جاڭا فيلم ۇلتتىق ۇلاننىڭ قۇرامىنا كىرەتىن ارنايى جاساقتىڭ قيىن دا ءقاۋىپتى قىزمەتىنە ارنالعان.
كارتينا ەلىمىزدىڭ مادەنيەت جانە اقپارات مينيسترلىگى تاپسىرىسى بويىنشا «ۇلتتىق كينونى قولداۋ مەملەكەتتىك ورتالىعى» كومەگىمەن ءتۇسىرىلدى.
تۋىندى جەلىسىنە ارنايى جاساقتا قىزمەت ەتەتىن ءۇش جاۋىنگەردىڭ دوستىعى ارقاۋ بولعان. ولاردىڭ كۇندەلىكتى مىندەتى – ءقاۋىپتى قىلمىستىق توپتارعا قارسى تۇرۋ. سونداي قىلمىستىق توپقا قارسى تەكەتىرەستىڭ بىرىندە ءۇش جاۋىنگەردىڭ دوستىعى سىنالادى.
– جاۋىنگەرلەر اراسىندا كۇرەڭ بەرەت دەگەن وزدەرىنىڭ ارنايى اتاعى بار. قازاقستان بويىنشا وسى جىلدارى اسكەردە جۇرگەن 200 ازامات قانا سول كۇرەڭ بەرەتكە يە بولعان. سولاردىڭ ءومىرى كۇندەلىكتى قالاي شىڭدالاتىندىعى، قالاي وزدەرىنىڭ قىزمەتىن اتقاراتىندىعى جايىندا بۇگە شىگەسىنە دەيىن كورسەتىلدى. "ۇلتتىق كينونى قولداۋ مەملەكەتتىك ورتالىعى" كەاق باسقارما ءتوراعاسى قۇرمانبەك جۇماعالي.
«Burkit» رەجيسسەر دانيار يبراگيموۆتىڭ دەبيۋتتىك ءفيلمى. ول بۇعان دەيىن وتاندىق «التىنشى پوست» جانە «قازبات» اسكەري ەكشن-فيلمدەرىنىڭ پروديۋسەرى بولعان. ءفيلمنىڭ تۇسىرىلىمىنە ارنايى جاساق، اسكەري تەحنيكا مەن اۆياسيا، سونداي-اق ەكى جۇزدەن استام مەرزىمدى اسكەري قىزمەتشى قاتىسقان. جەدەل-ىزدەستىرۋ شارالارى ارقاۋ بولعان كارتينانىڭ كەيبىر ەپيزودتارى شىنايى وقيعالارعا نەگىزدەلگەن. ءتۇسىرىلىم الماتى وبلىسىنىڭ كورىكتى جەرلەرىندە، ەسىك تاۋلارى مەن ىلە وزەنىندە ءوتتى.
– كوركەم فيلمدە قازاقستاننىڭ ارنايى ماقساتتاعى قىزمەت قىزمەتكەرلەرىنىڭ كۇندەلىكتى ورىنداپ وتىرعان جۇمىسى اسكەري دوستىعى مەن قارىم- قاتىناستارى جانە قازىرگى تاڭداعى ەلىمىزدىڭ اتقارىپ وتىرعان قىزمەتشىلەرىنە ارنالعان كوركەم فيلم. اكتەرلىق قۇرام ءتۇسىرىلىم جۇمىستارىنا كىرىسپەس بۇرىن بىرنەشە اپتا بويى جاۋىنگەرلىك قيمىلداردى ۇيرەندى. ءتىپتى، باستى كەيىپكەرلەرگە ءبىر مەزەتتە 3 مىڭ مەتر بيىكتىكتەن تىكۇشاقتان پاراشيۋتپەن سەكىرۋگە تۋرا كەلدى. ال بۇل كادردى ءتۇسىرۋ ءۇشىن وپەراتورلاردىڭ وزدەرى دە پاراشيۋتپەن سەكىردى، – دەيدى ق ر ۇلتتىق ۇلانى باس قولباسشىسىنىڭ ورىنباسارى قايرات ۇمبەتوۆ.
ال اكتەر سانجار ءمادي بولسا فيل جايىنداعى ويىن بىلايشا جەتكىزدى:
– فيلمدە مەنىڭ اتىم فەنيكس. مەن ءۇشىن بۇل فيلم وتە قيىن ءتۇسىرىلىم بولدى. ساربازدىڭ كيىمى وتە اۋىر – 50 كەلىگە دەيىن جەتەدى. باسقا كيەتىن اسكەري دۋلىعىنىڭ سالماعى 15 كەلى تارتادى، – دەدى اكتەر.
ءفيلمنىڭ قويۋشى وپەراتورى ازامات دۋلاتوۆ، پروديۋسەرى جانە اسكەري كەڭەسشىسى وتستاۆكاداعى پولكوۆنيك كامال جاقسىلىقوۆ. باستى رولدەردە داۋرەن سەرعازين، سانجار ءمادي، اسىلحان تولەپوۆ، گۇلناز جولانوۆا، اسەل ساعاتوۆا، جاندوس ايباسوۆ جانە ازامات ساتىبالدى وينايدى.
تۋىندى كينوكارتينانىڭ كەيىپكەرلەرى ارقىلى وتانعا دەگەن سۇيىسپەنشىلىكتى، دوستىق پەن ءپاتريوتيزمدى، اسكەري انتقا جانە قىزمەتتىك مىندەتكە دەگەن ادالدىقتى دارىپتەيدى. ءفيلمدى كينوتەاترلاردان كورۋگە بولادى.
