Batys Qazaqstan oblysynda Mi-8 tikushaǵy apatqa ushyraǵanyna úsh jarym jyl ótken soń qylmystyq is sotqa jetti. Bul is boiynsha qaza tapqan eki ushqyshqa resmi túrde aiyp taǵylǵan, dep habarlaidy dalanews.kz Kozachkov offside-qa siltep.
Oqiǵa 2023 jyly 23 aqpanda Báiterek aýdany Beibitshilik aýyly mańynda bolǵan. "Qazaviaspas" AQ-ǵa tiesili tikushaq apatqa ushyrap, ekipajdyń tórt múshesi qaza tapty, taǵy eki adam jaraqat aldy.
Tergeý barysynda sol kúni óńirde aýa raiyna bailanysty eskertý jariialanǵany anyqtalǵan. Osyǵan bailanysty áýe kemesiniń ushýy keiinge qaldyrylǵan. Alaida tikushaq kókke kóterilgennen keiin qarly boran bastalǵan.
"Sol kezde ushqyshtar ushý baǵytyn ózgertý týraly sheshim qabyldaǵan. Oǵan deiin olardyń jaǵdaidy talqylaǵan áńgimesi borttyq jazba qurylǵysyna jazylyp qalǵan. Ushqyshtardyń biri aýa raiy nasharlap, jel qatty soǵyp turǵanyn aityp, ári qarai ushýdyń qajeti bar-joǵyn talqylaǵan. Olar tapsyrys berýshige aýa raiyna bailanysty keri qaitý kerek ekenin túsindirýdi de sóz etken.
Bul reis qutqarý maqsatynda emes, kommertsiialyq sipatta bolǵan. "Qazaviaspas" AQ "QazTransOil" AQ-men magistraldyq munai qubyryn áýeden baqylaý týraly kelisimshart jasasqan. Sondyqtan bortta jolaýshy injenerler de bolǵan. Munai qubyryn áýeden baqylaý kezinde tikushaq ruqsat etilgen eń tómengi biikte ushýy kerek bolǵan. Bul ushý qaýipsizdigine qosymsha qaýip tóndiredi. Tergeý málimetinshe, kórinbeitin bolǵan soń ekipaj tikushaqty keri burý týraly sheshim qabyldaǵan. Alaida olar qaýipsiz biikke kóterilmegen", - dep jazylǵan málimette.
Derekke súiensek, aviatsiialyq tergeý "apatqa ekipajdyń qate sheshimderi sebep bolǵan" degen qorytyndyǵa kelgen. Osyǵan bailanysty Qylmystyq kodekstiń 344-baby boiynsha eki adamǵa aiyp taǵylǵan.
