باتىس قازاقستان وبلىسىندا قازاق كينوسىنىڭ ونكۇندىگى باستالدى. شارا اياسىندا بقو تۇرعىندارىنا وتاندىق كينونىڭ جەتىستىگى مەن قازاقستاندىق رەجيسسەرلەردىڭ تۋىندىلارى ۇسىنىلاتىن بولادى. مۇنداعى ءاربىر كينوكارتينا مەملەكەت تاريحىنداعى نەگىزگى كەزەڭدەردى بايانداپ، كورنەكتى قوعام قايراتكەرلەرىنىڭ ءومىرىن تانىستىرماق،- دەپ حابارلايدى Dalanews.kz
ماڭىزدى شارانىڭ اشىلۋىنا باتىس قازاقستان وبلىسىنىڭ اكىمى ناريمان تورەعالييەۆ، ۇلتتىق كينونى قولداۋ مەملەكەتتىك ورتالىعى باسقارما ءتوراعاسىنىڭ ورىنباسارى ادىلەت وماروۆ پەن بەلگىلى رەجيسسەر تالعات تەمەنوۆ، ايماقتاعى مادەنيەت سالاسىنىڭ وكىلدەرى مەن زيالى قاۋىم قاتىستى.
شارادا باتىس قازاقستان وبلىسىنىڭ اكىمى ناريمان تورەعالييەۆ وتاندىق كينەماتوگرافيانى ناسيحاتتاۋ جونىندەگى جۇمىستىڭ ماڭىزىن اتاپ ءوتتى:
«مەملەكەت باسشىسى قاسىم-جومارت توقايەۆ ۇلتتىق قۇرىلتايدا كينويندۋستريانى دامىتۋدىڭ ماڭىزدىلىعىنا ەرەكشە نازار اۋدارعان بولاتىن. بۇل باعىت – جاس ۇرپاقتى ۇلتتىق رۋحتا تاربيەلەۋ مەن قوعامدىق سانانى جاڭعىرتۋدىڭ ماڭىزدى تەتىگى. وڭىرلەردە مەملەكەت قارجىلاندىراتىن فيلمدەردى ۇلتتىق كينونى كەڭىنەن ناسيحاتتاۋعا كومەكتەسەدى».
سونىمەن قاتار ۇلتتىق كينونى قولداۋ مەملەكەتتىك ورتالىعى باسقارما ءتوراعاسىنىڭ ورىنباسارى ادىلەت وماروۆ كينو كۇندەرى اياسىندا ۇسىنىلاتىن فيلمدەرگە توقتالدى.
«بۇگىندە قازاقستاندىق كينو شىعارماشىلىق ورلەۋ كەزەڭىن باستان كەشىپ جاتىر. مادەنيەت جانە اقپارات مينيسترلىگىنىڭ، سونداي-اق مينيستر ايدا عالىم قىزى بالايەۆانىڭ جۇيەلى قولداۋىنىڭ ارقاسىندا ءبىز ساپالى فيلمدەر تۇسىرۋمەن قاتار، ۇلتتىق مادەنيەتكە قولجەتىمدىلىكتى ارتتىرۋدى جالعاستىرۋدامىز. تاريح بەتتەرىن اشىپ كورسەتەتىن كارتينالار ۇرپاقتار اراسىنداعى ساباقتاستىقتى نىعايتۋدا، سونداي-اق مادەني مۇرانى ساقتاۋدا ماڭىزدى ءرول اتقارادى. ال ورال قالاسىندا ونكۇندىكتىڭ اشىلۋى وسى جولداعى ماڭىزدى قادام.
ۇلى وتان سوعىسىنداعى جەڭىستىڭ 80 جىلدىعىنا وراي قازاقتىڭ قايسار قىزدارى مانشۇك مامەتوۆا مەن حيۋاز دوسپانوۆانىڭ تۋعان جەرىندە ءبىز الدىمەن «قارا قىز» كوركەم ءفيلمىن ۇسىنۋدى ءجون تاپتىق. بۇدان بولەك، قورجىنىمىزدا تاعى بىرنەشە فيلم بار. وسىلايشا، ءبىز ورتالىقتىڭ قولداۋىمەن تۇسىرىلگەن بارلىق جوبانىڭ كورەرمەنگە جەتۋىن قالايمىز. بۇل باعىتتا وبلىس ورتالىعى عانا ەمەس، اۋدان، اۋىلدار بويىنشا ارنايى كورسەتىلىم كەستەسى جاسالدى، اكىمدىكتىڭ قولداۋىمەن بىرلەسە جۇمىس جۇرگىزەتىن بولامىز»، – دەدى ادىلەت وماروۆ.
وتاندىق كينو ونكۇندىگىنىڭ ءبىرىنشى كۇنى كورەرمەندەرگە بەلگىلى رەجيسسەر تالعات تەمەنوۆتىڭ «قارا قىز» ءفيلمى ۇسىنىلدى. «قارا قىز» – قاھارماندىق تۋرالى فيلم. مۇندا سوعىس جىلدارىنىڭ شىندىعىمەن قاتار قان مايدان ورتاسىندا جانكەشتى ەرلىك كورسەتكەن باتىرلارىمىز بەن تىلدا ءجۇرىپ قىرۋار ەڭبەك ەتكەن ازاماتتاردىڭ ادامي قۇندىلىقتارىن باياندايدى.
«سوعىستىڭ قاسىرەتى، ادامزات جانىنا سالعان جاراسى ەشقاشان جازىلماق ەمەس. سول سەكىلدى وسىناۋ بەيبىت ءومىرىمىز ءۇشىن جانىن بەرىپ، مايدان دالاسىندا قىرشىننان قيىلعان بوزداقتاردىڭ ەرەن ەڭبەگىن دە ماڭگىلىك جادىمىزدا ساقتاۋ – پارىزىمىز. ال مۇنداي فيلمدەردى جەر-جەردە ۇسىنۋ وڭ باستاما، اسىرەسە جاس ۇرپاق مۇنى كورسە، وزگەشە وي تۇيسە دەيمىز»، – دەدى ءفيلمنىڭ رەجيسسەرى.
بۇعان دەيىن قازاق كينوسىنىڭ ونكۇندىگى قاراعاندى وبلىسىندا باستالىپ، جامبىل، سقو-دا جالعاسىن تاپتى. الداعى ۋاقىتتا بۇل ءۇردىس جالعاسىپ، ەلىمىزدىڭ وزگە قالالارى مەن اۋىلدىق وكرۋگتەرىندە دە ۇيىمداستىرىلماق. شارا اياسىندا ءارتۇرلى جانرداعى فيلمدەر ۇسىنىلادى. جەكەلەي جىكتەسەك، «جامبىل. جاڭا ءداۋىر»، «دوس-مۇقاسان» فيلمدەرى ارقىلى تۇلعالارىمىزدىڭ ءجۇرىپ وتكەن جولىنا قانىعۋعا بولادى. ال «باۋىرىنا سالۋ» دەپ اتالاتىن كينودا ءداستۇرىمىز دارىپتەلىپ، ۇلتقا دەگەن سۇيىسپەنشىلىك سەزىمى ەسەلەنبەك. كىشكەنتاي كورەرمەندەرگە «تايقازان» دەپ اتالاتىن انيماسيالىق تۋىندى كورسەتىلەدى.
ايتا كەتەيىك، بۇعان دەيىن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن 117 كارتينانىڭ ءوندىرىسى اياقتالدى. ونىڭ 72ء-سى – كوركەم، 37ء-سى – دەرەكتى، 8ء-ى – انيماسيالىق فيلمدەر.
