مارقۇم شەرزاتتىڭ اكەسى ۇلىن ءولتىردى دەپ ايىپتالعان ءبىر توپ كۇدىكتىگە قاتىستى دەرەكتەردى ءبولىستى، دەپ حابارلايدى Dalanews.kz.
مارقۇمنىڭ اكەسىنىڭ ايتۋىنشا، تالعاردىڭ جەرگىلىكتى بۇزاقىلارى وسى كۇنگە دەيىن شاعىن جانە ورتا كاسىپتەردىڭ ۇستىنەن قاراپ، بوپسالاپ كەلگەن.
"تالعارداعى دۇكەندەر، تاماقتاناتىن ورىندار مەن رەستوراندار – سولاردىڭ باقىلاۋىندا. ماعان دا ولاردىڭ كەلەتىنى تۋرالى ەسكەرتىلگەن ەدى. "ساعان دا كەلەدى، سول ۋاقىتتا سۇراعانىن بەر" دەپ ايتتى. مەن كەلىستىم. ءبىراق ولار كەلمەگەننەن كەيىن "كىمگە بەرەمىن؟" دەپ دالاعا جۇگىرمەيمىن عوي. مىنە، تالعاردا اكىمدىكتەن باستاپ، پروكۋراتۋراعا دەيىن ادىلەتسىزدىك جايپاپ جاتىر. ءتىپتى جەدەل جاردەمنىڭ ءوزى جەمقورلىققا بەيىمدەلىپ العان. قاراپايىم حالىقتىڭ جاعدايى ولارعا قىزىق ەمەس. وعان قوسا جىل سايىن "حۋتوردىڭ" بالالارى ادام ولتىرەدى. مەن عانا زارداپ شەكپەگەن ەكەنمىن. ەلدەر كەلىپ، جاعدايلارىن ايتىپ جاتىر. ماسەلەن، بۇعان دەيىن تاپا-تال تۇستە بىرەۋدىڭ كوزىن ويىپ العان، ءبىراز قىزدى زورلاپ تاستاعان"، - دەيدى مارقۇمنىڭ اكەسى Jas Alash YouTube ارناسىنا بەرگەن سۇقباتىندا.
ەسكە سالايىق، بۇعان دەيىن تالعاردا 16 جاستاعى شەرزاتتى ءولتىردى دەپ ايىپتالىپ جاتقان كۇدىكتىلەردىڭ سۋرەتى الەۋمەتتىك جەلىدە جاپپاي تارالىپ كەتكەن ەدى.
QirSabyn تەلەگرام ارناسى بىرنەشە كۇدىكتىنىڭ سۋرەتى مەن ولاردىڭ ەسىمىن جاريالادى. دەرەككوزدىڭ مالىمەتىنشە، كۇدىكتەلەر 1993، 1998 جانە 2000 جىلعى ازاماتتار. ولاردىڭ ەكەۋى بۇعان دەيىن دە ۇرىپ-سوعۋ فاكتىلەرى بويىنشا جاۋاپقا تارتىلعانى بەلگىلى بولدى.
سوت دەرەكتەرىنە سۇيەنسەك، ازامات ا. جانە ونىڭ دوسى بۇعان دەيىن دە بۇزاقىلىق ارەكەتتەرى ءۇشىن جاۋاپقا تارتىلعان. وتكەن جىلدىڭ كۇزىندە ازامات ن. ەكەۋى جانارماي بەكەتىندە بەيتانىس جىگىتكە شابۋىل جاساپ، ورتاشا دارەجەدەگى جاراقات سالعان. الايدا سوتتا ەكى تاراپ تاتۋلاسىپ، ءىستى جىلى جاپقان.
ازامات ن. بولسا، قازىرگى ۋاقىتتا توبەلەس ءۇشىن شارتتى تۇردە باس بوستاندىعىنان ايىرىلعان. ونىڭ بۇعان دەيىن ادامدارعا ءتورت مارتە شابۋىل جاساعانى بەلگىلى بولدى. ءبىراق جابىرلەنۋشىلەر وعان بەلگىسىز سەبەپتەرمەن كەشىرىم بەرىپ، تاتۋلاسۋعا كەلىسكەن.
