بوزتورعاي دەگەن قۇس بار. جۇدىرىقتاي عانا. ەۋەدە بٸر نٷكتەگە بايلانىپ ەن سالادى. بالا كٷنٸمٸزدە جۇمىرتقاسىن كٶپ شاقتىق. ٷلكەندەر: "بوزتورعايدىڭ جۇمىرتقاسىنا تيمەڭدەر, بەتٸڭ شۇبار بولادى" دەۋشٸ ەدٸ. سوندا دا قايتپايمىز. قاي دٶڭدە, قاي سايدا وسى سۇپ-سۇر تورعايدىڭ ۇياسى بار? بٷكٸل اۋىل بالاسى اعام ەكەۋمٸزدەن سۇرايتىن. نەگە ەكەنٸن بٸلمەيمٸن, وسى بٸر ەنشٸ قۇستىڭ ۇياسىن بەلگٸلەپ, كٷندە ساباقتان كەيٸن سونى بٸر كٶرٸپ كەتۋشٸ ەدٸك...
بٸر كٷنٸ مەن بەلگٸلەپ, باعىپ جٷرگەن بٸر ۇيانى كٶرشٸنٸڭ بالاسى بايقاپ قالىپتى. ەلگٸدەن قىزعانىپ بوزتورعايدىڭ 5 تال جۇمىرتقاسىن قالتاما سالىپ ٷيگە ەكەلدٸم. ٷيگە كٸرە بەرگەنٸمدە ٷيدٸڭ كەنجەسٸ - كٸشٸ ٸنٸم جٷگٸرٸپ كەلٸپ باس سالدى. كٶتەردٸم. قالتامداعى قۇستىڭ جۇمىرتقاسىن ۇمىتىپ كەتٸپپٸن. بٸر كەزدە شەشەم: "بالام, قالتاڭنان نە اعىپ تۇر?" - دەيدٸ. قاراسام, بارماقتىڭ باسىنداي جۇمىرتقالار سىنىپ, ساپ-سارى ماي اعىپ تۇر.
انام اشۋلانعاندا, تەنتەكتٸگٸمٸزدٸ كەشٸرمەيتٸن, اياماۋشى ەدٸ. "اقىمدى" بەردٸ.
قايسى كٷنٸ ٸنٸمنٸڭ قىزى شەشەمنٸڭ جيىپ جٷرگەن بار جۇمىرتقاسىن بٸرٸنە بٸرٸن سوعىپ, جارىپتى. ٷستٸ-باسى سارالا-ساتپاق. انام مەز بولىپ قاراپ تۇر. "جار, ۇر. بەتٸڭە جاق" - دەيدٸ. مەن وسىدان جيىرما جىل بۇرىنعى "بوزتورعايدىڭ جۇمىرتقاسى تۋرالى" وقيعانى, العان "سىباعامدى" ايتىپ بەردٸم. "بالام, نەمەرەلٸ بولعاندا بٸلەسٸڭ" - دەدٸ دە قويدى.
