ديدارى دۇربەلەڭگە تولى دۇنيەدە بۇعان مىسال از بولماي تۇر. كيەلى تاۋەلسىزدىك مەرەكەسى قۇتتى ءھام قايىرلى بولسىن! تاۋەلسىزدىك ۋاقىتى ماڭگى سوعا بەرسىن!

الاۋىزدىقتىڭ كەسىرىنەن جەرتولەنى وقپانا تۇتىپ، ۇرپاعى ۇرشىق-زاماننىڭ يىرىمىندە جوعالىپ جاتقان، كوزىنىڭ نۇرى قاشقان اكە مەن شەشە، ءۇمىتى كۇل-تالقان بولعان ۇرپاق، بوسقان كوش، قاشقان جۇرت از با؟

قولامتانى ۇرلەپ شوق، ۇشقىندى ۇرلەپ وت قىلىپ، ءاۋىل-ۇيدىڭ اراسىن ارازداستىرىپ، شولاق اتپەن شوقىراقتاپ جۇرگەن ساياسي "اقىلگويلەر" تولىپ ءجۇر اۋلامىزدا.

قولىنا جانارماي ۇستاعان جاندايشاپتار جەمە-جەمگە كەلگەندە، جەتى اتاڭ بولسا دا شەشۋشى ساتتە وتقا "باس-سيراعىن" ءۇيتىپ الىپ جالىننىڭ ورتاسىنا جالعىز تاستاپ جايىنا كەتەدى.

ءبىر تۋلاق جەر ءۇشىن اراسىنان قارا مىسىق وتكەن ءتىلى ۇقساس، ءدىنى ءبىر ەلدەر اي-كۇننىڭ امانىندا بىر-بىرىنە قارۋ كەزەنىپ، بىتىسپەس جاۋعا اينالدى. قۇداي ساقتاسىن!

نيەتكە قاسقىر شاپپاسىن…

تۋعان وتاننىڭ ىرگەسى بەرىك، بايراعى بيىك بولعاي! تاۋەلسىزدىك — ءبۇتىن جەر، تۇتاس قازاقستان!

كەزىندە ق ر ۇقك شەكارا قىزمەتىن باسقارىپ ءجۇرىپ بۇكىل ساربازدارىمەن وپات بولعان داڭقتى قولباسشى تۇرعانبەك ستامبەكوۆ بايتاق قازاق جەرىن قالاي جاياۋ-جالپى ارالاپ شىققانىن، شەكارانىڭ قانداي قيامەتپەن شەگەندەلگەنىن شەت-پۇشپاقتاپ ايتىپ ەدى.

قازاقستاننىڭ قۇرلىقتاعى مەملەكەتتىك شە­كاراسىنىڭ جالپى ۇزىندىعى – 13 380 شا­قىرىم. رەسەيمەن اراداعى شەكارامىز – 7 مىڭ 591 شا­قىرىم. قىتايمەن شەكتەسەتىن شەكارا – 1 مىڭ 782 شاقىرىم، وزبەكتەرمەن – 2 354، تۇرىكمەندەرمەن – 426، قىرعىز اعايىندارمەن – 1 241 شاقىرىم. تەڭىزدەگى شەكتەسۋ (كاسپيي) – 2000 شاقىرىم.

"ءوز وزىڭە بەرىك بول، قوڭسىڭدى ۇرى تۇتپا!" دەگەندى دانا اتالار نەگە ايتقان دەيسىز؟ ەلدىڭ ءىشى داۋدان، سىرتى جاۋدان امان بولعاي!
ازاتتىق جولىندا باسى جادىدا كەتكەن بابالاردىڭ رۋحى شات بولسىن! ەل مەن جەر امان بولسىن، قالعان دۇنيە قالپىنا كەلەر.

جاناربەك ءاشىمجان،
ق ر پارلامەنتى ءماجىلىسىنىڭ دەپۋتاتى،