ماجىلىستە وتكەن دوڭگەلەك ۇستەلدە قازاقستان رەسپۋبليكاسى پارلامەنتى ءماجىلىسىنىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ ءتوراعاسى ەدىل جاڭبىرشين مەن "تابيعات" ەكولوگيالىق وداعىنىڭ ءتوراعاسى مەلس ەلەۋسىزوۆ اراسىندا جانجال تۋىندادى، دەپ حابارلايدى Dalanews.kz.
دوڭگەلەك ۇستەلدە اعىندى سۋدى قايتا پايدالانۋ ءارى سۋ ۇنەمدەۋ ماسەلەسى تالقىلاندى. جيىن بارىسىندا جاڭبىرشين مەن ەلەۋسىزوۆتىڭ اراسىندا ۋاقىت رەگلامەنتىنە بايلانىستى داۋ شىقتى.
"ءتوراعا مىرزا، مەنى تىڭداۋىڭىزدى سۇرايمىن، ءبىز جانتۇرشىگەرلىك تەحنوگەندىك اپاتتىڭ الدىندا تۇرمىز. ماعان جەكە سۇراق بويىنشا سويلەيتىنىم ايتىلعان بولاتىن"، - دەدى ەلەۋسىزوۆ جاڭبىرشينگە.
جاڭبىرشين ءوز كەزەگىندە سپيكەردەن ۋاقىت رەگلامەنتىنە بايلانىستى ەرەجە ساقتاۋىن سۇرادى. الايدا ەلەۋسىزوۆ كەلىسە قويمادى.
"مەن جەكە باسىما قاتىستى سۋ ماسەلەسىن ايتايىن دەپ وتىرعانىم جوق. مەن ەلدەگى پروبلەمانى قوزعاعىم كەلەدى. بۇل نە دەگەن ۋاقىت؟ ماسەلە مىڭداعان ادامنىڭ ولىمىنە سەبەپ بولۋى مۇمكىن. ال ءسىز بۇل تۋرالى ويلاپ تۇرعان جوقسىز"، - دەپ اشۋلاندى ول.
بۇعان جاۋاپ رەتىندە ءماجىلىس كوميتەتىنىڭ ءتوراعاسى ەلەۋسىزوۆتەن ەموسياعا بەرىلمەۋىن سۇرادى.
"توقتاڭىز. داۋىس كوتەرمەڭىز. سابىر ەتىڭىز. ءسىز الدىمەن تىڭداڭىز. ءبىز باسىندا ءبارى سۇراق قوياتىنىن ايتتىق. ناقتى سۇراعىڭىز بولسا، قويىڭىز. سىزگە سويلەۋگە ۋاقىت بەردىك»، - دەدى جاڭبىرشين.
الايدا ەلەۋسىزوۆ وعان بالقاش كولىنىڭ ماسەلەسىن ايتۋعا ۋاقىت تاپشى ەكەنىن ايتىپ، قارسىلىق ءبىلدىردى.
"مەن سۇراق قويۋ تۋرالى ايتىپ وتىرعانىم جوق. مەن بۇگىن ءسىزدىڭ كەڭەسكە ەسەپ بەرۋگە شاقىرىلدىم. مەن جاي عانا مينيسترلىكتى قولداپ، ۇسىنىستار ايتۋعا كەلدىم، باسقا ەشتەڭە ەمەس"، - دەدى ول.
وسى تۇستا جاڭبىرشين ەلەۋسىزوۆكە قاتاڭ تۇردە ەسكەرتۋ جاسادى.
"اسىقپاڭىز. دوڭگەلەك ۇستەل ءالى اياقتالعان جوق. ءبىز ءقازىر بارلىعىنا سۇراق قويۋعا مۇمكىندىك بەرىپ جاتىرمىز. سۇراق-جاۋاپتان كەيىن ايتارىڭىز بولسا، ايتىڭىز. مۇندا قورشاعان ورتا ماسەلەسىنە الاڭداۋشىلىق تانىتىپ وتىرعان جالعىز ءسىز ەمەس. بارلىعىمىز الاڭدايمىز. جينالىسقا كەدەرگى كەلتىرمەڭىز. وسى جينالىستى باسقارىپ وتىرعان ادام بار. ميكروفوندى ءوشىرىڭىز. ايتپەسە جينالىستان مۇلدەم شىعارىپ جىبەرەمىز. ءتارتىپ ساقتاڭىز. بۇل جاق سىزگە بازار ەمەس، مەملەكەتتىك ورگان»، – دەپ اشۋلاندى جاڭبىرشين.
