Marqum Sherzattyń ákesi ulyn óltirdi dep aıyptalǵan bir top kúdiktige qatysty derekterdi bólisti, dep habarlaıdy Dalanews.kz.
Marqumnyń ákesiniń aıtýynsha, Talǵardyń jergilikti buzaqylary osy kúnge deıin shaǵyn jáne orta kásipterdiń ústinen qarap, bopsalap kelgen.
"Talǵardaǵy dúkender, tamaqtanatyn oryndar men restorandar – solardyń baqylaýynda. Maǵan da olardyń keletini týraly eskertilgen edi. "Saǵan da keledi, sol ýaqytta suraǵanyn ber" dep aıtty. Men kelistim. Biraq olar kelmegennen keıin "kimge beremin?" dep dalaǵa júgirmeımin ǵoı. Mine, Talǵarda ákimdikten bastap, prokýratýraǵa deıin ádiletsizdik jaıpap jatyr. Tipti jedel járdemniń ózi jemqorlyqqa beıimdelip alǵan. Qarapaıym halyqtyń jaǵdaıy olarǵa qyzyq emes. Oǵan qosa jyl saıyn "Hýtordyń" balalary adam óltiredi. Men ǵana zardap shekpegen ekenmin. Elder kelip, jaǵdaılaryn aıtyp jatyr. Máselen, buǵan deıin tapa-tal túste bireýdiń kózin oıyp alǵan, biraz qyzdy zorlap tastaǵan", - deıdi marqumnyń ákesi Jas Alash YouTube arnasyna bergen suqbatynda.
Eske salaıyq, buǵan deıin Talǵarda 16 jastaǵy Sherzatty óltirdi dep aıyptalyp jatqan kúdiktilerdiń sýreti áleýmettik jelide jappaı taralyp ketken edi.
QirSabyn telegram arnasy birneshe kúdiktiniń sýreti men olardyń esimin jarıalady. Derekkózdiń málimetinshe, kúdikteler 1993, 1998 jáne 2000 jylǵy azamattar. Olardyń ekeýi buǵan deıin de uryp-soǵý faktileri boıynsha jaýapqa tartylǵany belgili boldy.
Sot derekterine súıensek, azamat A. jáne onyń dosy buǵan deıin de buzaqylyq áreketteri úshin jaýapqa tartylǵan. Ótken jyldyń kúzinde azamat N. ekeýi janarmaı beketinde beıtanys jigitke shabýyl jasap, ortasha dárejedegi jaraqat salǵan. Alaıda sotta eki tarap tatýlasyp, isti jyly japqan.
Azamat N. bolsa, qazirgi ýaqytta tóbeles úshin shartty túrde bas bostandyǵynan aıyrylǵan. Onyń buǵan deıin adamdarǵa tórt márte shabýyl jasaǵany belgili boldy. Biraq jábirlenýshiler oǵan belgisiz sebeptermen keshirim berip, tatýlasýǵa kelisken.
Osy tusta álemjelide Sherzat pen onyń otbasyna shabýyl jasaǵan jigitterdiń “Hýtor” atty jergilikti qylmystyq toppen baılanysy bar degen aqparat jeldeı esýde. Toptyń basshysy Hasan esimdi azamat kórinedi. Kóptiń aıtýy boıynsha, ol Talǵar aýdanyn úreıde ustap otyr.
Aıta keteıik, 12 qazanǵa qaraǵan túni Talǵar tragedıasynda qaza tapqan Sherzat Bolattyń úıi órtenip ketti.
Qazirgi tańda Talǵar aýdanynda úıdi órteý qylmysy boıynsha barlyq aıǵaq alynyp, qajetti saraptamalar júrgizilýde.
İshki ister mınıstriniń birinshi orynbasary Baýyrjan Álenov pen Almaty oblysynyń prokýrory Berik Adamov Talǵar aýdanyndaǵy úıdi órteý faktisi boıynsha tergeý barysy týraly habarlady.
Álenovtyń aıtýynsha, qylmys jasalǵan sátten bastap, ıaǵnı 4 qazannan beri Talǵar aýdanynda mınıstrdiń birinshi orynbasary bastaǵan İİM ortalyq apparaty qyzmetkerlerinen quralǵan jedel-tergeý toby jumys istep jatyr.
"Jedel-tergeý toby qurylyp, qylmys jasalǵan jerde muqıat tekserý jumystaryn júrgizýde. Beınebaqylaý kameralarynan jazbalar qaralýda. Aýlalar men esepte turǵan tulǵalar tekserilýde. Otbasynyń turǵylyqty jerin polısıa qyzmetkerleri patrúldeýde", - dedi ol.
Oqıǵa oryn alǵan kezde órt bolǵan úıde eshkim turyp jatqan joq edi. Januıa qazirgi kezde basqa mekenjaıda turyp jatyr.
Qylmyskerler ustalyp, mindetti túrde jaýapqa tartylady. Sonymen qatar jalǵan aqparat taratpaýǵa shaqyramyn, – dedi İshki ister mınıstriniń birinshi orynbasary Baýyrjan Álenov.
Almaty oblysynyń prokýrory Berik Adamov barlyq tergeý áreketteri Bas prokýratýranyń baqylaýynda ekenin atap ótti.
"Tergeý barysy týraly bas prokýrorǵa esep beremin. Búgingi tańda arnaıy prokýrorlar úıdi órteý faktisin tergep jatyr. Oqıǵa ornynan barlyq aıǵaqtar alynyp, olar boıynsha tıisti saraptamalar taǵaıyndaldy. Biz saraptama nátıjelerin kútýdemiz, odan keıin qosymsha aqparat beriledi. Búgingi tańda osy is boıynsha kóptegen jalǵan aqparat taratylýda. Azamattarǵa jalǵan aqparat taratqany úshin qylmystyq jaýapkershilik qarastyrylatynyn eskertkim keledi", – dedi Almaty oblysynyń prokýrory Berik Adamov.