وسى تۇستا الەمجەلىدە شەرزات پەن ونىڭ وتباسىنا شابۋىل جاساعان جىگىتتەردىڭ “حۋتور” اتتى جەرگىلىكتى قىلمىستىق توپپەن بايلانىسى بار دەگەن اقپارات جەلدەي ەسۋدە. توپتىڭ باسشىسى حاسان ەسىمدى ازامات كورىنەدى. كوپتىڭ ايتۋى بويىنشا، ول تالعار اۋدانىن ۇرەيدە ۇستاپ وتىر.
ايتا كەتەيىك، 12 قازانعا قاراعان ءتۇنى تالعار تراگەدياسىندا قازا تاپقان شەرزات بولاتتىڭ ءۇيى ورتەنىپ كەتتى.
قازىرگى تاڭدا تالعار اۋدانىندا ءۇيدى ورتەۋ قىلمىسى بويىنشا بارلىق ايعاق الىنىپ، قاجەتتى ساراپتامالار جۇرگىزىلۋدە.
ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ پەن الماتى وبلىسىنىڭ پروكۋرورى بەرىك اداموۆ تالعار اۋدانىنداعى ءۇيدى ورتەۋ فاكتىسى بويىنشا تەرگەۋ بارىسى تۋرالى حابارلادى.
الەنوۆتىڭ ايتۋىنشا، قىلمىس جاسالعان ساتتەن باستاپ، ياعني 4 قازاننان بەرى تالعار اۋدانىندا ءمينيستردىڭ ءبىرىنشى ورىنباسارى باستاعان ءىىم ورتالىق اپپاراتى قىزمەتكەرلەرىنەن قۇرالعان جەدەل-تەرگەۋ توبى جۇمىس ىستەپ جاتىر.
"جەدەل-تەرگەۋ توبى قۇرىلىپ، قىلمىس جاسالعان جەردە مۇقيات تەكسەرۋ جۇمىستارىن جۇرگىزۋدە. بەينەباقىلاۋ كامەرالارىنان جازبالار قارالۋدا. اۋلالار مەن ەسەپتە تۇرعان تۇلعالار تەكسەرىلۋدە. وتباسىنىڭ تۇرعىلىقتى جەرىن پوليسيا قىزمەتكەرلەرى پاترۋلدەۋدە"، - دەدى ول.
وقيعا ورىن العان كەزدە ءورت بولعان ۇيدە ەشكىم تۇرىپ جاتقان جوق ەدى. جانۇيا قازىرگى كەزدە باسقا مەكەنجايدا تۇرىپ جاتىر.
قىلمىسكەرلەر ۇستالىپ، مىندەتتى تۇردە جاۋاپقا تارتىلادى. سونىمەن قاتار جالعان اقپارات تاراتپاۋعا شاقىرامىن، – دەدى ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ.
الماتى وبلىسىنىڭ پروكۋرورى بەرىك اداموۆ بارلىق تەرگەۋ ارەكەتتەرى باس پروكۋراتۋرانىڭ باقىلاۋىندا ەكەنىن اتاپ ءوتتى.
"تەرگەۋ بارىسى تۋرالى باس پروكۋرورعا ەسەپ بەرەمىن. بۇگىنگى تاڭدا ارنايى پروكۋرورلار ءۇيدى ورتەۋ فاكتىسىن تەرگەپ جاتىر. وقيعا ورنىنان بارلىق ايعاقتار الىنىپ، ولار بويىنشا ءتيىستى ساراپتامالار تاعايىندالدى. ءبىز ساراپتاما ناتيجەلەرىن كۇتۋدەمىز، ودان كەيىن قوسىمشا اقپارات بەرىلەدى. بۇگىنگى تاڭدا وسى ءىس بويىنشا كوپتەگەن جالعان اقپارات تاراتىلۋدا. ازاماتتارعا جالعان اقپارات تاراتقانى ءۇشىن قىلمىستىق جاۋاپكەرشىلىك قاراستىرىلاتىنىن ەسكەرتكىم كەلەدى"، – دەدى الماتى وبلىسىنىڭ پروكۋرورى بەرىك اداموۆ.
