باسەكەلەستىكتى قورعاۋ جانە دامىتۋ اگەنتتىگى (بقدا) جۇرگىزىپ جاتقان جۇمىس اياسىندا بايلانىس قىزمەتتەرى نارىعىندا بار ءبىرقاتار كەدەرگىلەر انىقتادى. سونىڭ ىشىندە "قازاقتەلەكوم" اق ارەكەتتەرىندە قىزمەت قۇنىنا مونوپوليالىق جوعارى باعا قويۋ بەلگىلەرى تىركەلدى، دەپ حابارلايدى Dalanews.kz.
"ماسەلەن، 2024 جىلى وپەراتوردىڭ ينتەرنەتكە قول جەتكىزۋ تاريفتەرىندە جىلدامدىعى 100، 200 جانە 500 مبيت/سەك. باعانىڭ ءوسۋ قارقىنى 20%-عا دەيىن جەتتى. وسىعان بايلانىستى قازىرگى تاڭدا اگەنتتىك اتالعان وپەراتورعا قاتىستى باسەكەلەستىكتى قورعاۋ سالاسىنداعى زاڭنامانى بۇزۋ دەرەكتەرى بويىنشا تەرگەپ-تەكسەرۋ جۇرگىزۋدە"، دەلىنگەن بقدا حابارلاماسىندا.
بۇدان بولەك، بقدا ۇيالى بايلانىس قىزمەتتەرىنىڭ باعا ديناميكاسىنا تالداۋ جۇرگىزدى.
"ونىڭ بارىسىندا دا مونوپوليالىق جوعارى باعا قويۋ بەلگىلەرى انىقتالدى. قازىرگى ۋاقىتتا ۇيالى بايلانىس وپەراتورىنا قاتىستى باسەكەلەستىكتى قورعاۋ سالاسىنداعى زاڭنامانى بۇزۋ دەرەگى بويىنشا تەرگەپ-تەكسەرۋ تاعايىنداۋ ماسەلەسى قارالۋدا. وسىلايشا، جوسپارلى باسەكەلەستىك تالداۋى بارىسىندا كوپقاباتتى تۇرعىن ۇيلەردە ۇيدەگى ينتەرنەت قىزمەتتەرىن كورسەتۋ كەزىندە وزگە بايلانىس وپەراتورلارىنىڭ كىرۋىن قيىنداتاتىن كەدەرگى انىقتالدى. ازاماتتاردىڭ ساپالى بايلانىس قىزمەتتەرىنە قول جەتكىزۋى اجىراماس قاجەتتىلىك بولعاندىقتان، كوپقاباتتى تۇرعىن ۇيلەردە (ينتەرنەت قىزمەتتەرىن ۇسىنۋ ءۇشىن) سىمدى بايلانىس جەلىلەرىن باسەكەلى جاعدايدا ورنالاستىرۋ ەرەكشە ماڭىزعا يە. الايدا قولدانىستاعى زاڭنامالىق شەكتەۋلەر كەي جاعدايدا تۇرعىن ۇيلەرگە وزگە وپەراتورلاردىڭ قىزمەت كورسەتۋىنە مۇمكىندىك بەرمەدى"، دەپ ناقتىلايدى اگەنتتىك.
سونىمەن قاتار، وپەراتورلاردىڭ كابەلدى كارىز جەلىلەرىنە قوسىلۋعا تەحنيكالىق شارتتار تۋرالى اقپارات الۋىن قيىنداتاتىن كەدەرگى دە انىقتالدى. جەرگىلىكتى مونوپوليا سۋبەكتىسى كابەلدى-كارىزدىك جەلىلەرگە قوسىلۋعا رۇقسات الۋ ءۇشىن سۇراۋ سالىنعان جاعدايدا تەحنيكالىق شارتتاردى اقىلى نەگىزدە بەرەدى. الايدا تابيعي مونوپوليالار تۋرالى زاڭنامادا مۇنداي تولەم الۋ قاراستىرىلماعان.
بقدا-نىڭ ۇسىنىستارى نەگىزىندە راديوجيىلىك سپەكترىن (رجس) ءبولۋ بويىنشا ساۋدا-ساتتىققا قاتىسۋ ءۇشىن ۇمىتكەردەن كەمىندە 6 وبلىستى قامتيتىن كەڭ اۋقىمدى تەلەكوممۋنيكاسيالىق جانە (نەمەسە) ۇيالى بايلانىس ماگيسترالدىق جەلىسىنىڭ بولۋىن مىندەتتەيتىن تالاپتار نورماتيۆتىك اكتىلەردەن الىنىپ تاستالدى.
"بايلانىس تۋرالى" قولدانىستاعى زاڭعا ۆيرتۋالدى وپەراتورلاردىڭ قىزمەتىن قۇقىقتىق رەتتەۋدى قامتاماسىز ەتەتىن، سونداي-اق ۇيالى بايلانىس وپەراتورلارىنىڭ قۋاتتارىن جالعا الۋعا مۇمكىندىك بەرەتىن تۇزەتۋلەر ەنگىزىلدى. بۇل بايلانىس نارىعىنداعى باسەكەنىڭ دامۋىنا سەرپىن بەرەدى"، دەپ تولىقتىرادى بقدا.
بۇعان دەيىن "سامۇرىق-ەنەرگونىڭ" ەنشىلەسىنە 4،4 ملرد تەڭگە ايىپپۇل سالىنعانىن جازعانبىز.
