ونلاين باسپا ءسوز كونفەرەنسياسى بارىسىندا شقو سسكد باسشىسىنىڭ ورىنباسارى ساۋلە سليامعازينا 2021 جىلعى جازعى دەمالىستىڭ باستالۋىنا قويىلاتىن تالاپتاردى اتاپ ايتتى.
ق ر باس مەملەكەتتىك سانيتاريالىق دارىگەرىنىڭ قاۋلىسىنا سايكەس، «سارى» جانە «جاسىل» ايماقتاعى قوناق ۇيلەر مەن دەمالىس بازالارىنىڭ، ساناتوريالىق-كۋرورتتىق ۇيىمداردىڭ قىزمەتىنە رۇقسات ەتىلگەن.
الداعى تۋريستىك ماۋسىمعا شقو بويىنشا سانيتارلىق-ەپيدەميولوگيالىق باقىلاۋ دەپارتامەنتى وبلىستىڭ تۋريستىك ايماقتارىندا ىندەتتىڭ الدىن الۋ جونىندەگى شارالاردى ايقىندايتىن ارنايى قاۋلى شىعارۋدى جوسپارلاپ وتىر.
قاۋلى جوباسىنا سايكەس تۋريستىك جانە رەكرەاسيالىق ايماقتاردا ورنالاسقان دەمالىس جانە تۇرۋعا ارنالعان ورىنداردىڭ يەلەرى شەكتەۋ شارالارى جاعدايىندا جۇمىسقا ازىرلىك اكتىسىن الۋعا ءتيىس، سودان كەيىن بارىپ جۇمىسقا كىرىسۋىنە بولادى. بۇل قۇجاتتى مونيتورينگتىك توپتىڭ وبەكتىنى تەكسەرۋ ناتيجەلەرى بويىنشا اۋماقتىق سانيتاريالىق-ەپيدەميولوگيالىق باقىلاۋ باسقارماسى بەرەدى.
سونىمەن قاتار، ءۇي يەلەرى www.infokazakhstan.kz سايتىنان ەلەكتروندىق فورماتتا بەرىلەتىن سانيتارلىق نورمالارعا سايكەستىك اكتىسىن الۋى قاجەت.
ۆيرۋس ءورشىپ تۇرعان ايماقتاردان كەلگەن تۋريستتەردە COVID-19-عا تاپسىرىلعان پتر-سىنامانىڭ تەرىس ناتيجەسى بولۋى ءتيىس.
بۇل رەتتە، ەگەر ازاماتتا سىنامانىڭ تەرىس ناتيجەسى بولسا، وندا ونىڭ قاسىندا ەرىپ جۇرگەن بەس جاسقا دەيىنگى بالالاردان پتر-سىناما تالاپ ەتىلمەيدى. دەمالىسقا كەلگەن ءبىر وتباسى مۇشەلەرىندە تەك 1 سىناما ناتيجەسى بولسا جەتكىلىكتى.
سونداي-اق، دەمالىس ورىندارىنىڭ تولتىرىلۋى 80 پايىزدان اسپاۋى ءتيىس. كەلۋشىلەردىڭ جارتىسى عانا ءبىر ۋاقىتتا تاماقتانۋ ورىندارىنا كىرە الادى. شەتكى ۇستەلدەردەگى ورىندىقتار اراسىنداعى الەۋمەتتىك اراقاشىقتىق ءبىر جارىم مەتردەن كەم بولماۋى قاجەت.
بۇدان بولەك، سۋعا ءتۇسۋ ورىندارىن قوسپاعاندا، بارلىق قوعامدىق ورىنداردا ماسكا رەجيمى جانە الەۋمەتتىك اراقاشىقتىق قاتاڭ ساقتالادى.
– قاۋلى جوباسى ءقازىر شقو اكىمى اپپاراتى مەن سانيتارلىق-ەپيدەميولوگيالىق باقىلاۋ كوميتەتىنە كەلىسۋگە جولداندى. ەگەر شىعىس قازاقستان «قىزىل» ايماققا وتەتىن بولسا، وندا كارانتيندىك شارالاردى ودان ءارى قاتايتۋعا بولادى، – دەدى ساۋلە ءسلامعازينا.
