ورال قالاسىنداعى قىلمىستىق ٸستەر جٶنٸندەگٸ سوتتا 43 جاستاعى بلوگەر ايبولات بۋكەنوۆكە قاتىستى ٸس قارالا باستادى. ول الاياقتىق, بوپسالاۋ جەنە قىلمىستىق جولمەن الىنعان اقشانى زاڭداستىرۋ باپتارى بويىنشا ايىپتالىپ وتىر. ٸستٸ سۋديا دينارا گيلمانوۆا قاراۋدا, دەپ حابارلايدى Dalanews.kz.
"موي گورود" مەلٸمەتٸنشە, تەرگەۋ ماتەريالدارىنا سەيكەس, اتالعان قىلمىستىق ٸس بويىنشا جەبٸرلەنۋشٸ رەتٸندە باتىس قازاقستان وبلىسىنداعى بٸرنەشە اۋداننىڭ ەكٸمدەرٸ مەن شەنەۋنٸكتەرٸ تانىلعان.
اتاپ ايتقاندا, تاسقالا, سىرىم جەنە اقجايىق اۋداندارىنىڭ ەكٸمدەرٸ, بەيتەرەك اۋدانى ەكٸمٸنٸڭ ورىنباسارى, جاڭاقالا اۋدانى ەكٸمٸ اپپاراتىنىڭ باسشىسى, سىرىم اۋدانىنىڭ سەۋلەت بٶلٸمٸنٸڭ جەتەكشٸسٸ جەنە مەسليحات دەپۋتاتى بوريس لاۆرەنتەۆ جەبٸرلەنۋشٸلەر قاتارىندا.
تەرگەۋ نۇسقاسى
ايىپتاۋ تاراپىنىڭ مەلٸمەتٸنشە, ايبولات بۋكەنوۆ ەلەۋمەتتٸك جەلٸلەردە بلوگەرلٸك قىزمەتپەن اينالىسىپ, بقو تۇرعىندارىنىڭ مەسەلەلەرٸن كٶتەرٸپ, جەرگٸلٸكتٸ بيلٸكتٸ سىنعا العان. وسىلايشا ول مىڭداعان وقىرمان جيناعان.
پروكۋرور اسحات تلەۋليەۆتٸڭ ايتۋىنشا, كەيٸن بلوگەر تانىمالدىعىن جەكە پايداسىنا پايدالانۋدى كٶزدەگەن.
العاشقى ەپيزود 2025 جىلدىڭ سەۋٸرٸندە تٸركەلگەن. سۋ تاسقىنىنان زارداپ شەككەن تۇرعىن ەيەلگە كٶمەكتەسەمٸن دەپ ۋەدە بەرگەن بلوگەر بەينەجازبا تٷسٸرٸپ, رەزونانس تۋدىرىپ, جاڭا باسپانا الىپ بەرەمٸن دەگەن. بۇل قىزمەتٸ ٷشٸن ول 170 مىڭ تەڭگە تالاپ ەتٸپ, اقشانى ەكٸ بٶلٸكپەن العان.
قايىرىمدىلىق جەلەۋٸمەن جينالعان قارجى
ايىپتاۋ اكتٸسٸنە سەيكەس, كەيٸن بۋكەنوۆ تانىسىنىڭ كٸتابىن شىعارۋعا كٶمەكتەسەمٸن دەگەن جەلەۋمەن ەلەۋمەتتٸك جەلٸدە قارجى جيناعان. جينالعان 200 مىڭ تەڭگەنٸ اۆتورعا اۋدارعانىمەن, اقشا جيناۋدى جالعاستىرعان.
وسىدان كەيٸن ول بٸرنەشە اۋدان ەكٸمدەرٸنە, بٶلٸم باسشىلارىنا جەنە مەسليحات دەپۋتاتىنا جٷگٸنٸپ, دەمەۋشٸلٸك كٶمەك سۇراعان. شەنەۋنٸكتەر جەكە قاراجاتتارىنان 50 مىڭنان 200 مىڭ تەڭگەگە دەيٸن اقشا اۋدارعان.
