باتىس قازاقستان وبلىسىنداعى جول اپاتىنان كەيىن 24 وقۋشى اۋرۋحاناعا جەتكىزىلدى، دەپ حابارلايدى Dalanews.kz.

31 ناۋرىز كۇنى شامامەن ساعات 14:00-دە تەرەكتى اۋدانىنا قاراستى پودستەپنوە كەنتىندە مەكتەپ اۆتوبۋسى مەن جولاۋشىلار اۆتوبۋسى سوقتىعىستى. بقو پد مالىمەتىنشە، سامارا – شىمكەنت رەسپۋبليكالىق اۆتوجولىمەن كەلە جاتقان جولاۋشىلار اۆتوبۋسى مەكتەپ اۆتوبۋسىمەن سوقتىعىسقان. سوققى سالدارىنان مەكتەپ اۆتوبۋسى الدا تۇرعان كولىككە سوعىلعان.

«موي گورود» باسىلىمىنىڭ جازۋىنشا، جول اپاتى سالدارىنان 24 بالا زارداپ شەككەن. ولاردىڭ بارلىعى اۋرۋحاناعا جەتكىزىلدى. 21 بالا جۇمساق تىندەردىڭ سوعىلۋىمەن امبۋلاتوريالىق ەمگە جىبەرىلسە، ۇشەۋى جابىق باس-مي جاراقاتى جانە مي شايقالۋ دياگنوزىمەن اۋرۋحاناعا جاتقىزىلعان. دارىگەرلەر ولاردىڭ جاعدايىن ورتاشا اۋىر دەپ باعالاپ وتىر.

سونداي-اق جولاۋشىلار اۆتوبۋسىنداعى ءتورت ادام دا جاراقات العان.

مەكتەپ ديرەكتورىنىڭ ايتۋىنشا، مەكتەپ اۆتوبۋسىندا پودستەپنوە كەنتىندەگى №2 ورتا مەكتەپتىڭ وقۋشىلارى بولعان. بارلىق بالا ورىندىقتا وتىرعان، جانىندا كەزەكشى ءمۇعالىم بولعان. مەكتەپ اۆتوبۋسى تاراپىنان ەشقانداي زاڭبۇزۋشىلىق انىقتالماعان.

اتالعان فاكتى بويىنشا قىلمىستىق ءىس قوزعالدى. جولاۋشىلار اۆتوبۋسىنىڭ جۇرگىزۋشىسى ۋاقىتشا ۇستاۋ يزولياتورىنا قامالدى. پوليسيا تەرگەۋ جۇرگىزىپ جاتىر.