Oral qalasyndaǵy qylmystyq ister jónindegi sotta 43 jastaǵy bloger Aibolat Býkenovke qatysty is qarala bastady. Ol alaiaqtyq, bopsalaý jáne qylmystyq jolmen alynǵan aqshany zańdastyrý baptary boiynsha aiyptalyp otyr. Isti sýdia Dinara Gilmanova qaraýda, dep habarlaidy Dalanews.kz.
"Moi gorod" málimetinshe, tergeý materialdaryna sáikes, atalǵan qylmystyq is boiynsha jábirlenýshi retinde Batys Qazaqstan oblysyndaǵy birneshe aýdannyń ákimderi men sheneýnikteri tanylǵan.
Atap aitqanda, Tasqala, Syrym jáne Aqjaiyq aýdandarynyń ákimderi, Báiterek aýdany ákiminiń orynbasary, Jańaqala aýdany ákimi apparatynyń basshysy, Syrym aýdanynyń sáýlet bóliminiń jetekshisi jáne máslihat depýtaty Boris Lavrentev jábirlenýshiler qatarynda.
Tergeý nusqasy
Aiyptaý tarapynyń málimetinshe, Aibolat Býkenov áleýmettik jelilerde blogerlik qyzmetpen ainalysyp, BQO turǵyndarynyń máselelerin kóterip, jergilikti bilikti synǵa alǵan. Osylaisha ol myńdaǵan oqyrman jinaǵan.
Prokýror Ashat Tleýlievtiń aitýynsha, keiin bloger tanymaldyǵyn jeke paidasyna paidalanýdy kózdegen.
Alǵashqy epizod 2025 jyldyń sáýirinde tirkelgen. Sý tasqynynan zardap shekken turǵyn áielge kómektesemin dep ýáde bergen bloger beinejazba túsirip, rezonans týdyryp, jańa baspana alyp beremin degen. Bul qyzmeti úshin ol 170 myń teńge talap etip, aqshany eki bólikpen alǵan.
Qaiyrymdylyq jeleýimen jinalǵan qarjy
Aiyptaý aktisine sáikes, keiin Býkenov tanysynyń kitabyn shyǵarýǵa kómektesemin degen jeleýmen áleýmettik jelide qarjy jinaǵan. Jinalǵan 200 myń teńgeni avtorǵa aýdarǵanymen, aqsha jinaýdy jalǵastyrǵan.
Osydan keiin ol birneshe aýdan ákimderine, bólim basshylaryna jáne máslihat depýtatyna júginip, demeýshilik kómek suraǵan. Sheneýnikter jeke qarajattarynan 50 myńnan 200 myń teńgege deiin aqsha aýdarǵan.
Taǵy bir epizod kezdeisoq týyndaǵan. Tergeý dereginshe, bloger tanysymen birge ishimdik iship otyrǵanda Májilis depýtaty Nartai Aralbaiuly BQO-ǵa issaparmen kelgenin bilgen. Osydan keiin ol Syrym jáne Tasqala aýdandarynyń ákimderine habarlasyp, «qurmetti qonaqqa dastarqan jaiý qajet» ekenin aitqan.
Nátijesinde ákimder 50 myń jáne 40 myń teńgeden aýdarǵan. Alaida bul qarajat blogerdiń jeke qajettilikterine jumsalǵan.
Bopsalaý deregi jáne ustaý sáti
Bopsalaýǵa qatysty taǵy bir epizod Jańaqala aýdany ákimi apparatynyń basshysyna bailanysty tirkelgen. Bloger Facebook jelisinde jergilikti bilikti synaityn jazbalar jariialaǵan.
Posttardy óshirý úshin ol deldal arqyly 1 million teńge talap etken. Aldymen 200 myń teńge blogerdiń jubaiynyń esepshotyna aýdarylǵan. Keiin sheneýnik UQK departamentine júgingen.
Qalǵan 300 myń teńgeni alý kezinde Aibolat Býkenov qylmys ústinde ustalǵan.
Qumar oiyn jáne «aqshany zańdastyrý» baby
Prokýrordyń málimetinshe, alynǵan qarajattyń bir bóligi býkmekerlik keńselerdegi oiyndarǵa jumsalǵan. Jalpy somasy - 830 myń teńge. Nátijesinde bloger 1,2 mln teńge utyp alǵan.
Bul áreket qylmystyq jolmen alynǵan kiristi zańdastyrý retinde baǵalanyp otyr.
Sottaǵy ustanymdar
Sotta jábirlenýshi retinde tanylǵan barlyq memlekettik qyzmetkerler materialdyq shyǵyndy tolyq óteýdi talap etti. Al jazalaý túrin sottyń qaraýyna qaldyrdy.
Aibolat Býkenov óz kinásin tolyq moiyndap, keltirilgen shyǵyndy óteýge daiyn ekenin málimdedi.
- Kitapqa qatysty aqshany avtorǵa qaitaryp berdim. Túsirilim úshin alynǵan 170 myń teńgeni operator ekeýmiz teń bólistik. Al bopsalaý máselesine kelsek, ol múlde basqasha boldy. Maǵan quda shaqyryp, nesielerim týraly sóz boldy. Ol stavkalardan million uttym dep, 200 myń teńge jiberdi. Maǵan ýaqyt berińizder, bárin qaitaramyn, - dedi ol sotta.
Osyǵan bailanysty is qysqartylǵan tártippen qaralyp jatyr.
Sot otyrysy 30 qańtarda jábirlenýshilerden jaýap alý kezeńimen jalǵasyp, odan keiin taraptardyń jaryssózine ótpek.