تاعى بٸر ەپيزود كەزدەيسوق تۋىنداعان. تەرگەۋ دەرەگٸنشە, بلوگەر تانىسىمەن بٸرگە ٸشٸمدٸك ٸشٸپ وتىرعاندا مەجٸلٸس دەپۋتاتى نارتاي ارالبايۇلى بقو-عا ٸسساپارمەن كەلگەنٸن بٸلگەن. وسىدان كەيٸن ول سىرىم جەنە تاسقالا اۋداندارىنىڭ ەكٸمدەرٸنە حابارلاسىپ, «قۇرمەتتٸ قوناققا داستارقان جايۋ قاجەت» ەكەنٸن ايتقان.
نەتيجەسٸندە ەكٸمدەر 50 مىڭ جەنە 40 مىڭ تەڭگەدەن اۋدارعان. الايدا بۇل قاراجات بلوگەردٸڭ جەكە قاجەتتٸلٸكتەرٸنە جۇمسالعان.
بوپسالاۋ دەرەگٸ جەنە ۇستاۋ سەتٸ
بوپسالاۋعا قاتىستى تاعى بٸر ەپيزود جاڭاقالا اۋدانى ەكٸمٸ اپپاراتىنىڭ باسشىسىنا بايلانىستى تٸركەلگەن. بلوگەر Facebook جەلٸسٸندە جەرگٸلٸكتٸ بيلٸكتٸ سىنايتىن جازبالار جارييالاعان.
پوستتاردى ٶشٸرۋ ٷشٸن ول دەلدال ارقىلى 1 ميلليون تەڭگە تالاپ ەتكەن. الدىمەن 200 مىڭ تەڭگە بلوگەردٸڭ جۇبايىنىڭ ەسەپشوتىنا اۋدارىلعان. كەيٸن شەنەۋنٸك ۇقك دەپارتامەنتٸنە جٷگٸنگەن.
قالعان 300 مىڭ تەڭگەنٸ الۋ كەزٸندە ايبولات بۋكەنوۆ قىلمىس ٷستٸندە ۇستالعان.
قۇمار ويىن جەنە «اقشانى زاڭداستىرۋ» بابى
پروكۋروردىڭ مەلٸمەتٸنشە, الىنعان قاراجاتتىڭ بٸر بٶلٸگٸ بۋكمەكەرلٸك كەڭسەلەردەگٸ ويىندارعا جۇمسالعان. جالپى سوماسى - 830 مىڭ تەڭگە. نەتيجەسٸندە بلوگەر 1,2 ملن تەڭگە ۇتىپ العان.
بۇل ەرەكەت قىلمىستىق جولمەن الىنعان كٸرٸستٸ زاڭداستىرۋ رەتٸندە باعالانىپ وتىر.
سوتتاعى ۇستانىمدار
سوتتا جەبٸرلەنۋشٸ رەتٸندە تانىلعان بارلىق مەملەكەتتٸك قىزمەتكەرلەر ماتەريالدىق شىعىندى تولىق ٶتەۋدٸ تالاپ ەتتٸ. ال جازالاۋ تٷرٸن سوتتىڭ قاراۋىنا قالدىردى.
ايبولات بۋكەنوۆ ٶز كٸنەسٸن تولىق مويىنداپ, كەلتٸرٸلگەن شىعىندى ٶتەۋگە دايىن ەكەنٸن مەلٸمدەدٸ.
- كٸتاپقا قاتىستى اقشانى اۆتورعا قايتارىپ بەردٸم. تٷسٸرٸلٸم ٷشٸن الىنعان 170 مىڭ تەڭگەنٸ وپەراتور ەكەۋمٸز تەڭ بٶلٸستٸك. ال بوپسالاۋ مەسەلەسٸنە كەلسەك, ول مٷلدە باسقاشا بولدى. ماعان قۇدا شاقىرىپ, نەسيەلەرٸم تۋرالى سٶز بولدى. ول ستاۆكالاردان ميلليون ۇتتىم دەپ, 200 مىڭ تەڭگە جٸبەردٸ. ماعان ۋاقىت بەرٸڭٸزدەر, بەرٸن قايتارامىن, - دەدٸ ول سوتتا.
وسىعان بايلانىستى ٸس قىسقارتىلعان تەرتٸپپەن قارالىپ جاتىر.
سوت وتىرىسى 30 قاڭتاردا جەبٸرلەنۋشٸلەردەن جاۋاپ الۋ كەزەڭٸمەن جالعاسىپ, ودان كەيٸن تاراپتاردىڭ جارىسسٶزٸنە ٶتپەك.
