باتىس قازاقستان وبلىسىندا مي-8 تٸكۇشاعى اپاتقا ۇشىراعانىنا ٷش جارىم جىل ٶتكەن سوڭ قىلمىستىق ٸس سوتقا جەتتٸ. بۇل ٸس بويىنشا قازا تاپقان ەكٸ ۇشقىشقا رەسمي تٷردە ايىپ تاعىلعان, دەپ حابارلايدى dalanews.kz Kozachkov offside-قا سٸلتەپ.
وقيعا 2023 جىلى 23 اقپاندا بەيتەرەك اۋدانى بەيبٸتشٸلٸك اۋىلى ماڭىندا بولعان. "قازاۆياسپاس" اق-عا تيەسٸلٸ تٸكۇشاق اپاتقا ۇشىراپ, ەكيپاجدىڭ تٶرت مٷشەسٸ قازا تاپتى, تاعى ەكٸ ادام جاراقات الدى.
تەرگەۋ بارىسىندا سول كٷنٸ ٶڭٸردە اۋا رايىنا بايلانىستى ەسكەرتۋ جارييالانعانى انىقتالعان. وسىعان بايلانىستى ەۋە كەمەسٸنٸڭ ۇشۋى كەيٸنگە قالدىرىلعان. الايدا تٸكۇشاق كٶككە كٶتەرٸلگەننەن كەيٸن قارلى بوران باستالعان.
"سول كەزدە ۇشقىشتار ۇشۋ باعىتىن ٶزگەرتۋ تۋرالى شەشٸم قابىلداعان. وعان دەيٸن ولاردىڭ جاعدايدى تالقىلاعان ەڭگٸمەسٸ بورتتىق جازبا قۇرىلعىسىنا جازىلىپ قالعان. ۇشقىشتاردىڭ بٸرٸ اۋا رايى ناشارلاپ, جەل قاتتى سوعىپ تۇرعانىن ايتىپ, ەرٸ قاراي ۇشۋدىڭ قاجەتٸ بار-جوعىن تالقىلاعان. ولار تاپسىرىس بەرۋشٸگە اۋا رايىنا بايلانىستى كەرٸ قايتۋ كەرەك ەكەنٸن تٷسٸندٸرۋدٸ دە سٶز ەتكەن.
بۇل رەيس قۇتقارۋ ماقساتىندا ەمەس, كوممەرتسييالىق سيپاتتا بولعان. "قازاۆياسپاس" اق "قازترانسويل" اق-مەن ماگيسترالدىق مۇناي قۇبىرىن ەۋەدەن باقىلاۋ تۋرالى كەلٸسٸمشارت جاساسقان. سوندىقتان بورتتا جولاۋشى ينجەنەرلەر دە بولعان. مۇناي قۇبىرىن ەۋەدەن باقىلاۋ كەزٸندە تٸكۇشاق رۇقسات ەتٸلگەن ەڭ تٶمەنگٸ بيٸكتە ۇشۋى كەرەك بولعان. بۇل ۇشۋ قاۋٸپسٸزدٸگٸنە قوسىمشا قاۋٸپ تٶندٸرەدٸ. تەرگەۋ مەلٸمەتٸنشە, كٶرٸنبەيتٸن بولعان سوڭ ەكيپاج تٸكۇشاقتى كەرٸ بۇرۋ تۋرالى شەشٸم قابىلداعان. الايدا ولار قاۋٸپسٸز بيٸككە كٶتەرٸلمەگەن", - دەپ جازىلعان مەلٸمەتتە.
دەرەككە سٷيەنسەك, اۆياتسييالىق تەرگەۋ "اپاتقا ەكيپاجدىڭ قاتە شەشٸمدەرٸ سەبەپ بولعان" دەگەن قورىتىندىعا كەلگەن. وسىعان بايلانىستى قىلمىستىق كودەكستٸڭ 344-بابى بويىنشا ەكٸ ادامعا ايىپ تاعىلعان.
