باتىس قازاقستان وبلىسى اقجايىق اۋدانى چاپايەۆ اۋىلىندا جاڭا سالىنعان جاياۋ جۇرگىنشى جولى حالىقتىڭ اشۋ-ىزاسىن تۋدىردى، دەپ حابارلايدى Dalanews.kz.
تۇرعىنداردىڭ ايتۋىنشا، مەردىگەر كومپانيا قىستىڭ قاق ورتاسىندا قار ۇستىنە تروتۋار سالىپ كەتكەن.
“مايدان كوشەسىنە تۇندە كەلىپ، قالاي بولسا سولاي اسفالت توسەپ كەتكەن. بۇل اۋىلعا، تۇرعىندارعا جاسالعان ناعىز نەمقۇرايلىلىق قوي. وسى جۇمىستى كىم قابىلدادى؟ “تكش باقىلاۋ، ساپا” دەگەن قۇرىلىم راسىمەن بار ما؟ جەرگىلىكتى اكىمدىك بۇل ماسەلەگە نەگە كوز جۇما قاراپ وتىر؟ اۋىلدا ءبىر جانى اشيتىن، جاۋاپكەرشىلىك الاتىن ادام قالماعانى ما؟”، — دەپ كۇيىندى ۆيدەو اۆتورى.
ايتۋىنشا، توسەلگەن اسفالتتىڭ قالىڭدىعى بەس سانتيمەترگە دە جەتپەيدى.
“مۇنداي “جوندەۋدىڭ” كوكتەمگە دەيىن شىداۋى ەكىتالاي. ەرتەڭ-اق وپىرىلىپ، شانشىلىپ قالادى. سمەتا بويىنشا مۇندا برۋسچاتكا توسەلۋى كەرەك بولعان، الايدا ونىڭ ورنىنا ارزان، ساپاسىز اسفالت توسەي سالعان.
بۇل - بيۋدجەت قارجىسىن اشىقتان-اشىق ءراسۋا ەتۋ. قانشا قاراجات ءبولىندى؟ ول اقشا قايدا كەتتى؟ اكىمدىك قايدا قاراپ وتىر؟ جاۋاپتى مەردىگەرلەر مەن قابىلداعان تۇلعالار نەگە جاۋاپ بەرمەيدى؟”، - دەدى تۇرعىن.
