![1391675_431202357002666_38892806_n](/uploads/images/20240128165311461.jpg)
Boztorǵaı degen qus bar. Judyryqtaı ǵana. Áýede bir núktege baılanyp án salady. Bala kúnimizde jumyrtqasyn kóp shaqtyq. Úlkender: "Boztorǵaıdyń jumyrtqasyna tımeńder, Betiń shubar bolady" deýshi edi. Sonda da qaıtpaımyz. Qaı dóńde, qaı saıda osy sup-sur torǵaıdyń uıasy bar? Búkil aýyl balasy aǵam ekeýmizden suraıtyn. Nege ekenin bilmeımin, osy bir ánshi qustyń uıasyn belgilep, kúnde sabaqtan keıin sony bir kórip ketýshi edik...
Bir kúni men belgilep, baǵyp júrgen bir uıany kórshiniń balasy baıqap qalypty. Álgiden qyzǵanyp boztorǵaıdyń 5 tal jumyrtqasyn qaltama salyp úıge ákeldim. Úıge kire bergenimde úıdiń kenjesi - kishi inim júgirip kelip bas saldy. Kóterdim. Qaltamdaǵy qustyń jumyrtqasyn umytyp ketippin. Bir kezde sheshem: "Balam, qaltańnan ne aǵyp tur?" - deıdi. Qarasam, barmaqtyń basyndaı jumyrtqalar synyp, sap-sary maı aǵyp tur.
Anam ashýlanǵanda, tentektigimizdi keshirmeıtin, aıamaýshy edi. "Aqymdy" berdi.
Qaısy kúni inimniń qyzy sheshemniń jıyp júrgen bar jumyrtqasyn birine birin soǵyp, jarypty. Ústi-basy sarala-satpaq. Anam máz bolyp qarap tur. "Jar, ur. Betińe jaq" - deıdi. Men osydan jıyrma jyl burynǵy "Boztorǵaıdyń jumyrtqasy týraly" oqıǵany, alǵan "sybaǵamdy" aıtyp berdim. "Balam, nemereli bolǵanda bilesiń" - dedi de qoıdy.