باتىس قازاقستان وبلىسى تەرەكتى اۋدانىنداعى مەكتەپتەردىڭ بىرىندە وقۋشى سىنىپتاسىنا پىشاقپەن شابۋىل جاساعان، دەپ حابارلايدى Dalanews.kz.
بالا قۇقىقتارى جونىندەگى ۋاكىل دينارا زاكييەۆا حابارلاعانداي، شابۋىل جاساعان بالا اناسىنان ايىرىلعان، اكەسى مەن اجەسىمەن بىرگە تۇرادى. وتباسىلىق جاعدايى قيىن، ءوز باسپانالارى جوق. بۇعان دەيىن اپاتتى جاعدايدا تۇرعان ۇيدە ءومىر سۇرگەن، جاقىندا عانا باسقا ۇيگە كوشكەن. سونىمەن قاتار قۇقىق قورعاۋشىنىڭ ايتۋىنشا، مەكتەپتە ول ءجاسوسپىرىم ەرەكشە نازار اۋدارۋدى قاجەت ەتەتىن وقۋشىلار تىزىمىندە بولماعان.
"بۇل ەشبىر جاعدايدا قىلمىستى اقتامايدى. الايدا بۇل بالالارمەن جانە ولاردىڭ وتباسىلارىمەن جەكە جۇمىس جۇرگىزۋ، پروفيلاكتيكالىق شارالاردىڭ ساپاسىنا نازار اۋدارۋ قاجەت ەكەنىن كورسەتەتىن ماڭىزدى بەلگى"، – دەدى دينارا زاكييەۆا.
بقو پوليسيا دەپارتامەنتىنىڭ مالىمەتىنشە، تەرەكتى اۋدانىنداعى مەكتەپتەردىڭ بىرىندە بولعان بۇل وقيعاعا بايلانىستى سوتقا دەيىنگى تەرگەۋ باستالدى. الدىن الا دەرەكتەرگە سۇيەنسەك، جانجال وقۋشىلار اراسىنداعى ءوزارا كەلىسپەۋشىلىكتەن شىققان.
"كۇدىكتى وقۋشى ۇستالىپ، پوليسيا بولىمىنە جەتكىزىلدى. سونداي-اق، جانجالعا قاتىسى بار كامەلەتكە تولماعانداردىڭ اتا-انالارىنا بالالاردى تاربيەلەۋ جونىندەگى مىندەتتەرىن ءتيىستى دەڭگەيدە ورىنداماعانى ءۇشىن شارا قولدانىلادى. ماتەريالدار اۋدان اكىمدىگى جانىنداعى كامەلەتكە تولماعاندار ىستەرى جونىندەگى كوميسسياعا جولداندى"، – دەلىنگەن پوليسيا دەپارتامەنتىنىڭ باسپا ءسوز قىزمەتى تاراتقان حابارلامادا.
ءقازىر وقيعانىڭ تولىق ءمان-جايى انىقتالىپ جاتىر. قىلمىستىق ءىستىڭ تەرگەۋ بارىسى بقو پوليسيا دەپارتامەنتى باسشىلىعىنىڭ ەرەكشە باقىلاۋىندا.
