بيىل جەتىسۋ وبلىسىندا 152 شاقىرىم جول مەن 53 ەلدى مەكەننىڭ ىشكى جولدارىنا جوندەۋ جۇمىستارىن جۇرگىزۋ جوسپارلانىپ وتىر. سونىڭ ىشىندە 5 كوپىردى قايتا جاڭعىرتۋ، 1 كوپىردى ورتاشا جوندەۋ، بۇرقانبۇلاق سارقىراماسىنا اپاراتىن 15 كم جولدىڭ رەكونسترۋكسياسى، «الماتى – وسكەمەن – لەپسى – اقتوعاي» جولىنىڭ 35-110 كم ۋچاسكەسىنىڭ جاڭعىرتۋ جۇمىستارى، ەلدى مەكەندەرگە كىرەتىن جولدار، ىشكى جولدار ت.ب. جوبالار بار، - دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەپ.
وبلىستىق جولاۋشى كولىگى جانە اۆتوموبيل جولدارى باسقارماسىنىڭ مالىمەتىنە قاراعاندا، جەتىسۋ وبلىسى قۇرىلعاننان بەرى 2023-2024 جىلدارى وبلىستىق ماڭىزى بار 391،4 كم جول جانە 134 ەلدى مەكەننىڭ ىشكى كوشەلەرى جوندەلگەن. ماسەلەن، 2024 جىلى رەسپۋبليكالىق جانە وبلىستىق ماڭىزى بار اۆتوموبيل جولدارى قايتا جاڭارتىلىپ، «ءتالدىقورعان-ۇشارال» (313 كم)، «لەپسى-بالقاش كولى» (27 كم)، «سارىوزەك-كوكتال» (45-68 كم، التىنەمەل اسۋى)، «جاركەنت-قورعاس» (328-360 كم)، «ۇشتوبە-كوپبىرلىك» (78 كم) باعىتىنداعى ءىرى جوبالار پايدالانۋعا بەرىلدى. ءسويتىپ جاقسى جانە قاناعاتتانارلىق جاعدايداعى وبىلىستىق ماڭىزى بار اۆتوجولداردىڭ ۇلەسى 94%-عا جەتكىزىلدى.
ال بيىل وڭىردە 152 شاقىرىم جولعا، 53 ەلدى مەكەننىڭ ىشكى جولدارىنا جوندەۋ جاسالادى دەپ مەجەلەنگەن. كۇردەلى جوندەۋ شەڭبەرىندە «سارىوزەك – كوكتال» اۆتوجولىنداعى كونبە وزەنىنەن وتەتىن جاڭا كوپىر سالۋ، «سارىوزەك ستانسياسىن اينالىپ ءوتۋ» اۆتوجولىنىڭ جول قۇرىلىمىن كۇشەيتۋ جانە ۇزىندىعى 21 كم (مۇقىرى اسۋى ۋچاسكەسى) «قونايەۆ – تالدىقورعان» اۆتوجولىنىڭ جول جابىنىن قايتا جاڭارتۋ جوسپاردا بار. سونىمەن قاتار وسى جىلى «الماتى وبلىسىنىڭ شەكاراسى - سارىوزەك كەنتى» (13 كم)، «سارىوزەك – كوكتال» (112 كم) جانە «ايدارلى-كوكتال» (15 كم) باعىتىنداعى جولدار جەلىسىنە ورتاشا جوندەۋ جۇمىستارى وتكەن جىلدان وتپەلى جوبا رەتىندە جالعاسادى.
«جولداردىڭ نورماتيۆتىك جاي-كۇيىن ساقتاۋ ماقساتىندا اۆتوماتتاندىرىلعان ولشەۋ ستانسيالارى ورناتىلۋدا. وبلىس بويىنشا وسىنداي 8 ستانسيا قويىلدى. ولاردىڭ 6-ى رەسپۋبليكالىق تراسسالاردا، 2-ەۋى وبلىستىق ماڭىزداعى جولداردا ورنالاستىرىلعان. مۇنداي ستانسيالار جۇك كولىكتەرىنىڭ سالماعىن اۆتوماتتى تۇردە ولشەپ، بەلگىلەنگەن شەكتەن اسىپ كەتپەۋىن قاداعالايدى»، - دەلىنگەن باسقارمانىڭ حابارلاماسىندا.
اتاپ وتسەك، وتكەن جىلى وڭىردە اۆتوموبيل جولدارىندا 24،0 ملن. جولاۋشى تاسىمالدانىپ، بۇل كورسەتكىش 2023 جىلمەن سالىستىرعاندا 8% جۋىق وسكەن. جولداردىڭ ساپاسى جاقسارۋىنا قاراي بيىل دا بۇل كورسەتكىش ارتا تۇسەدى دەپ جوسپارلانىپ وتىر.
«قازاۆتوجول» ۇك» اق اقپاراتىنا سۇيەنسەك، جولداردىڭ كۇتىمى بويىنشا وڭىردەگى رەسپۋبليكالىق ماڭىزى بار قولدانىستاعى 873 شاقىرىم جولعا قىسقى كۇتىم جاسالدى. بۇل جۇمىستارعا 72 بىرلىك مەنشىكتى جانە 10 بىرلىك جالگەرلىك تەحنيكا تارتىلدى. بيىلعى قىسقى كەزەڭدە كوكتايعاققا قارسى ماتەريالدىڭ قاجەتتى قورى دايىندالدى. وعان قوسا ايتا كەتسەك، 2023 جىلدان تەحنيكا پاركىن تولىقتىرۋ جۇمىستارى باستالدى، ياعني بۇگىنگى كۇنى مۇنداعى تەحنيكا سانى 59-دەن 72-گە ۇلعايدى.
جالپى وبلىستىڭ اۆتوموبيل جولدارىنىڭ جالپى ۇزىندىعى 3 988 كم قۇرايدى. سونىڭ ىشىندە رەسپۋبليكالىق ماڭىزى بار – 1 034 كم، جەرگىلىكتى ماڭىزى بار - 2 954 كم.
