Májiliste ótken dóńgelek ústelde Qazaqstan Respýblikasy Parlamenti Májilisiniń Ekologiia máseleleri jáne tabiǵat paidalaný komitetiniń tóraǵasy Edil Jańbyrshin men "Tabiǵat" ekologiialyq odaǵynyń tóraǵasy Mels Eleýsizov arasynda janjal týyndady, dep habarlaidy Dalanews.kz.
Dóńgelek ústelde aǵyndy sýdy qaita paidalaný ári sý únemdeý máselesi talqylandy. Jiyn barysynda Jańbyrshin men Eleýsizovtiń arasynda ýaqyt reglamentine bailanysty daý shyqty.
"Tóraǵa myrza, meni tyńdaýyńyzdy suraimyn, biz jantúrshigerlik tehnogendik apattyń aldynda turmyz. Maǵan jeke suraq boiynsha sóileitinim aitylǵan bolatyn", - dedi Eleýsizov Jańbyrshinge.
Jańbyrshin óz kezeginde spikerden ýaqyt reglamentine bailanysty ereje saqtaýyn surady. Alaida Eleýsizov kelise qoimady.
"Men jeke basyma qatysty sý máselesin aitaiyn dep otyrǵanym joq. Men eldegi problemany qozǵaǵym keledi. Bul ne degen ýaqyt? Másele myńdaǵan adamnyń ólimine sebep bolýy múmkin. Al siz bul týraly oilap turǵan joqsyz", - dep ashýlandy ol.
Buǵan jaýap retinde Májilis komitetiniń tóraǵasy Eleýsizovten emotsiiaǵa berilmeýin surady.
"Toqtańyz. Daýys kótermeńiz. Sabyr etińiz. Siz aldymen tyńdańyz. Biz basynda bári suraq qoiatynyn aittyq. Naqty suraǵyńyz bolsa, qoiyńyz. Sizge sóileýge ýaqyt berdik», - dedi Jańbyrshin.
Alaida Eleýsizov oǵan Balqash kóliniń máselesin aitýǵa ýaqyt tapshy ekenin aityp, qarsylyq bildirdi.
"Men suraq qoiý týraly aityp otyrǵanym joq. Men búgin sizdiń keńeske esep berýge shaqyryldym. Men jai ǵana ministrlikti qoldap, usynystar aitýǵa keldim, basqa eshteńe emes", - dedi ol.
Osy tusta Jańbyrshin Eleýsizovke qatań túrde eskertý jasady.
"Asyqpańyz. Dóńgelek ústel áli aiaqtalǵan joq. Biz qazir barlyǵyna suraq qoiýǵa múmkindik berip jatyrmyz. Suraq-jaýaptan keiin aitaryńyz bolsa, aityńyz. Munda qorshaǵan orta máselesine alańdaýshylyq tanytyp otyrǵan jalǵyz siz emes. Barlyǵymyz alańdaimyz. Jinalysqa kedergi keltirmeńiz. Osy jinalysty basqaryp otyrǵan adam bar. Mikrofondy óshirińiz. Áitpese jinalystan múldem shyǵaryp jiberemiz. Tártip saqtańyz. Bul jaq sizge bazar emes, memlekettik organ», – dep ashýlandy Jańbyrshin.
