساۋىردە باستالادى، ال فينالدىق ويىندار ماۋسىم ايىنا جوسپارلانعان. ويىنداردىڭ قورىتىندىسىنا قاراي فۋتبولدان 3 جاس ەرەكشەلىكتەرى بويىنشا جۇلدەلى ورىن العان 90 بالا، ۆولەيبول مەن باسكەتبولدان جۇلدەلى ورىندى يەلەنگەن 60 بالا وبلىستىق كەزەڭنىڭ جەڭىمپازى اتانادى دەپ كۇتىلۋدە. سىيلىق رەتىندە جەڭىمپازدارعا سپورتتىق كيىمدەر مەن تەگىن دوپتار، سونداي-اق بالالار لاگەرلەرىنە دەمالۋعا جولدامالار بەرىلەدى. باستى اتاپ وتەرلىگى – تۋرنيرگە نيەت بىلدىرگەن كەز-كەلگەن اۋلا جانە مەكتەپ كوماندالارى قاتىسادى.
- بيىلدان باستاپ ءبىز فۋتبولعا باسا نازار اۋدارىپ، سپورتتىڭ ءۇش تۇرىنەن وبلىستىق بالالار ءتۋرنيرىن وتكىزە باستايمىز. الدارىڭىزعا ماقسات قويىڭىزدار، سوعان تالپىنىڭىزدار، ءبىز سىزدەرگە ءارقاشان كومەكتەسەمىز، قولدايمىز. ءقازىردىڭ وزىندە كاسىبي فۋتبولشىلار جاتتىعاتىن ستاديوندا جاتتىعىپ جۇرسىزدەر. بالا كۇنىنەن سپورتپەن شۇعىلدانعان وتە جاقسى، بۇل سىزدەردى ەرتە باستان شىڭدايدى. جاقسى ويناپ، جەڭىسكە ۇمتىلىڭىزدار، - دەپ ءوڭىر باسشىسى بالالارعا جاڭا فۋتبول دوپتارىن تاراتتى.
بۇدان سوڭ «جەتىسۋ» فۋتبول كلۋبىنىڭ باس باپكەرى سامات سماقوۆپەن، ويىنشىلارمەن اڭگىمەلەسكەن وبلىس اكىمى الداعى ماۋسىمنىڭ جوسپارلارىن تالقىلاپ، ەل چەمپيوناتىنىڭ وتكەن 4-تۋرىندا كوماندا جاقسى تەحنيكا كورسەتكەنىمەن، كلۋبقا جاسالىپ وتىرعان قولداۋلارعا قاراماستان، جانكۇيەرلەردى ناتيجەلى ويىنىمەن قۋانتا الماعانىن ايتتى. وسىعان بايلانىستى ءوڭىر باسشىسى ويىن دەڭگەيىن كوتەرۋگە ەرەكشە نازار اۋدارۋ قاجەتتىگىن اتاپ ءوتتى.
س. سماقوۆتىڭ ايتۋىنشا، كوماندا قۇرامى 90%-عا جاڭارتىلدى، نەگىزگى قۇرامنىڭ جاساقتالعانىنا 2،5 اي ۋاقىت بولعان:
- ءبىزدىڭ كوماندا پرەمەر-ليگاداعى ەڭ جاس كوماندالاردىڭ ءبىرى، ويىنشىلاردىڭ ورتاشا جاسى – 25-26 جاس، ءبىراق قاي-قايسىنىڭ دا الەۋەتى بار. ازىرگە كۇتكەن ناتيجە كورسەتە العان جوقپىز، ءبىراق ۋاقىتىمىز بار. ءبىز ءقازىر ويىنشىلاردىڭ پسيحولوگيالىق دايىندىعىنا ەرەكشە نازار اۋدارىپ جاتىرمىز، جەڭىمپازداردىڭ كوماندالىق رۋحىن قالىپتاستىرامىز. ناتيجە شىعارادى دەپ كومانداعا سەنەمىن، - دەدى باس جاتتىقتىرۋشى.
كلۋب ويىنشىلارىنىڭ ءبىرى پىكىر ءبولىسىپ:
- مەن سپورتتاعى قادامىمدى 2014 جىلى تەكەلىدە فۋتبولمەن شۇعىلدانۋدان باستادىم. كاسىبي فۋتبولعا 2021 جىلى كەلدىم. «جەتىسۋ» كومانداسىنىڭ نەگىزگى جانە دۋبلدىك قۇراماسىندا وينادىم. سودان كەيىن مەنى رەسەيلىك فۋتبول كومانداسىنا شاقىردى. ءوزىمىزدىڭ «جەتىسۋ» كلۋبىنا شاقىرىلعان كەزدە قۋانا-قۋانا قايتىپ ورالدىم. الدىمىزدا ەل چەمپيوناتىندا كەمىندە 7-ورىنعا تۇراقتاۋ مىندەتى تۇر. وعان جەتۋ ءۇشىن بارلىق مۇمكىندىكتەرىمىز بار دەپ سانايمىن. ءوز تاراپىمنان بار كۇش-جىگەرىمدى جۇمسايمىن، - دەپ اتاپ ءوتتى «جەتىسۋ» پفك-نىڭ ورتالىق جارتىلاي قورعاۋشىسى داۆيد ەسىمبەكوۆ.
اتاپ وتسەك، وبلىستىڭ اۋداندارى مەن قالالارىندا 639 فۋتبول سەكسياسى جۇمىس ىستەيدى، سونىڭ 455ء-ى - اۋىلدىق جەرلەردە. بۇل سەكسيالارعا 63 483 ادام قاتىسادى.
سونىمەن قاتار وڭىردە 9 بالالار مەن جاسوسپىرىمدەر سپورت مەكتەبىندە جانە «جەتىسۋ» فۋتبول ورتالىعىندا 2120 بالا سپورتپەن اينالىسادى. وبلىستىڭ ءبىلىم بەرۋ ۇيىمدارىندا ساباقتان تىس جۇمىستار اياسىندا 397 سەكسيادا 9548 بالا ۇنەمى فۋتبولدان شەبەرلىگىن ارتتىرۋدا. تاعى 273 بالا مەملەكەتتىك تاپسىرىس اياسىندا تەگىن سەكسيالارعا بارادى. سونداي-اق وڭىردە «جەتىسۋ فۋتبول كلۋبتارى» قوعامدىق قورى جۇمىس ىستەيدى.
جالپى جەتىسۋ وبلىسىنىڭ اۋماعىندا فۋتبولمەن اينالىسۋعا لايىقتالعان 13 ستاديون، 350 فۋتبول الاڭى جۇمىس ىستەيدى، سونىڭ 285ء-ى اۋىلدىق جەرلەردە ورنالاسقان.
