الماتىدا ورىس پراۆوسلاۆ شىركەۋىندە بۇرىن قىزمەت ەتكەن ياكوۆ ۆورونسوۆ ەكى ايعا قاماۋعا الىندى، دەپ حابارلايدى Dalanews.kz.
ۆورونسوۆتىڭ ادۆوكاتى عالىم نۇرپەيىسوۆ قازتاگ اگەنتتىگىنە پىكىر ءبىلدىردى. ونىڭ ايتۋىنشا، سوت وتىرىسى ونلاين فورماتتا وتكەن. پروكۋرور كۇدىكتىنى قاماۋدا ۇستاۋدى سۇراپ، ءوز ۋاجدەرىن كەلتىرگەنىمەن، قورعاۋ تاراپى تالاپ ەتكەن دالەل قۇجاتتارىن ۇسىنباعان.
قورعاۋشى سوتتان ۆورونسوۆتىڭ دەنساۋلىق جاعدايىن ەسكەرىپ، ونى ءۇيقاماققا اۋىستىرۋدى وتىنگەن. ادۆوكاتتىڭ سوزىنشە، ونىڭ كوكتامىرلارى مەن بۋىندارىنا قاتىستى سىرقاتى بار، سوندىقتان ءۇي جاعدايىندا تولىققاندى ەم قابىلداۋى قاجەت.
"ءبىز ءۇيقاماقتى سۇرادىق. ول تەرگەۋدەن قاشپايدى، ءىس جۇرگىزۋگە كەدەرگى كەلتىرۋ نيەتى جوق. سوعان قاراماستان پروكۋرور ەكى ايعا قاماۋدى تالاپ ەتتى. سوت قورعاۋ تاراپىنىڭ ءوتىنىشىن قاناعاتتاندىرماي، ەكى ايعا قاماۋ تۋرالى قاۋلى شىعاردى. ءبىز بۇل شەشىممەن كەلىسپەيمىز جانە اپەللياسيالىق شاعىم بەرەمىز. سونداي-اق وعان قاجەتتى مەديسينالىق كومەكتىڭ كورسەتىلۋىن تالاپ ەتەمىز"، - دەدى ادۆوكات قازتاگ اگەنتتىگىنە.
قورعاۋشى سوت شەشىمىنە شاعىم تۇسىرىلەتىنىن مالىمدەدى.
ايتا كەتەيىك، بۇعان دەيىن عالىم نۇرپەيىسوۆ ۆورونسوۆقا قىلمىستىق كودەكستىڭ 302-بابى ("ەسىرتكى قۇرالدارىن تۇتىنۋ ءۇشىن پريتون ۇيىمداستىرۋ نەمەسە ۇستاۋ") جانە 296-بابى ("وتكىزۋ ماقساتىنسىز ەسىرتكى قۇرالدارىمەن زاڭسىز اينالىسۋ") بويىنشا ايىپ تاعىلعانىن مالىمدەگەن ەدى.
23 اقپاندا ونىڭ اكىمشىلىك قاماۋ مەرزىمى اياقتالعانىمەن، بوستاندىققا شىقپاعان. تاڭەرتەڭ ول 72 ساعاتقا قايتا ۇستالىپ، بۇل جولى قىلمىستىق ءىس اياسىندا كۇدىكتى رەتىندە تانىلعان. ءۇش تاۋلىك ىشىندە وعان قاتىستى بۇلتارتپاۋ شاراسى تاڭدالۋى ءتيىس.
بۇعان دەيىن الماتى قالالىق پوليسيا دەپارتامەنتى ەسىرتكى قۇرالدارىن تۇتىنۋ ءۇشىن پريتون ۇيىمداستىرۋ فاكتىسى بويىنشا قىلمىستىق ءىس تەرگەلىپ جاتقانىن حابارلاعان.
اكىمشىلىك قاماۋدا وتىرعان كەزىندە ۆورونسوۆ ادۆوكاتى ارقىلى حات جاريالاپ، وزىنە تاعىلعان ايىپتاردى جوققا شىعارعان. ول جاعدايدى قازاقستاندا رۋس پراۆوسلاۆ شىركەۋىنەن بولەك تاۋەلسىز پراۆوسلاۆ شىركەۋىن قۇرۋ ارەكەتىمەن بايلانىستىراتىنىن مالىمدەگەن.
وسىعان دەيىن وعان «ەكسترەميزم» بابى بويىنشا قوزعالعان ءىس توقتاتىلعانى ايتىلعان. سونداي-اق 12 اقپاندا ول الماتى قالالىق ادىلەت دەپارتامەنتىنە قارسى ءدىني بىرلەستىكتى مەملەكەتتىك تىركەۋدەن باس تارتۋ شەشىمىن زاڭسىز دەپ تانۋ تۋرالى تالاپ ارىز بەرگەن.
ياكوۆ ۆورونسوۆ قوعامداعى ءبىرقاتار وزەكتى ماسەلەلەر بويىنشا اشىق سىني پىكىرلەرىمەن تانىمال. 2023 جىلعى 19 ماۋسىمدا ول ءدىن قىزمەتىن توقتاتاتىنىن جاريالاعان.
